ЗАМАНА - Жавабкардешличи витIакIиб

Августла 14-личиб МяхIячкъалализиб, ГI.Ахъу­шин­с­кийла уличилси кьакьализиб, дугила кьанси замана кахси анцIбукь кабикиб.

Дагъистанлан автоблогер, 19 дусла гIямрула жагьил адам МяхI­муд ИмангIялиевли сунела зилан урши машина хъя­чIаили вячIун. Дяхъи-хъаслизи викибси жагьил адам итмадан левси мерличив вебкIиб. Бурес чебиркур, вячIунси МяхIячкъа­лализи узес вакIибси Узбекистанна гражданин уилри — Сафар­гIялиев Умит СягIид-ГIяли-огълы. Пякьир, ил Дагъистайзи сунела бебкIа баргес вакIибсили увухъун. Сунелара ишаб бегIти, гъамси чилра агарси жагьил уршила хамха сунела узи-рузи бакIили, ватIайзи арбухиб… ХIера, вебкIибсиличила нушани далути илди баянти сари.
М.ИмангIялиев «instagram» бикIуси социальный сеть хIясибли, лебтанилра гIясиси ва машиналичил хъярхъти уюнти дируси шофер кьяйдали валуси сай. Илини гьундурачир урехи­лати вяшатIала дирули, хьурали башути урухбирниличил барх, гьундурала низам-кьяйдара дулъутири. Ил ДР-ла МВД-ла шайчибси УГИБДД-ла хIянчизартала шайзивад зумали административный жавабкардешличи витIикIусири. МВД-ла база хIясибли ахтардибарибхIели, М.ИмангIялиевли дусла духIнар 33-йна гьундурала низам-кьяйда дуун, ил багьандан илис протоколти делкIун, хIукмурти дурасиб. Амма бикIуливан, илини гIямрули сунес гьаладирхьути дурсразибад бекIли­биуб­сигъуна селра дурасес хIейуб. Даим низам-кьяйда дулъуси адамли ахирра-ахир сунечи лайикьси жазаъ бургуси саби.
М.ИмангIялиевла «instagram»-ла бяхIлизиб 60 азирличиб имцIали къулбасчиби леб, ва ила жагьил адамли сунела «чедибдешуни» лебтазилра чедаахъес гьаладирхьули уили сай. Сен-биалра, такьсирла делола чебкад дураберкIибси судличиб илини сунени барибсиличиб пашмандеш балахъули, ца анталра хIеиб. «Нуни барибси такьсир марбирулра, амма Интернетлизир набчила дурути дархьти ахIен», — илди дугьбицун сарри жагьил адамли дурес виубси жумягI бархIи августла 16-личиб бетерхурси МяхIячкъалала Кировский районна судличир. Ил гьундурала низам-кьяйда дуънилизив, сахъдеш дакIу­хIедарили адам вебкIахънилизив гIяйиблавирули сай (3-ибил бутIала РФ-ла УК-ла 264 ибил статья хIясибли). Судли илала шайчир дурадеркIибти къадагъала далдуцуни хIясибли, ил кIел базлис ухIнакаили сай.
Следователь МяхIяч Ибрагьимовла гъай хIясибли, МяхIячкъа­лализи узес вакIибси ва машинали вячIунси, 19 дус виубси жагьил адамличила баянти гьачамлис кахIесили лерал, илала тухумти чула ватIайзиб биъни багьандан. ГIяйиблавируси М.ИмангIялиев такьсир дураберкIили гIергъи вебшниличила бурути баянти агара. Судья Мурад Баркуевли следствиели гьаладихьибти материалти делчIун, илди-ургаб уцибсили низам-кьяйда (закон) дуъниличила справка, участковыйла шайзибадси характеристика, сунезибра гIяйиблавирусини сунес диганта виркьули гIямру дуркIниличила буруси. М.ИмангIялиевличи чедирхьути закон булънила шайчирти лерилра гIяйибти машина бикниличил дархдасунтири. Автотранспортличир низам-кьяйда дулъни багьандан жагьил адам 15 бархIилис ухIнакаибси уилри. Ил ухIнакаили хьалли, илизибад селра дурасили уили ахIен.
Краснодарлизив булан илини гьундурачиб закон буунсири ва административный жавабкардешличи витIакIибсири. Илабси стадионничиб М.ИмангIялиевли сунела машина кьарла майдайчи арбукили, гьабяхъибсири ва полицияла хIянчизартала тIалабуначи мутIигIхIекIили, низам-кьяйда дуунтири. Иличи 10 азир къурушла гIякIа чебихьибсири ва чумал базлис машина бикнила ихтиюртазивад мяхIрумварибсири. Илкьяйдали полицияла хIянчизартани М.Иман­гIя­лиевлизибад машинала гьаларти улкьайтазирад цIябти ранг урасахъес тIалаббариб, амма ил лехIхIейзур. УГИБДД-ла хIянчизартани иличил гьундурачиб мяхIкамдеш бирахънила шайчирти ихтилатуни чуйнара-сера дурадеркIиб, иличи хIерхIеили, илини гьундурачир низам-кьяйда дулэс даимвирулри.
Прокурорли буруливан, гьачамлис гIяйиблавируси М.ИмангIялиев сунени зарал барибси ва вячIунси адамла бегIтачил баришвиъниличила, илдас сунени барибси зарал чебицIахъниличила бурути баянти агара. Тухумтира чихъали сабил кабизахъурли ахIен.
ГIяйиблавирусила ихтиюрти далтахъуси адвокат И.Исрапи­ловлис М.Иман­гIя­лиев хъулив туснакъварахъес дигули калун, амма судьяли лерилра гьаладихьибти документуни дяркъурли гIергъи ил гIевхIевциб. Адвокатла гъай хIясибли, вебкIибсила тухумтас арц дедили, илдас барибси зарал чебицIахъили саби. Адамла гIямру къябдердахънила зарал арцличил секьяйдали чебицIахъес вируси?
М.ИмангIялиев такьсирличил дархдасунти лерил аги-кьяйда ахтардидарайчи, ишдусла октябрьла 14-личи бикайчи туснакъ­лизив кавлан. Такьсирла чебкадси дело даимбирули саби.

 

Прочитано 173 раз

О нас

ЗАМАНА . 0+. Учредитель: ГБУ РД ''Редакция республиканской газеты ''Замана''. Главный редактор: 
 
logo na foto     Фотографии с маркировкой
взяты из открытых источников
 

СМИ

Сайт “Замана” (www.zamana.info), зарегистрирован Федеральной службой по надзору в сфере связи , информационных технологий и массовых коммуникаций . Свидетельство о регистрации средства массовой информации Эл № ФС77-67486 от 18 октября 2016 года..

Контакты

Адрес редакции: 367018, Республика Дагестан, г. Махачкала, пр-т Насрутдинова 1А.
Тел: 65-00-25.  E-mail: Этот адрес электронной почты защищён от спам-ботов. У вас должен быть включен JavaScript для просмотра.
 
fa  in  ok  vk  yt  rss
Top