Нушала гIямрулизир Интернет дакIубиъниличил дарх (илини адамтачи бируси асарличила нуни гьалабра газетализиб белкIунсири) дахъал декIар-декIарти приложениебира дагьардиуб.

Илдазибад гьаннала заманализиб бегIлара машгьурси приложение саби инстаграм. Ил Кевин Систром ва Майкл Кригерли 2010-ибил дуслизиб дакIубарибсири. Пайдалабирес дебали гIяхIси, гьамадси приложение ца-кIел дусли лебилра дунъяличи тIинтIбиуб ва бегIлара машгьурси приложениели бетаур. Ишар сегъуна-дигара адамличил гъайикIес, сунела суратуни, видеоби дархьиэс, цархIилтала суратуначи хIерикIес ва гIяхIбизурсиличила балахъес бархли вирули сай. Илкьяйда инстаграмлизив, декIар-декIарти тукентала бяхIличи ухIнаухъи, сунес дигутигъунти секIулти заказдаресра хъули даахъесра вирули сай. Илар гIурра дахъал гIягIнити, пайдалати баянтира даргес вирар.
Амма гIяхIти секIултачил дарх инстаграмлизир дахъал лайикьагарти баянтира дирули сари. Инстаграмли адамтачи, имцIали биштIатачи дебали вайси асарра бирули саби. Гьаннала замана адамли ца бархIилизиб инстаграмлизиб 6-7 сягIятла замана буркIули сай. Ил дебали халаси замана саби. Ил заманалис адамли цархIил журала, багьудлуми мурхьдиркахъути дахъал пайдалати баянти дагьес вирар, мисаллис, жузазирад.
Гьанна инстаграмлизиб чус «блогерти» или бикIути адамти дакIубиубли саби. Чула баркьудиличила багьахъес багьандан, илдани жура-журала видеоби кайсули сари, дахъалгъунти илдазирад адамтас гIягIнили ахIентира, бекIла мехIе «бирцIахъути».
Инстаграм ва илкьяйда цархIилти приложениебала асарлиуб биштIатани жузи, газетаби-журналти дучIули ахIен. ГIергъити дусмазир библиотекализи башути адамтала лугIира дебали камкабиубли саби.
Пайдаличил беркIеси замана инстаграмлизиб хIебуркIахъес дурхIяличира хIеруди биреная. ГIямру нушала цадехI сари ва замана хIяжатси тяхIярличил пайдалабарес къайгъибиреная.