ХIяйнайс дурадеркIиб

Октябрьла 5-личир Ахъушала районна Усишала шилизиб Северный Кавказла федеральный округла мотоциклистунала чемпионат бетерхур. Илдигъунти чемпионатуни гьар дус детурхути сари, Усишаб ил хIяйнайс дураберкIиб. Ишдусла абзани диалли, лебил Россияла спортла «Дугила буцIи» бикIуси мотоклубли Ахъушала район 85 дус биънилис багъишладариб.

Дагъистайзи Россияла югла регионтазибад 60-йчиб имцIали спортсмен бакIилри. Сиптакартили биуб Ахъушала районна администрация, жагьилтала шайчибси политикала, культурала ва туризмала управление ва спортла мотоклуб «Усиша».
Чемпионат ибхьули Россияла гимн зайбухъун, байрахъ ахъбуциб арбякьунси дусла призер ГIябдулхаликь ГIябдулкьадировли.
Районна бекI МяхIяч ГIябдулкаримовли цалабикибтас баркалла багьахъур. «ХIяйнайс нушала районнизиб бетурхуси чемпионатличиб цархIилти регионтазибадра гIяхIли леб, ил дебали дигеси анцIбукь саби, сенахIенну ил цагьатIи сабаб саби миллатуни-ургарти узидеш цIакьдикIахъес ва уржахъес. ЧеалкIуси наслула спортличи иштяхI акIахъес ва арати гIямру дуркIахъес гIибратли дирар ишдигъунти абзани. Мотоциклистунас ишбархIи халаси байрам саби, къирла гьунчиб ахIи, гьаваличиб, вацIализиб. Спортсментас абзаначир зарал хIебиубли, чедибдешуницун диубли дигулра», – викIи ил.
Спортсментас чедибдешличи гъирара сархибдешунира далгун ДР-ла Халкьла собраниела депутат Руслан ЯряхIмадовли, регионна «Дугила буцIи» («Ночные волки») клубла президент ГIябдулкьадир ГIябдусаламовли, ММА-ла чемпион, ММА союзла судья МяхIяммад МяхIяммадовли.
5,5 километрла бухъянси хасси трассаличир детерхур абзани, илар хIядурдарилри дуркьа хIулри, духьби, сарира спортсментани кункдешличил ихъути.
БекIливиубси судья Олег Гондеренкони спортсменти 5 номинациялизиб кьиматлабариб: «новичок», «лайт», «хард», «хобби», «мастер». Лебил чедибикибтас кубокуни, медальти, дипломти, грамотаби ва арцла шабагъатуни дедиб.
Байрамличи илкьяйдали учибикилри районна шимала бурги, ДГУ-ла преподавательти, студентуни, алавти районтазибадти гIяхIли. Ил балбуц учибикибтас гьарли-марли спортличи диги адилкьуси ва спортла гIядатуни мяхIкамдирнила байрамли бетаур. Лебтанилра илис ахъси кьимат кабатур. Ахирличиб лебилра кьумур-алав жибариб.