Илдачила хъумартес асухIебирар

МикIхIила шилизир маш­гьур­си гIялим, профессор, филологияла гIилмуртала доктор, тилмаж, гIилмула дахъал хIян­чурбала автор, журналист Мя­хIяммадшапигI ГIялиханович ГIи­саевла хIурматлис шила спортла школализир волейболла шайчирти абзани детерхур. Базла бехI­би­хьуд­личир рурсби-ургарти абзани детер­хуртири, илдачила нушани белкIра бел­кIунсири. Иш гьакIлис уршби-ургарти абзани детерхур. Аб­заначи районна дахъалгъунти шимала школабала бучIанти гIулухъабазирад цахIнадяхъибти командаби дакIиб.

МяхIяммадшапигI ГIисаевли дурхIнас бяркъ ва багьуди бедес багьан­данра, халаси хIянчи барибсири. Илини хIядурдарибти жузачил даргала мез руркъутири. Дахъалгъунти сунела бузерила хIянчурбира гIялимли сунела нешла мез дяркънилис, ил шайчирти хIялумцIлабас хасдарибтири. М.ГIисаевли дураибсири биштIаси дарган мезла ва урусла словарь. Ил пайдалабирули, бахъал мугIяллимти ва гIялимти гьаннара бузули саби.
ГIялимла бекIдешлиур Дагъистан Республикала ГIилмула академиялизиб халаси словарь дураэс багьандан, халаси хIянчи дурабуркIусири. Сепайда, МяхIяммадшапигI ГIялиханович мицIирли левай ил барес имкан хIебакIиб. Ил бехIемцIлизи викили, жявли гIямрулизивад арякьунсири. Словарьла шайчир хIянчи даимдарибтири иличил барх бузули калунти гIялимтани, илала юлдашунани ва студентунани.
ДурхIнала ургарти абзани ибхьули, гъайрухъун МикIхIила шила искусствола ва музыкала школала директор ПатIимат Адзиевна Адзиева. Илини цалабикибтази М.ГIисаевличила буриб. Илала хъалибаргла ва шила жамигIятла шайзибад турнирлизир бутIакьяндеш дирутас баркалла багьахъур. ГIядатли бетаурливан, ил журала абзани МикIхIила шилизир искусствола школала вакилтани жагати делхъличил дехIдирхьутири. Буралли, ПатIиматли бекIдеш дируси школали халаси хIянчи бирули саби, дурхIнала пагьму белгибарес, илдала искусствола шайчирти дигIяндешуни гьаргдарес. Гъай музыкаличилацун ахIен. Школализир декIар-декIарти кружокуни лерти сари. Дусличи-дус ила башути дурхIнала лугIи имцIабикIули саби.
Абзани жигарчерли детерхур. ДурхI­нани, чедибдеш сархес багьандан, чула лебилра цIакь ва гъира волейболла майдайчир датур. Иш гьакIлис цаибил мер сархиб МикIхIила шила командали.
Командаби хIядурдарес багьандан, халаси хIянчи бариб илдала тренерти Идрис ХIясановичли ва ПатIимат МяхIяммадовнани. Спортла школала директор Чамкур Чамкуровли буриб: «Нушала бекIлибиубси мурад саби чеалкIуси наслу бяркъес, илди багьудиличил гIеббуцес ва аратили биахъес.
ДурхIнала ургар даршудеш ва балгундеш адикьес хIяжатли сари. Илис сабабли детарар ишбархIи нушани дурадеркIибти абзани».
Абзлизир бутIакьяндеш дарибти ва чедидикибти командабас декIар-декIарти савгъатуни, медальти ва грамотаби дедиб. Цаибил мер сархибси командалис илдала дурабад — кубокра.