ГIергъиси замана патриот бяркъ бедлугути декIар-декIарти далдуцуни зумали дурадуркIули сари.
Илди дурадуркIнира гIяхIси саби, сенахIенну жагьилтазир ВатIайчи диги адилкьни челябкьлализиб пачалихъ ва жамигIят гьаладяхI дашнилизир хьулчили бетарули саби. Илдигъунтазибадли ца бетарули саби Т.Мурадовла уличилси Дагъиста пачалихъла филармонияла дуцIрумла тахличиб бетерхурси «Нушала жагIяйчи урухкIес дигули ахIенра!» бикIуси республикала жагьилтала мажлисра.
Мажлис ДР-ла культурала Министерствола, ДР-ла жагьилтала Министерствола, ДР-ла багьахънибала, бархбасла ва дахъал коммуникациябала, МяхIячкъалала багьудила управлениела кумекличибли дураберкIибси саби.
Балбуцла дазурбазиб культуралашал машгьурти хIяракатчибала, жагьилтала гьабкьябала ва ихтиюрти далтахъути органтала вакилтала ургар ихтилатуни детаур, илкьяйдали жигарчебти ва пагьмучебти жагьилтала бутIакьяндешличил концертла программа гьалабихьиб. ХIербикIутази патриот бяркъ бухIнабуцибси темала чебкад театрла, музыкала-поэзияла ва делхъла номерти чедаахъиб. Илкьяйда, ДР-ла бурибти гIяртистунанира чула пергер далуйти зайдухъахъун. Илала дурабадра, онлайн тяхIярли художестволашалси пагьмула кьялира бузулри. Илар дурхIнани чула суратуни гьаладихьилри. Ахирличиб дурхIнас хъумхIертести савгъатуни дедиб.
ДР-ла культурала министрла заместитель Мурад ХIяжиевли буриливан, нушала чеабиуси наслули чIянкIли гIяхIсицун чебиэс гIягIниси саби. «Ишдигъунти далдуцуни дурадуркIес дебали къиянни саби. Каспийсклизир ва Бесланнизир кадикибти кахти анцIбукьуначила нушани сеналра хъумуртуси ахIен. Цалра дурхIяли анцIкьи-шишимъала чехIедаили, далайбикIули ва булхъули халабиэс гIягIниси саби», — викIи ил.
Марлирагу, дурхIни нушала талихI саби, Кьудратла ВегIла дурхъаси савгъат саби. Илди разили биалли, нушала челябкьлара шаласили бирар.
