Олимпиада багъишлабарибсири Расул ХIямзатов акIубхIейчирад 100 дус диркнилис. Жюрила бутIакьянчибани ил хIяракатлис ишгъуна ура бедилри: «Расул ХIямзатовла творчестволизиб Дагъистанна халкьанала гIядатунала масъала».
Олимпиада хIябал журала абзаназибад цалабикибсири: творческий тяхIярла белкIла хIянчи, чевяхIси поэтла гIямру, творчество дяркъни ва чедаахъибти тестанас дархьти жавабти дурни.
Дахадаевла районнизиб бетерхурси муниципалитетла краеведениела конкурсличив ХI.Сулайбановла уличилси КIишала урга даражала школала 8-ибил классла учIан МяхIяммадбяй ЯхIъяев 1-ибил мерличи лайикьикибсири, ва ил багьандан ил республикала региональный олимпиадаличира живариб. Дагъистанна рурибси учительница, РФ-ла Президентла Грант сархибси Бурлият МяхIяммадовани, историяла ва краеведениела учительница сарливан, сунела учIан МяхIяммадбяй ункъли хIядурвариб. Ил илизи махрикIусири:
«ХIу МяхIячкъалализи ца ити живарибси ахIенри. Илабси олимпиадаличибра чедибдеш сархили дигахъира. ХIечи лебил школали умутбирхьули саби. Чебаахъа хIела пагьму!..»
Бурлият Ибрагьимовнала бучIанти, районнизирра республикализирра чедибдешуни сархули, гьар дус декIарбулхъути саби: иличибли илдани учительницала къиян-хIекь мардирули сари.
Иш яргалисра думжар дурхIни-ургарти жалти: гьайгьай, гьарил дурхIялис чедибдеш сунела бетаурли дигулри. ЛебгIеб лайикьси балбуцли уббухъун, комиссияла члентани дурхIнала руководительтира жавабтачи лехIбизахъес батни: илгъуна ихтиярли чула хIянчира умули биъни белгибирулри.
МяхIяммадбяй ЯхIъяевли хIябалра абзлизир чихъти багьудлуми чедаахъиб ва сунела ахирличиб буруси гъай Р.ХIямзатовла дугьбачил таманбариб: «Дила биштIаси миллат – дила чебяхIси миллат!»
Сеннира М.ЯхIъяевла чумал балл камли урдухъун, ва илис 2-ибил мер лайикьли биъни аргъахъиб. Юх, ил камси гьунар ахIенри, ил халаси сархибдеш сабри: арагIеб республикала бучIанти-ургав дубурлан урши илгъуна пагьмуличил декIарухъни дигеси анцIбукь сабри.
Дигахъира ахIмакь учIан хIядурварибси учительница Бурлият Ибрагьимовнасра уркIи-уркIилабад баркалла багьахъес.
Устадеш чедаахъиб
- Автор Ибрагьим Ибрагьимов, Сурат – Б. МяхIяммадовала
- 30 марта, 2023. Четверг 09:07
- ||||
Гьалабван ДР-ла «ДурхIнала пагьмурти гьаладяхI дикуси Альтаир Центрлизиб» краеведениела олимпиада бетерхур. Ила нушала республикала пагьмучебти дурхIни ва илди къелгIеббикути руководительти цалабикиб.
Фотографии с маркировкой
