«Милициялизира больницализира къар­ши­мадикаба нуша», — бикIули бирар дубурланти. Сепайда, гIергъити дусмазир сецад дахъал больницабира, поликлиникабира, дармунтани гарчли дицIибти аптекабира лерли диалра, зягIипбиркути адамтала лугIи дусличи-дус им­цIабикIули саби нушала рес­публикализиб. Больни­ца­бира тухтуртира балтIули дурути гъай-мез хIедакь­ибсира хIергар нуша-ургав. «Валлагь зягIипикибхIели боль­ницализи уцахъесра, тухтуртази гIяхIси хIеруди барахъесра гIяхIцад арц дедес чевкъули саби», — бикIутира бирар.

Гьайгьайрагу, илдигъунти гъай далкIти сари, я дархьти сари или буресра гьамадси ахIен. СенкIун тухтурла хIянчи бирутира нушагъунти адамти саби. Илди хIукуматли халаси алапаличил гIеббуцилира ахIен. ГIяхIтира вайтира хIян­чизарти чинаб-дигара къарши­биркур. Амма адамтачил хапли ва хабарагарли вайти анцI­бу­кьуни детаурхIели, бегIла гьалаб дуги-хIери хIеили, зугI­лумази бикибти адамтас кумекбирути ва азирти зягIиптала гIямру уцахъути тухтуртани сари. БехIемцIлизи бикибти ва гIямрулис урехиласи, декIси изайзи бикибти зягIипти больни­цализи кибхIели, хIеруди хIебарили балтути анцIбукьу­нира дебали камли дирар. КъантIли буралли, гьаннала замана гIядатла халкьлис хIукуматла больницабира тухтуртира агарли гIямал бетхIерар. ВегIдешла больницабазиб арадеш къулайби­рахъес бахъалгъунти дагъистанлантала арцлашал цIакь хIебиур. КIина-хIяйна вегIдешла поликлиникализиб бузути тухтуртачи дугьаизес набра кьадарбиуб. Илаб бузути хIянчизартани дурути багьнира дурхъати сари. Ила дугьаизурси зягIипсилизирад 10-15 минутла духIнар 1500 къуруш тIалабдиру. Дебали дурхъати дармунтала рецептра лукIа.
Республикализир дурадулхъути газетабазир чула хIянчи ахъси даражаличиб ва чули балу-хIебалути зягIиптачи уркIила ванадешличил хIеруди бирути тухтуртачила баркалала макьалаби дирар.
Чуйнара ветерантала госпитальла (гьанна ил больницалис Республикала медицинала центр бикIули саби) бекI тухтур МяхIяммадов Ибрагьим Уцумиевичличила дахъал гапла гъай аргъибтири.
Тамашала гIямрула ва бузерила гьуни ахъибси адам сай ил. 1976 ибил дуслизиб Ибрагьим Уцумиевичли ДГМИ-лизиб белчIуди таманбариб ва 1980 ибил дусличи бикайчи хирургли узули калун. 1980 ибил дуслизив лебил Россияла конкурсличив чедиикили, Казаньнизибси ГИДУВ-ла хирургияла ва онкологияла кафедрализиб хIянчи даимбариб. 1991 ибил дуслизив МяхIяммадов Ибрагьим Набережные Челны шагьарла больницализи халалгъуна хирургла ва онкологла хIянчи бузахъес живарили арукиб. 2001-ибил дуслизив дагъистанлан тухтур ил шагьарла онкологияла диспансерла бекI тухтурли катурсири.
Чуйнара Ибрагьим Уцумиевич Дагъистайзи чарухъахъес арадеш балтахънила Министерствола хIянчизарти дугьабизуртири.
2012 ибил дуслизив ил «РКБ» ДР-ла ГБУ-ла халалгъуна тухтурла хIянчиличи катур. Илини Германияла, Нидерландыла, Францияла, Израильла ва Америкала медицинара белчIунсири.
Республикала бегIлара халалгъуна больницала бузерира иларти шуртIрира Ибрагьим Уцумиевичли лутIи-хьулчилизирад гIяхIла шайчир дарсдариб викIалра, хатIа бетхIерар. Больницализирти лерилра отделениеби сагадариб, палатабала духIнарти куцагардиубти ваяхI, койкаби ва убуш-чебуш дарсдариб, зягIипти сагъбиахъес гIягIнити дармунтачил лерилра отделениеби гIердуциб, поликли­никабазиб ва больницабазиб бузути хIянчизартала алапабира гIяхIцадла ахъдуциб. 2017 ибил дуслизиб ДР-ла РКБ Россиялизирти арадеш балтахъути учреждениебазиб гIяхIти­гъун­тала лугIилизи каберхурсири. Ил дубурлан тухтурла бузери чебиахъуси ахъси кьимат сабри.
РКБ-лизиб 6 дус хIянчи барили гIергъи, сентябрьла 8-личив, лебил бузерила коллективла гьалав ДР-ла арадеш балтахъуси министр Жамалутдин ХIяжиибрагьимовли Ибрагьим Уцумиевичлис баркаллара багьахъурли, ил ветерантала госпи­тальла бекI тухтурла хIянчи барахъес вархьиб.
Илавра бамсри хIебалуси ва сунела бузериличи жигарчев­дешличил чекайзурси, урусуни бикIуливан «ВРАЧ ОТ БОГА» МяхIяммадов Ибрагьим Уцумиевич, зягIипти сагъбирахъес лерилра диэс хIяжатти шуртIри акIахъес сунела цIакьани хIябкадарили узули сай.
ХIера, сегъуна хабар бурибал гьаларван ветерантала госпи­тальлизиб сунела арадеш сагъбарибси Сергокъалала районна Кичи-ХIямрила шилизир хIеррируси Зулпикьарова Барият ХIябибовнани.
— Ну хапли зягIиприкира. Сер­гокъалала районна боль­ница­лизибти тухтуртани гьарра шайчирад ахтардирарили гIергъи, илдани электронный тяхIярла направлениеличил ну ветерантала госпитальлизи рархьира. Набчил рарх дахъал гIямру деркIибси дила нешра лерри.
МяхIячкъалализи аркьу­хIе­ли, нуша госпитальлизи кьа­булдирурав-хIедирурав ибти васвасъалара лерри. Игъбарлисван, больницализи дакIибхIели, ита-иша дурхьули хIедамсахъурли, терапевтический отделениелизи кьабулдарира. Ил отделениела халалгъуна тухтур Абдураупова ПатIимат МяхIяммадовнани нуша ахтардидарили гIергъи, зягIиптачи хIеруди бируси тухтур ХIяжиева ПатIимат Пахрудиновначи хъардарира. 10 бархIицадхIи, дила арадеш къулайбиахъести дармунтира процедурабира дирули, ил отделениела хIянчи­зартани наб къуллукъбариб. Илгъуна чебетаибси хIеруди бариб дила нешличира. Неш арадеш къулайбиахъубли хъули рархьиб, ну биалли хирургический отделениелизи шурратурра. Отделениела заведующая сарри А.МуртузагIялиева, набчи хIеруди бируси тухтур — У.ГIябдуллатIиповна. Илданира чеимцIякь ахтардлуми дурадеркIили гIергъи, лерилра анализуни больницала бекI тухтур Ибрагьим Уцумиевичлизи чедаахъилри. Ил палатализи вакIили, дила арадеш ахтардибариб ва ну операцияличи хIядурриахъес буриб.
Майла ахирличиб МяхIяммадов Ибрагьим Уцумиевичли наб операция бариб. Халаси замана хIебикили, дила чархлизирти декIти излуми больницализир датурли ва арадеш гIяхIцадла къулайбиубли, хъули дила хъалибаргличи чаррухъунра. «Больницализи руцахъес, лечение дураберкIахъес, операция барахъес арц дедлугути сарину хIечил дарх арцра каса», — бикIутири набзи. Илди лебилра хатIабикиб. Набзибад я нешлизибад цалра больницала хIянчизарли ца къуруш арцла тIалабхIебариб, цалра дарманра нушази хIесахъиб.
ХIурматла Ибрагьим Уцумиевич! ХIедра хIечил барх бузути хIянчизартасра набра, дила нешлисра, нушагъунти цархIилти зягIиптасра уркIила ванадешличил, бизити гъайличил, малхIямдешличил бируси къуллукълис халаси баркалла. Дурхъаси АЛЛАГЬЛИ гьаннала гIергъира зягIиптас кумекунани диркьахъес чIумаси арадешра сабурра хьурадараб! Арати ва разити, гIеркъати гIямру кьадардараб хIушабра хIушала хъалибаргунасра!