Москвализибад бакIибти гIяхIли, Хайдакьла районна шимазибад къунзбухъи ва гIебшнила манзилла тIабигIят чебаили, бамсурли, амма разили Мажалислизибси Россияла халкьла культурала «Кайтаги» центрлизи баиб. Центрла хIянчизарти гIяхIлас разили ва уркIи гьаргли гьунибаиб.
Камси багьлабарили гIергъи, «Кайтаги» центрла хIянчизартани ва директор З.ХIясановани гIяхIли хайдакьлантала рухIла гIямруличил, яшавла кабизличил тянишбариб. Илкьяйда миллатунала гIядатуначила буриб, хайдакьла някьишла ва дагъистанлантачи хасти палтарли дегIдарибти чIянкIила начурбала выставкаби дурадуркIуси хъали чебаахъиб. Илала дурабадра, нушала хала бегIтала бекIахъудила ва халкьла баркь-бацла искусствола ваяхIли баршибси, гIяхIлас балкьаахъурси хъули абацIиб. Илди някъ-някъли делсунти кьалтинтачирти някьишличи хIяйранбиуб, музейлизир гьаладихьибти секIултачил суратуни касиб ва чус хасбарибси хайдакьла някьишлашал устадешла дарсличир халаси иштяхIличил бутIакьяндеш дариб.
Гьаларла някьиш секьяйда «мицIирдарибтил», илди мяхIкамдарес сегъунти хIянчи дурадуркIулил дурути хабуртани туристуназир хIулбукIри ва ил баркьудиличи иштяхI акIахъуб. Устнали ца заманализиб мягIна хIясибли арагIебли цаси композиция алкIахъути някьиш севан цаладирхъулил, дарсхIедиахъубли дархьли севан къелиутил ва дахъал цархIилти дигIяндешуни гьаргдариб. Лерилра чедаахъили ва дурили гIергъи, гIяхIладли бакIибти гIянтIикIа рурсбани хайдакьла някьиш «мицIирдирес» къайгъичеббиубли, черикIла секIултала лугIянси чIянкIи жагати ранганани бицIахъес, сакIубли вяшбикIулри. «Дагъистайзи архIяли бакIибти нушала гьалмагъунани Хайдакьла районничила, культураличила, къугъати гIяхIялдеш дарес балути адамтачила, пергер тIабигIятличила дахъал хабурти дуриб. Илдани дурутачи нушалара лергIер иштяхIдухъи, илди мер-муса чедаэс хьулдухъунра. ТIабигIятла жагадешуни чедаэс, пергер адамтачил гьалмагъдикес, хIушала культураличил ва гIядатуначил тянишдиэс имканбакIниличи нуша дебали разилира. ХIушани нушаб дарибти къугъати гIяхIялдешлис халаси баркалла балахъулра. Хайдакьла районни нушачи буресагарли гIяхIси асарбариб. Разиси хIяйчир чардулхъулра нушала мерличи ва иша бакIес бажардихIебиубтази чедаибтачила хабурти нушанира дурехIе», – бикIи гIяхIли.
