Гьалмагъдешла гумили бетаур

2015 ибил дусличибад художествола «Пе­рекрёсток» цалабяхъли ва «Реноме» журналли ле­бил Россиялизир 11 ха­ла­ти выставкала проек­ту­ни дурадеркIили сари.

Ил­ди­ дусмала духIнар 50 азир­ли­чибра имцIали адамли Тверь­­лизибадти, Тверьская об­ласть­лизибадти ва Москва­ли­зибадти 200 худож­ник­ла суратуни чедаили сари. Гьанна дагъис­тан­лан­тасра илдачил тя­нишбиэс имканбакIиб.
МяхIячкъалализиб Поэз­ия­ла Юртлизиб апрельла 11-ли­чибад 13-личи бикайчи «Арт-Перекрёсток: Дагъистан – Верхневолжье» бикIуси проект бетерхур. Илала дазурбазиб, Тверская областьлизибадти маш­гьурти художникунала суратуни гьаладихьиб. Арт-проектла жи саби «Волга хIеркI­ла хъарличибад — Кас­пийск­­ла урхьуличи».
Проектлис бекIдеш­дирул­ри биштIатала писательти, «Реноме» журнал акIахъубти Вячеслав ва Нина Метлиныхъалани. Балбуц ибхьули, Н.Метлина заллизи кабиибтачи гьалмагъуни или дугьаризур. Илкьяйда рикIулри республикала адамти илис дебали гIяхIбизурхIели. Илини дагъистанланти гIяхIли дигахъути, гIяхIти гIяхIялдеш дарес къалабати пергер адамти саби или буриб. «Дагъистайзиб илцадра разили нушаб гьунибиур или гьанхIебикиб», — рикIи ил.
Суратунала выставкабачи ба­кIилри ДР-ла Правительст­вола Председательла Цаибил заместитель А.Карибов, ДР-ла информатизацияла, барх­­басла ва дахъал коммуни­кацияла шайчивси министр С.Сне­гирёв, ДР-ла писательтала Союзла председатель М.ГIяхIмадов ва цар­хIилтира. Поэзияла Юртлизир гьаладихьилри В.Ва­си­льевла, В.Ивановла, О.Ан­дреюкла, Ш.Джу­ма­лиевла ва цархIил­талара суратуни. Суратунани асар хIебарибси цалра кахIелун.
Балбуцличив гъайухъунси А.Карибовли, нушала респуб­ли­кализиб проект дура­бер­кIес пикрибарнилис баркалла багьахъур.
«Дагъистайзи хIуша дакI­ни­личи нуша дебали разилира. Нушани художникунала халаси хIурматбируси саби. ХIушала проект Дагъистара Тверьская областьлара ургабси гумили бетарули саби. ХIушала бузерилизиб сархибдешуни диаб», — викIи ил.
Проектла сиптакарти ил мягIничебси балбуцли культуралашалси гьалмагъдешла гуми гьунчи­бир­кахъниличи бир­хул­ри. Илдани, челябкьлали­зиб, Дагъиста художникуни чула ванзаличиб кьабулбарес пикрибариб.