ЗАМАНА - Караматдеш лер хIезир

Жагьси ва жагаси хьунул адамличил их­тилатрикIулри ну­ ва илала назик-назикти тIул­бачи хIер­рикIули, пикри­ри­­­кIул­ри: «Ил­­ди хIела хIяли-арц­л­а някъбазир сихI­ру­ла кара­мат­­деш лерли хIедиэс, ис­багьи. ХIе­зиб хабарла зурбаси муш­лукьязибцад цIа­кьра бургар, се­на­хIен­ну хIу­ни адам­лизибадли кахси изала уб­касес ри­рулри. Агь, хIе­ла рузис рат, хIу Че­вяхI­си­ни­­ адамтас гIяхI­дешуницун ди­­­ра­­хъес акIахъубсигъунари кьал­ли».

Ил чина саррил гьалак­рикIусигъунари, малхIямли набчи хIерризурли, черрерхахъес тиладибариб, гIур сунела кабинетлизирадли «Къалабали дила хIянчи хIясибли Минздравлизи рукьес хIяжатли саби» или дурарухъун.
МяхIячкъалала МяхIяммад ХIяжиевла уличилси кьакьализибси цаибил номерла больницала РМЦ поликлиникала гинекологияла отделениела заведующаяли рузуси ил дарган рурсиличила макьала белкIес или рякьунсиригу, амма илала замана аги хIянчила замана кабинетлизи кариили их­ти­латрикIес. Чула изу-зугI­лу­мачил ва челукьутачил иличи ба­­кIибтала къяй лебри илала кабинетла гьалаб. Илдазибадли гьарилличи гъамриубли илини мурт ва секьяйда илдала зугIлуми арзес имканти лерал багьахъур ва жаняхIкад сабурличил гьайриуб­. Илис гIелабад балгначил ва баркаллала дугьби дурули гъай­бикIулри мер-мерличирти дивантачи бамсриихъули кабиибти зягIиптира.
Гацайниева Хадижат ГIя­ликъличев­на­чила баянти дура­хъес или илала рузи Загьрачи ду­гьарилзулра. Илра кабизалачерси ва гIяхIти хIял-тIабигIятла дубурлан риъни чебаэслири. Ил рузуси сари гIилмула-ахтардила институтлизир. Иличила баянтачил бучIанти кIинайс тянишбирис, иш гьакIлис Хадижатличила сари гъай.
Гацайниев ГIяликъличла хъалибарглизир акIубси Хадижатли тухтурла санигIят чеббикIни бахъла игъбарлизи халбарес вирар. СенахIенну илини декIар-декIарти излумани кьакьабакIахъибти хьунул адамтас гьар бархIи 4-5 операция дирули сари. Черетаибси ва дагьричерси тухтурли сунени бекIдешдируси отделениелизиб ункъли гIеббурцули саби зягIипти. Илдачи уркIи изуси ва сунела хIянчи ункъли балуси иличи башути бахъал саби республикала шагьуртазибадли ва районтазибадли. Гьарилличи уркIила дигиличил ва сабурличил гъамрирар ил уктемдеш-пахру агарси тухтур.
Дахадаевла районна шимазиб ГIя­ликълич ибси у гьачамалра хIер­гъиб­хIели нуни Загьрази хьарбиулра ил у чинабад бар­гибсил.
— Дагъиста хабарла мушлукья къумукълан ГIяликъличла у саби сунела бегIтани бедибси дила дудешлис. Илдигъунти игитти адамтала уми чердиркIни гапла баркьудилизи халбаресра вираргу, — рикIар ил.
ГIе, илгъуна у бедибси дубурлан цIакьси ва кьуватчевси ветаурли сай. Ил сунела хала бегIтала санигIят даимбирули мегьла уста ветаур. Чисалра дигIяндеш ахIен мегьла устала хIянчи гьамадси хIебиъни. Гьа-гьай, хъярбукантани мегь бушинбируливан цархIилти санигIятунира гьамадли руркъути сари. Илгъуна кайзурси дубурланна рурси Хадижатра залумси ва къияндешуназирадли уруххIерируси хIериалри, илгъуна жавабласи къуллукъличир ририв? Гьарилличи операцияби дирахъес хъарбируси ахIенгу.
— Рузес рехIрир­хьу­хIели наб халаси кумекбарибсири машгьурси тухтур Хар­­харова Эльмира ХIя­жиев­на­ни, — бурули сари Хадижатли, —ну рузули калунсира Ис­мя­гIиловла центрлизир отделе­ниела заведующаялира.
Гацайниев ГIяликъличлира илала гIямрула марси гьалмагъ ПатIиматлира къугъаси кулпет абикьур, лебтазилра чебяхIси даражала багьудлуми касахъиб ва лебилра илди гьанна хIялалси бузерилизи ахъили саби. Расул Воронежлизив хIерирули сай. «Тухум» ассоциацияла директор сай ва тренерлира узули сай. ГIябдуллагь, Мухтар ва ГIябдурашид фермертала хозяйствобазиб бузули саби. Илдани ризкьи ва цархIилти духълуми дашахъу.
Кулпетлизир Хадижат бегIлара риштIалгъуна сари. Ил Хъярбачир халараибси сари. Отличноли ручIули шилизиб багьуди хъараахъурли гIергъи, мединститутлизи карерхурсири. Гьанна илала сари-регIси хъалибаргра леб. Мурул Камил МВД-лизив узусири, гьанна пенсияличив сай. Илдала дурхIни Залинара ГIялира бегIтачи мешутили халабиъниличи вирхес вирар.
— Нушала больницала бекI тухтур МяхIяммадов Ибрагьим МяхIяммадович Лавашала районнизивадси сай. Илини мурталра кумекбирули, вирар наб къиянси операция бирухIели. Илдигъунти устадешчебти ва пасихIти тухтурти мякьлаб биалли, вегIра уркIичевли вираргу, — бурули сари Хадижатли.
Илини дила гъамсилисра гьалабван операция барес хIяжатсири. Иличила гъайрухъес или рякьунра хъярбукан рурсила кабинетлизи. ГIядатли биубливан, илала кабинетла гьалаб хьунул адамтира лебри, амма сари аги. Ил операцияличир сари или аргъахъиб набзи. Къиянси операция сабхIели, ил рахъхIи кавлули сари бикIар тухтурти. Ну урухриубра дила гъамсила бургар ил къиянси операция или. Нуни илала у ахъибхIели, цIуба халатунала бегIтани ил хIядуррарили лер ва гьанна операция биру Хадижат ГIяликъличевнани или аргъахъибхIели циила паргъаткариубра. Амма ил операцияличи аркухIели гьандуцес хIериубра ва дила ляжубачирадли нургъби гердухъун. «ГIялам се бикIалра, операция бирни гьамадси хIянчи ахIен. ХIера, чедивад хIерикIухIели селра чебаэс агарли биалра, адамла излумира белгидирули илди агардиресра дубурлан хьунул адамти бурсибиъни чебяхIси баркьуди саби», — пикририкIулра ну Хадижат чераэс хIебикнили циила кьакьаракIахъили. Ил чераибси риасри ну паргъатрирахъаси ва сунела камти дусмачи хIерхIеили, гIякьлула дугьби дури. ГIе, илдигъунти тухтурти гьести гIямрула адамтачибра пасихIти бирути саби.
Ил бархIи больницала хIянчизарти ва бахъал зягIипти чебаира, ва гьарилли цауркIли Хадижатлис гIяхIти дугьби дурулри. «Лебилра тухтурти илдигъунти бирути биалри, — бикIулри зягIипти, — иличи дирхули дакIилра. Чичиб-дигара гIяхIил нушачи хIеруди бирниличи ва операцияра ункъли дурабуркIyниличи умутличил иличи дугьадилзутира. Арати духъянти гIямру дедаб сунес зягIиптас илгъуна кумек гIеббиахънилис».
«Нушачил илгъуна черетаибси ва бажардичерси тухтур рузни нушани игъбарлизи халбирулра, - илгъуна пикрири тухтурталара, - иличи хъарахъес вирар сегъуна-дигара агилизив, илини нушаб мурталра кумекбиру ва гьар шайчирадли гIердурцулра».
Ташмишдеш агарли, къиянси хIянчи саби операцияби дируси тухтурла. Илгъуна санигIят бузахъни мургьи-арцла устайчибра чеветаили вирес хIяжатлира сабигу. Циила хатIаикалли, адамла гIямру къябаэсра асубирулину. Илкьяйдали адамла гIям­ру­ла кьисмат илдала някълизиб саби викIалра хатIа бет­хIерар. Гьарил адамла зя­гIип­­дешунира хасиятунира ца­гъунти хIедиалра, илдачил мурталра малхIямли, илди уркIичеббирули гъайикIес хIяжатли саби.
Хадижатличила их­ти­лат­ди­­кIухIели, цагьатIи ишгъуна пикри лямцIбухъун. Тухтур­ли­чи мурталра чула излумани кьакьабакIахъибти зя­гIип­ти башули саби ва иличи виштIаси нешличиван умутличил дугьабилзули саби. Савли бузери илдигъунти цIумла иргъули ва зягIиптас операцияби дирули, илдала гIямру дерцахъес или къайгънази виркули ва кьакьаикIули бархIи ахъайчи узес чевкъули саби илис. Бархьаначи буралли, гьамадси ахIен илкьяйда узес. ЦацабехIти далай-делхъла агурбауб клубуназиб ва цархIилти мераначиб бузухIели, илдигъунти зягIиптала бисара гIярзъалара иргъес, ва илди паргъаткабарести имканти дургес багьандан гьарли-марси игит виэс хIяжатли саби. ГIе, илгъуна игит сари нушала Хадижат дикIехIелра хатIа бетхIерар. Илдицад зягIиптас кумекбируси дубурлан рурсилис нушанира арати, духъянти гIямрура, хъалибаргла балгундешра, кахIебурхуси талихIра дулгехIе.

 

Прочитано 192 раз

О нас

ЗАМАНА . 0+. Учредитель: ГБУ РД ''Редакция республиканской газеты ''Замана''. Главный редактор: 
 
logo na foto     Фотографии с маркировкой
взяты из открытых источников
 

СМИ

Сайт “Замана” (www.zamana.info), зарегистрирован Федеральной службой по надзору в сфере связи , информационных технологий и массовых коммуникаций . Свидетельство о регистрации средства массовой информации Эл № ФС77-67486 от 18 октября 2016 года..

Контакты

Адрес редакции: 367018, Республика Дагестан, г. Махачкала, пр-т Насрутдинова 1А.
Тел: 65-00-25.  E-mail: Этот адрес электронной почты защищён от спам-ботов. У вас должен быть включен JavaScript для просмотра.
 
fa  in  ok  vk  yt  rss
Top