БусягIятла заманара нушала улкализиб дебали ибкьси аги кабизурли саби, тарихла игитлати бяхIянала лугIи имцIабикIули саби. ГIяхIцад дубурлантани Украинализиб бетурхуси Россияла дявила хасси балбуцлизир бутIакьяндеш дирули сари. Нушала бургъантани, саби гIяхIъулали арбякьунтани саби ВатIа марти ва асилти уршби биъни гъайличибли ахIи, баркьудлумачибли чебиахъули саби. Илдани дагъистанлантачи хасти къиликъуни дакIудирули, дявила чебла ункъли таманбирули саби, нушала хала дудешунани ЧебяхIси ВатIа дергълизибван. Халаси наслули хIурмат-кьиматличил кахси дергъла дусмала лерилра къияндешуни ахъибтири. ИшбархIи сагаси наслулира илдала игитлати гьунарти даимдирули сари.
Россия тIабигIятла сурсатуначибли давлачебси, дахъал миллатуначилси, халаси цIакьличилси улка саби. Ил мискъилладибарес дигути Западла улкнани гьаман чябхъинти дурадуркIули, нуша паргъатагардирулра. Нушани ахIенси гIур чили балтахъуси нушала улка, илкьяйдали республикара? Ил багьандан сари дагъистанлантанира СВО-лизир бутIакьяндеш дирути, илдала лугIилизив – Сергокъалала районна ГIяялизимахьилизивад сай гIяхIъулали арякьунси Мурад МяхIяммадовлира.
Мурадли ишдусла январьла 30-йчирад СВО-лизир сагадан бутIакьяндеш дирули сай. Илини бурни хIясибли, ириъ саби гIяхIъулали аркьутачил варх вякьи, чарухъунсири. Сунела рота бурхьухIели, шайчив калес хIейубли, ишдусра арякьун.
Мурадли 2011 ибил дусличибад Росгвардиялизиб къуллукъбирули сай. Ил школализив учIухIелил ВатIайс къуллукъбирисра или пикриикIусири. Сунела кьас гIямрулизиб бетерхахъурли, РФ-ла гIяскуртазиб къуллукъбирули сай.
— ХIуни сегъуна масъала гьунчибиркахъулри? — ибси суайс: — Дявила гьалмагъуначил барх ДНР-лизибси Старобешевский районна жамигIятлис урехи хIебирахънила ва иларти низам-кьяйда далтахънила, — жаваб чарбатур Мурадли.
Сай гIяхIъулали укьнилис Росгвардияли Мурадлис «Дявила хасси балбуцла бутIакьянчис» ибси медаль бедиб. Ил разведчик ва сапёр сай, ил багьандан чидил-дигара замана гьаркьятала къяйлизи живаресра асубирар. Гьайгьайрагу, Мурад иличи хIядурли сай.
Нушани гьар бархIи дагъистанлантала гьунартачила бикьулра. ХIулбала гьалаб дагла гIядатлати дурхIни ишбархIи игитуни бетарули саби. Чидил ургъанничил ихтилатбараслира, гьарилла уркIилизиб халаси цIакь, яхI, чедибдеш сархниличи умут лебниличила иргъулра. Илдигъунти адамтала гIяхIдешличибли саби нушаб азадли хIердиэс ва бузерилизи ахъес имканбикIуси.
Улкала Президент В.Путинни гIярмияла гьалар тIашдатурти масъулти ункъли гьунчидиркахъути лебилра бургъантас баркалла биаб! Нушани гьарилличи халаси пахрубирулра. Дявила хасси балбуц гъамси заманализиб таманбиахъес ва лебилра мурул адамти чедибдешличил чула хъулрази чарбухъахъес дулгулра.
…Баркьудлумачибли чебиахъули саби
- Автор ПатIимат Мирзаева
- 25 апреля, 2023. Вторник 11:56
- ||||
Нушала цаванзалантани гьачамцун ахIен ВатIайчи диги чедаахъибти – дигалли азадси бузерилизир, дигалли дявила майдайчир. Къияндикибси замана, васвасъала агарли, неш-ВатIа хъархIерагардеш батахъес шанда баруван кабизурти гъубзнала гьунартачила нушани сеналра хъумхIертехIе. Лебтасалра ашкарливан, дурхIни биштIали лебай гъабзадеш дакIудирахъес, къияндешунас мукIурхIебикIахъес, ВатIан дигахъес, илис мартили бирахъес руркъути саби, хаслира нушала республикализиб.
Фотографии с маркировкой
