Ахъушала шилизиб «Сбер­банк» ПАО-ла Да­гъиста отде­ле­ние­ла чеим­цIа­си офис абхьиб.

Шадлихъла аги-хIяйзиб аб­хьибси балбуцличир бутIа­кьян­деш дариб Ахъушала районна бекI МяхIяч ГIяб­дул­ка­­римовли, ДР-ла Халкьла Собраниела депутат Руслан ЯряхI­мадовли, Дагъиста Сбербанкла отделениела управляю­щийла заместитель Ев­гений Морозовли.
Балбуцличив гъайулхъули рай­онна­ бекIли лебилра кумекбарибтас, ДР-ла Халкьла Соб­раниела депутат Р.ЯряхI­­ма­дов­лис, Дагъиста Сбербанкла от­деление­ла руководстволис рай­онна жамигIятлис илцад­ра мягIничебси савгъат барни­лис бар­калла багьахъур. «Ахъу­ша­ла районнизиб 20 дус­личиб им­цIали Сбербанкла учреждение агарсири. Район­на жамигIятлис се-биалра гIягI­ни­бикалри, Лавашала шилизи башес чевкъусири. Гьанна офис абхьнили халаси кункдеш ал­кIу­ли саби. Лебилра районна жа­мигIятла шайзибадра халаси бар­калла балахъулра», – викIи ил.
Е.Морозовли бурни хIя­сиб­ли офислизир сагати гIягI­ниахълуми дирар. Илар бе­кIа­хъудила хIяжатунас, нало­гуни, штрафуни ва банкла цар­хIил­ти далдуцуни ду­ра­деркIес лерилра шуртIри дирути сари. Цалабикибтас илини офискад экскурсия ду­ра­­беркIиб ва суалтас жавабти дедиб.
ДР-ла Халкьла Собраниел­а депутат Р.ЯряхIмадовли буриб­ офис акIахъубси районна халкьлис гьамаддешлис биъни. «Ну районна шайзивадси депутат сайливан, челябкьлализивра районна руководстволи­чил варх экономиклашал район гьа­лабяхI башахъес ва жа­ми­гIят­ла гIямрула шуртI­ри ункъдирахъули узес хIя­дур­ли­ра», – викIи ил.
Дебали дигеси анцIбукь саби, илкьяйдали районнизир хIянчила мерани алкIахъни. Ил офислизирра 4 хIянчила мер акIахъубли сари. Лебилра хIянчизарти мерла адамти­ саби, илдани Сбербанкла от­де­ле­ниелизиб стажировка ду­­­ра­беркIили, устадеш ахъдуцибтири.