Ишди бурхIназиб Хайдакьла районна культурала Центрли, районна администрацияла кумекличибли, ЧIибяхIнила шилизиб урибси тухтурла 50 дус санигIятлис, марси хIянчилис хасдарибти балбуц дураберкIиб.

Дяхъурбала тухтур Багьаутдин Жамалутдинов мубаракварес тухумти, юлдашуни, хIянчила бархкьяби, районна багьудила, культурала ва администрацияла аппаратла хIянчизарти тухтурла шилизи бакIиб.
Багьаутдин Жамалутдинов акIубси сай 1941 ибил дуслизив Хайдакьла районна ЧIибяхIнила шилизив. Арцла медальличил Табасаранна районна Ерсила урга даражала школа таманаибси, ил Дагъиста медицинский институтлизи учIес керхурси сай. Институт таманаили, ил Киров шагьарлизи тухтурли узес вархьибсири. Илаб сабри жагьил хирургли сунела гIямрулизиб бегI гьалаб сукъур руд убайснила операция барибсира. ГIур хирург Б.Жамалутдинов Дагъиста Южно-Сухокумск шагьарлизивра узули калунси сай. 1969 ибил дуслизив ил МяхIячкьализибси профессор Цахаевла у бихуси ортопедо-травматологияла клиникализи тIалаб­варибсири. Илав сайри гIядатла дяхъурбала тухтур чебяхIси квалификацияла хIянчизарличи айкибси. Жагьил тухтур гIилмула хIянчилизира вархиб – дяхъурбала шайчибси диссертация ва медициналичила макьалаби лукIес вехIихьиб.1980 ибил дуслизив дяхъурбала тухтур Б.Жамалутдинов сунела санигIят хIясибли устадеш имцIадиахъес багьандан, Курган шагьарлизи хабарла профессор Илизаровличи вархьибсири. Илаб белчIуди таманаибси хирург Б.Жамалутдинов Дагъистайзир бегI гьалар Илизаровла метод хIясибли, биштIатала дячунти лигуби цахIнадирхъес вехIихьиб. 1981-1992-ибти дусмазив ил биштIатала дахъал шалубар больницализив дяхъурбала отделенниела заведующийли узиб. Илар илини 10 азиричир имцIали операция дариб.
1992 ибил дуслизив РФ-ла арадеш бихIнила Министерстволи Багьаутдин Жамалутдинов Хайдакьла районна больницалис бекI тухтурли урхьули сай. Илала бекIдешлиуб районна адамтала арадеш бихI­нила хIянчи гьатIира къулайдиуб: больницализиб УЗИ-ла ка­бинет­ абхьиб, больницала палатаби ва тухтуртала кабинетуни газличил ванадирес бехIбихьиб, районна гьарахъти шимазирра абхьиб медицинала пунктани.
Москвализиб, Ростовлизиб, Ленинградлизиб ва Илизаровла уличилси ИОТ-лизиб чуйнара ахъдуциб Багьаутдин Жамалутдиновли сунела санигIятлашалси устадеш. 1997 ибил дуслизив урибси тухтур, шантала тилади хIясибли, ЧIибяхIнила больницализи тухтурли узес вакIиб. Ил бусягIятра илав узули левал.
ХIукуматли ахъли кьиматлабарибси саби илала адамтала арадеш бихIнила шайчибси бахъхIила хIялалси хIянчи. Багьаутдин Жамалутдинов шабагъатлаварибси сай РФ-ла Вишневскийла уличилси хирургунала жамигIятлала ХIурматла Грамоталичил. Ил Бузерила ветеранра сай, Хайдакьла районна шуйнайс бикIибси Собраниела депутатра, Дагъиста Халкьла 3-ибил съездла делегатра. 2000-ибил дуслизиб илис ДР-ла урибси тухтурла ура бедибси саби.
Балбуцличи ЧIибяхIнила шилизи бакIибтани Багьаутдин Жамалутдиновлис дахъал гIяхIти мубаракла гъай дуриб, сунес ва хъалибарглис арадеш ва хIянчилизир гIурра чедибдешуни далгун. Ахирличиб районна культурала Центрла хIянчизартала ва ЧIибяхIнила шила художественная самодеятельностьла кумекличибли гIяхIси концертра чебаахъиб.