ВатIайс къуллукъличивси

Сентябрьла 5-личиб «Дагправда» газетала конференц заллизиб Ростовла областьла шайчибси Россияла ГУФСИН-ла начальник, духIнарти къуллукъунала генерал-майор Даххаев Муслим МяхIяммадович журналистуначил гьуниваиб.

Нушала республикализив М.Даххаев ибси фамилия хIебакьибси, яра ил чи саял хIебалуси адам хIергар. Или биалра гьанбуршехIе, Муслим МяхIяммадович акIубси сай 1962 ибил дуслизив Новолакла районна Новокули бикIуси шилизив. 1995 ибил дуслизиб Россияла МВД-ла юридический институт таманбариб. Ил «Россиялизибси такьсирти гьаргдирнила кабиз гьалабяхI башахънилизи пай кабихьни багьандан» бикIуси мургьила медальличил шабагъатлаварибси сай. Илини сунела гIярмицуначил барх халкьани-ургабти къачагъуни Хаттабла ва Басаевла бекIдешлиубти ярагъладарибти вайнукьабала кьукьнас къаршидеш дариб. Ил дергълизиб М.Даххаевли ши батахънилизиб къачагъунас къаршидеш дарницунра ахIи, дявила жигарла баркьудлумира акIахъубтири.
ИтхIели бахъли М.Даххаев ил дявлизив алхи сай или хIисаббарибсири. Амма илис ил жагьаннаблизирад сунелацунра ахIи, гIуррара гIяхIцад гIярмицунала жан дерцахъес имканбакIиб.
ГIергъити дусмазив М.Дах­хаев Дагъистайзирти духI­нарти къуллукъунала министрла заместительли узули калун. Илала бекIдешлиур арагълабиубти къачагъунала кьукьни агардарес гIяхIцад далдуцуни дурадеркIиб. Сунела хIянчизартани гIибрат касесли, ВатIайс мардешличил къуллукъбирули сай.