Мез – халкьла та­рих­ли­зи хал­ди­рути са­ри. Мез – адам­ти культурала гьа­ла­бяхI ар­букь­­ни­ла лишан сари. ВегIла мез дяркъни – ца иткъи илди ба­гьаналис сен-биалра кам-хъяш­ли дагьницун ахIен­ну, ил­дала кьадри аргъили, мурхьли дяркъурли диэс гIягI­ни­ти сари гьарилли ва дурхIнази илди да­гьа­хъес чебла са­би бегIтала, школала ва учи­тельтала.

Паргъа­тд­еш хIебалуси, тамашала дарган хьунул адам рузули сари Мя­хIяч­къала шагьарла багьудила Управление­лизир. Ил сари Рабазанова Рукьият Аба­кар­хIяжиевна. Илала зянкъли ну гьалаксаахъурра.
– Лерилра миллатунала писательтазира багьахъурли, илдира бучили хIура ракIи нушала балбуцличи, – рикIар. Ил балбуц шагьарла миллатунала назмуртани ва хабуртани лукIути учительтазибад цалабикибси кьукьяла сабри.
Чумал дус ну Рукьиятличил гьалмагърикибсира. Илала цалра зянкъ нуни бацIли батурси ахIен. Илала гьарил жилис рашусира.
Марлира шагьарла жура-журала школабала гIяхIцад учительти цалабикилри. Ил­ди декIар-декIарти миллатунала лукIан­тира сабри.
«Поэзияла зайдикIути ги­ми» – илгъуна у бедили, илдала цахIнабси жузра дураилри. Ил балбуцличи чумал поэт дя­кьунра. Ярга-яргали учительтани чула назмурти, хабурти, очеркуни лехIирхъутас делчIун. Школабала директорти, миллатунала газетабала хIянчизарти гъайбухъун, лебтанилра чула пикруми дуриб.
17 ибил школала дарган мезла учительница Хамисла ва 42 ибил школа­ла учительница Зубайдатла наз­мурти чедетаахъили делкIири. Илдас ва цар­­хIилти миллатунала учительтас диплом­ти дедиб.
Гьайгьайра, нушала «Лачиннизи» назмурти дихути учи­тельтира леб. Илдазибад саби Хамис ва Зубайдат, леб цархIилтира. Илра вегIла мез дигахънила лишан саби. ДГУ- лизи цалабикиб миллатунала мезла дурсри кадирхьути преподавательти – гIялимти, студентуни ва шагьарла школабала учительти. Халкьани-ургабси мезла бархIила шадлихълис хасбарибси балбуц сабри илра.
Мезла кьадриличила гIяхI­цад гъай детаур иларра студентунала ва учительтала ургар. Жузала ва вегI-вегIла миллатунала культуралис хасдарибти майдунти декIар-декIарли чедаахъиб, берклуми, палтурти хъали-цIала ваяхI, викторинаби. Илгъуна балбуц дураберкIахъесра халаси къайгъи ва гIяхIцад хIянчи барибси Рукьият сарри.
– Илдигъунти далдуцунани адамти-ургарти уржибдеш, узидеш ва миллатунала мезличи диги имцIадирахъули сари, – рикIар Рукьият Рабазанова. – Дагъиста миллатунала мезла дурсри кадирхьути учительтала архIяби-гьунибаъниби лер­гIер дахъал сари. ХIера, март базлизиб Ханты-Ман­сийс­клизиб халкьани-ургабси «Рос­сияла дахъхIила миллатунала халкьанала мез руркънила шайчибси мажлис» бетерхур. Ил мажлисличиб докладунала чебкад гъайбухъун МяхIячкъалала школабала учительтира. Дигеси сабри, 53 ибил школала ва 9-ибил лицейла дарган мезла учительница Ибрагьимова Нарижат ХIяжиевнала хIянчи чихъли кьиматлабарни. Илини цаибил даражала диплом сархиб.
Дагъиста Огнилизирра мезла учительтани бутIакьяндеш дариб. Илаб пикрибарибсири мез руркънила центр акIахъес ва акIахъуб, ил бузули саби бу­ся­гIятра шагьарла багьудила Управле­ние­л­изиб.
Рукьият Рабазановала къай­гъ­на­чиб­ли учительти-ур­гар тотальный дик­тантуни, дурхI­ни-ургар конкурсуни ду­ра­дуркIули сари. Шагьарла шко­ла­­базир мез руркънила кабинетуни акIахъесра ди­ректортачил хIянчи дурабуркIули сари. Мез гьаладяхI дашахъес дирути къайгънала сархибдешунира лер. Лебил Россияла олимпиадабачир ученикунани чуйнара гьаларти мерани сархиб. Цаибил даражала дипломти сархиб кIарахъала мезла назмурти делчIунти авал дурхIяли, кIел дарган дурхIяли, къумукъла, булугунала ва лезгибала дурхIнани.
Миллатла политикала министрла хъарбаркь хIясибли «Мез руркънила асарли этнокультурала давла имцIабикIахъу» бикIуси темала чебкадра мезанала учительтани докладуни хIядурдариб ва гIялимти, писательти илдачил тянишбариб.
Дагъиста халкьла поэт Р.ХIям­затовли гIуррара гIяхIил бурибсири: «ЖагIял дила мез дубкIни баласри, ну ишбархIи вебкIес хIудурлира».
Бахъал гIялимтани, машгьурти писательтани мез мяхI­камдирниличила чула пикруми ункъли делкIун. Республикализир дахъал мезани лерни – ил миллатунала халаси давла саби. Дагъиста халкьанала мез хIедебкIахъес, илди давлачердикIахъес, халатазирад дурхъаси аманатван гIур алкIутачи даахъес ва гьарил миллатла адам сунела мезличил гъайикIахъес Рукьиятгъунти паргъатдеш хIебалути, ил къайгъилис чула заманара, гIямрура, цIа­кьра харждирути лебти биалри иш­бар­хIи, нуша ишцадра цIумхIедикIира. Хаслира гIялимти, писательти.
– Библиотекабазир жузи бекIнадли ка­дихьили, садир­хъу­силра агарли, хясали­ кIапIдарили сари, – рикIар ца нуни ра­луси гIялим. – Мез детихънила урехи ха­лабикIули саби гIергъиси замана, сен­кIун школабала дурхIни бучIахъес чумал дус жузи дураили ахIен. Учительтанира мягIничерти дурс­­ри кадирхьули ахIен, ца­цадехIти школабазир дурсри лер расписаниелизи делкIи, дурхI­ни дурсрачибад хъули бур­хьули саби.
Мез дагьахъес къайгъни камли сари. Нура илди анцIбукьунала бикьри ретаурлира. СенкIун нушала журналти къулбасдарахъес мурталра учительтачи, дурхIначи дугьарилзусира. Илгъуна хIян­­чи дураберкIесра гьамадли ахIен. Леб­гIеб камкабиубли саби мез дагьахъес ди­гути. Хъулиб бегIтира хала нешанира дурхI­нази урус мезли гъайбикIули саби. Ца ишгъуна бетаурсиличилара белкIес дигулра. Хала бархIила байрамла замана дила дурхIяла дурхIяли сунечил барх чумал гьалмагъ хъули киб. Нуни илди савгъатунира дедили, кухнялизи букахъес кабатурра. Чиди миллатла сабил илди, чула мез далулил багьес хьулриубра. Жура-журала миллатунала дурхIнири илди, амма цалилра нешла мез далули ахIенри. КIел урши къумукъланти узби сабри.
– ХIушаникIун мез дагьес гIягIнилигу, – рикIулра, – къумукъла (туркла) мезли байхъалара-сера дунъя гъайбикIухIели, хIушанира дагьес чебиркур, нуни илдас чула мезла «Лачин» журналтира дедес дигусири, амма, сепайда…

Илала ДУРХIЯДЕШ
ВА БАГЬУДЛУМАЗИ АРАЦIНИ
Ил акIубси сари Сергокъалала районна Мургукла шилизир.
Дудеш Рабазан Абакар­хIя­жиев «Рубас» турбазализив зав­хозли гIяхIцад замунтазив узиб. Неш Салимат Кьагьиро­ва туке заведующая сарри. Ил­дала бахъал дурхIни акIуб: урегал рурсира ца уршира. Итди замунтазиб бегIлара кьиматлабируси давла – багьуди сабри. ДурхIнас багьуди бедес гIяхIцад къайгъни дакIудариб бегI­танира. Рабазайчи сунела хIянчи хIя­сибли, дурабад, ши­мазибад, районтазибад гIяхI­цад адамти – гIяхIли башутири.
Сарерхурси ва багьудлумачи­ регI­риэс къайгъичерси Рукьият шко­лализир «шула» кьиматуначил ручIусири ва илис Огнила «Дубурлан рурсбала интернат» таманаэс кьадарбиуб.
Илала гIяхIцад гьанбикуни лер ил интернатличила. Бурули сари, Малкин Георгий Алексеевич – чевяхIси учитель сайри или, илала астрономияла ва физикала дурсрас шулаби кайсули рираси или. «Ил шко­лала гьарра шайчивадси организатор сайри. Ил халкьла учитель вири, ТОКС-ла хIянчи бузахъи, пергер педагог ва вегIла мер-муса руркъяхъи дурхIнази. Булач ХIя­жиев­ла гьалмагъ вирусири ил. Нушала дурхIнази гьарра шайчирти багьудлуми касахъес къайгънази гIелайкибсири. Интернатли набзирра спортличи диги акIахъуб. Дила гIямрулизиб ил школа гьарли-марли ну чIумарарибси, мезличи дигили рицIахъибси школа бирусири. «Шула» кьиматуначил нуни таманаира ил. Илар касибти багьудлуми бусягIятра наб пайдалатили детаурли сари. Итди замунтазиб багьудила кьадри халасири. Дила рузби Раисатли ДГПИ-ла филологияла факультет таманаиб ва ил Хайдакьла районна Маллакентла школала организатор сари.
ПатIиматли ункъли школара ДГПИ-ла­ хи­мико-био­логияла факультетра дел­­чIи, гьан­на илар кафедрала доцент са­ри. Ся­гIи­д­ат ва Максалина тухтурти са­би. Узи – МяхIяммад ДГПИ таманаили, Мя­­­хIяч­къа­лала ванзала комитетлизив узу­ли сай.
Нунира ДГПИ-ла филологияла факультет «шула» кьиматуначил таманаира. Лавашала районна Кьакьамахьилизир завучли рузира. ГIямрули ну Днепропетровсклизи ретаахъира. Украинала халкьли чула адамтазирад декIархIерираси. Илдачил дила гIяхIти гьалмагъдеш детаур. Школализир рузес рехIрихьира урус мезла ва литературала дурсри кадирхьули. Гъал дусра-сера рузира илар. Дяркъурра Украинала мезра. БусягIятра илдала мезра далуйтира далас. Чаррухъунра ахирра МяхIячкъалализи. Ишаб набчи багьудила отделли миллатунала мезла методистла хIянчи хъарбариб. Ну лергIер тамашариубра чула мез дяркъяхъес дурхIнази сегъуналра къайгъни дакIухIедирухIели, методикала пособиеби, жузи, дурсри кадирхьути специалистуни аги. Илгъуна бурес хIейэсли къиянси хIянчи набчи хъарбариб. ИлхIели ил лайикьси даражаличиб тIашбатахъес чедибти хIякимтала кумек хIяжатлири, ил багьандан ну шагьарла бекI СягIид Амировличи арацIира, жура-журала масъулти арзахъес кумекбарахъес. Ил адамли дила уркIиличи тамашала асар бариб.
– ХIугъунти адамти нушаб гIягIнити саби, вирхулра, хIу­ни­цун рируд ил хIянчи лайикьси тяхIярли бузахъес, хIед кумекбарес нура хIядурлира, – иб илини.
Гьарли-марли, шагьарла шко­­лабази рухI­найхъули, тянишрирули директортачил, тIа­­лабдирули мезла дурсрас хIя­жатти ка­бинетунира гIягI­ни­ахъ­­лумира, гьан­нара ил хIянчи бу­­захъес дила гIямру харж­ди­рул­­ра.
Амма СягIид Амировли наб­чи барибси асар гIямрулис хъум­хIертис. Илцадра сунела мил­латла халкьла культурара мез­ра мяхIкамдируси адам сайри ил.
ИтхIели МяхIяммадмирза ХIямза­е­вич сайри нушала багьудила Управлениела начальник, илинира ну гIерруцира».
Марлира, Рукьият Абакар­хIяжиевна сунела ВатIанра, мезра, культурара дерхъахъес гIямру булан харждарес хIядурси адам сари.
Илала бузери хIукуматлира кьиматлабариб.Школализир, институтуназир ручIу­хIей­чи­рад касибти грамотаби, дип­ломти дахъал сари. БегIлара дур­хъаси шабагъат «РФ-ла багьудила хIурматла хIянчизар» саби.
Бурес дигулра, халалгъуна ша­багъат илала, мезла учительтала, илдачи диги адилкьули, сай-вегIти нешла мез руркъути дурхIнала шайзибад халаси баркаллала дугьби, уркIи-ур­кIи­ла­рад илис дурути балгни сари.
Амма Рукьиятла гIямру­лизир пашманти анцI­букьу­ни­ра кадикиб. Илала къакъбяхъ, отличноли ручIуси, лер­гIер жагаси рурси лерсири, сунес­ра ГIяйшат бикIуси. Ил зягIиприкили, Рукьият хIе­ра­ибси больница ва тухтур­ти кахIелун, амма рурси гIям­ру­лизирад шалгIеррухъун. Илгъуна агрили Рукьиятличи хъумхIертеси асар бариб, ам­ма бузери даимбариб ва хIян­чилизир чIумариуб.
Илала пергер уршира лев МяхIям­мад бикIуси набтла-газла промышленостьла хIянчилизив узуси ва рурси Магдалина, шел уршила неш.