ЗАМАНА - ГIямруличи гьуцIбиру
ГIямруличи гьуцIбиру

Агь, севан къияннил сукъурти яра гӀянцаби адамтас хӀербирес! Я берхӀила нур чехӀебиули, я адамла гъай хӀедикьули илдас гьамадли ахIен шаласи дунъяличив цархIилтачил вархли вяшикIес.

Сецад къиянни ва пашманни сабил илдигъунти биштӀатасра хӀербирес. АкӀубхӀелил илдас дунъяла разидешуни, нигIматуни кьяпӀдарили сари.
Амма илди адамтала гIяшулван чӀумаси, къияндешуначи мутIигIхIебикIуси уркӀила цӀакь леб. ЗугIлумачи хIерхIеили, илди хӀеркабирули саби, ва гьарил ара-сагъси адамли ахъес хӀейруси гьунира ихъули.
Ил шайчиб гӀячихъси мисал чебиахъули сари Россияла рурибси гӀяртистка, ЖамигIятла палатала хъалибаргуни, биштӀати ва нешдеш гIердурцуси комиссияла председатель Диана Гурцкаяни.
Илини, алкӀубхӀелил сукъурси риъни багьанданра, цархӀилтаничирра гӀяхӀли иргъули сари илдигъунти аги-кьяйдализи бикибти биштӀатала даража-хIял.
Ил гьаларван Дагъистайзи ракӀиб ва нушала Дагъиста БекӀ Владимир Абдуалиевичличил къарширикиб. Д.Гурцкая бегIти агарти ва гIямрула къиянти шуртIрази бикибти биштӀатас хасбарибси 4-ибил школа-интернализира гьарракIиб.
«Нуни ишбархӀи пергерти биштӀати чебаира, ва илдачил дяхI-дяхI­ли къарширикес бикнила анцӀбукьличира дебали разилира. Наб­чигъунти къияндешуни ва зугIлуми чедуркъили сари илдачи­ра. Амма, чи сейкIалра, наб дила гӀямру дигахъис сари лертиван. Иш­бархӀи дила имканти гьатӀира имцIадиубли сари. Наб гьарил виштӏасилис рирусигъуна кумекбарес дигулра чула пикруми-кьа­сани гIямрулизир детерхахъес багьандан», — багьахъур Д.Гур­ц­каяни.
Дагъиста БекIлира илала баркьудлуми цархIилтасра гIяхI­си гIиб­ратли бетарниличила буриб: «Ну дебали разилира хӀу­гъун­ти уркӀецIичебти адамти лебниличи, биштӀатала гӀямру гӀяхӀ­духъахъес нушаб халаси кумекбирути. Ил халаси керира саби. Баркалла хӀед».
Гьайгьайрагу, биштIатас чучи ванаси хIерли хIеризурси, мурили гъайибси адам дебали дигахъу. ГьатIиралра гIяхIбилзан илдас бахъла ургар машгьурдеш сархибтачил ихтилатбикIес, сабира илдигъунтили бетаэс илди мурталра къайгъилизиб бирар.
Дила пикрили, Диана Гурцкаяла биштIатачилси гьунибаънили илдала гIямруличи хIерани дарсдирахъу. Сецад илдас гьалабизуни алкIалра, къияндешунас мукIурхIебакIили, гьалабяхI башесра гьуцIбикIар.

 

Прочитано 319 раз

О нас

ЗАМАНА . 0+. Учредитель: ГБУ РД ''Редакция республиканской газеты ''Замана''. Главный редактор: 
 
logo na foto     Фотографии с маркировкой
взяты из открытых источников
 

СМИ

Сайт “Замана” (www.zamana.info), зарегистрирован Федеральной службой по надзору в сфере связи , информационных технологий и массовых коммуникаций . Свидетельство о регистрации средства массовой информации Эл № ФС77-67486 от 18 октября 2016 года..

Контакты

Адрес редакции: 367018, Республика Дагестан, г. Махачкала, пр-т Насрутдинова 1А.
Тел: 65-00-25.  E-mail: Этот адрес электронной почты защищён от спам-ботов. У вас должен быть включен JavaScript для просмотра.
 
fa  in  ok  vk  yt  rss
Top