БиштIатас унза гьаргдариб

Сентябрьла кIиличир нушала республикала школабазир цаибти зянкъла тIамри черсаргъиб. Илдани нушала дурхIнас тамашала «багьудила улкализи» унза гьаргдариб.

Цаибси жуз, ручка, тетрадь, цаибси учитель — виштIасилис чула гIямрула дякьличи цаибти гунзри сари. Школализиб касибси багьуди гIямрула гьунчиб манпагIятсили, хъарихъли ва дагьрилис дякьли бетарар. Нушала биштIати дебали хIерли бирар ил бархIиличи. Цаибси бархIилизибад дигахъу сегъуна иштяхI алкIанал дурхIяла челябкьлала белчIудиличи. Марлира, дахъал къияндешуни дяхIяэс чебиркур бучIантас гIергъити вецIну цара дус. Багьуди касес гьамадсира ахIен. Багьудиличи, школаличи дурхIнала диги адилкьути сари цаибси учительницани. Ил школьникунас тянишсили ва гъамсили ретарар.
Лавашала районнизир ишбархIи 43 школа дузули сари. Ишдуслизиб азирличибра имцIали дурхIя цаибти классунази бакIили саби. Районнизиб цаибти къяяназиб саби МикIхIила шила лицей. Ишдус 34 дурхIяли чула белчIуди бехIбихьиб. Сентябрьла кIиличиб школала майдайчиб бучIанти, учительти ва шила шанти цахIнабикилри. Илдала ургаб декIарли чебаэс вирулри цаибти классунази чула дурхIни бурхьути бегIти. Илдас, чула ахIертас кьяйдали, уркIила хIялани гьалакдирахъуси бархIили бетарулири ил.
Цаибси белчIудила бархIилис хасбарибси линейка ибхьули, школала директор Ислангерей Дибирович Дибировли лебилра байрамличил мубаракбариб. Илини школала тарихличила, сархибдешуначила ва школализиб бучIули калунти, МикIхIила ши машгьурбарибти адамтачила гьанбушиб. Илкьяйдали челябкьлализир дарес гIягIнити хIянчиличила, плантачила ва акIахъубти сагадешуначила буриб. Лицей белчIудила дусличи хIядурбарахъес кумекбарибти адамтас, арбякьунси белчIудила дус гIяхIти кьиматуначил школа хъараахъурти дурхIнас ва илдала бегIтас баркалла багьахъур. Гьанна школализи чула цаибси ганз кацIибти дурхIнанира школала гIяхIти гIядатуни чихъли дихIниличи бирхауди бихьиб.
Илкьяйдали ванати дугьби дуриб шила администрацияла бекI ГIялибег ГIялибекович Сулайбановли. Илини баркалла багьахъур учительтас, чула асилси бузерилис. ДурхIнас белчIудилизир сархибдешуни далгун. Администрацияла шайзибад школалис кумекбарес мурталра хIядурли биъни аргъахъиб.
Шадлихъла линейкаличиб бахъал адамти гъайбухъун. Лебилра цауркIлири: ишбархIи багьуди гIягIнили биънилизиб, гIямрулизиб школала кьадри халаси биънилизиб. КIинайс цаибти зянкъ зайдухъун ва бучIанти чула цаибси дарсличи арбякьун.