«Ташмишдеш агара»

Хайдакьла районна Рукьа шилизивадси халалгъуна сержант Арсен Маликов, суненира Украинализиб дурабуркIуси дявила хасси балбуцличибси Миллатла гвардияла инженертала-сапертала ротализиб къуллукъуни ихъуси, «За разминирование» ибси медальличил шабагъатлаварили сай.

Арсен Маликовли гьанна урчIемъибил дус хасси вягIда хIясибли Чечняла Республикала Грозный шагьарлизив дявила къуллукъуни ихъулри. 2022 ибил дусла февральла 25-личив Украинализи вархьибсири ва илав 2023 ибил дусла январьла 29-личи бикайчи калун. Ургъанни сунела шабагъат Запорожская областьла Токмак шагьарлизиб саби сархибси.
«Ну саперли узулра ва цархIилтачил варх нуни мер-муса минабазирад акьудалтулра, сарира душмай саби бубшухIели удатурти. Илав биалли, «хатIаикес ихтияр агарли» узес хIяжатли саби, дебали мяхIкамли ва урехиагарли. Гьарил балкIли кацIибси ганзлизиб бебкIала урехи леб.
Арбякьунси дусла майла ахирличив Херсонничи гъамдируйхIиб нуни баргхIебердили калунси мина хIебузанбарира, сабира ярагъла складлизи кабикибси. Ил баркьуди багьандан наб «За разминирование» бикIуси медаль лугниличила багьахъурсири итхIели. Ил наб Росгвардияла директорла хIукму хIясибли ишдусла январьла 23-личиб гиб», —бурули сай саперли.
БусягIятла замана Арсен Маликов Чечняла Республикализив сай ва гъамти бурхIназив, Хайдакьла районнизи, хъули вакIес дигули сай.
«ЖумягI гьалав ну дявила хасси балбуцличивад чарухъунсира. Арбякьунси дусла дуцIрумлизиб наб гибси отпуск нуни тамай пайдалахIебарни багьандан, гьанна илди бурхIни гили сари наб. Дила акьути бурхIни адерхурмад, дявила узбачи чарирусира», —викIи Арсен Маликов.
Ихтилат таманбирули, хаслира гIергъити бузразиб Россияла ГIярмия, Украинала ванза миллатчибазибад азадбалтахъули, гьалабяхI башули саби или буриб.
«Вирхулра, нуша чедидиркниличи! ЦархIилван биэсра асухIебирар! Бургъанти гьалабяхI башули саби, ва Чедибдеш нушала шайчиб бирнилизиб илдала сегъуналра ташмишдеш агара», — буруси таманбариб ургъанни.
«Хайдакьла район» МР-ла администрацияла пресс-служба