Дагъиста поэзияла классик, даргала литературалис хьулчи кабихьибси, сунела у халаси хIярпличил белкIунси ГIямарла Батирай акIубси сай Сергокъалала районна ХIурхъила шилизив.
Ноябрьла 9-личиб М.Горькийла уличилси Урусла театрлизиб ГIямарла Батирай акIубхIейчирад 200 дус дикнила юбилейлис хасбарибси балбуц дураберкIиб.

Илаб цахIнабикилри бахъал дарганти – декIар-декIарти шимазибад бакIибти, Дагъиста лерилра миллатунала вакилти. Балбуцличи бакIибти-ургаб лебри Батирайла шантира — ХIурхъила шила школала мугIяллимти, культурала клубла хIянчизарти ва бахъал пагьмучебти хIурхъанти.
Балбуцличи бакIибти хIурматла гIяхIли сабри Дагъистан Республикала Правительствола Председательла Цаибил заместительла къуллукъуни заманалис дузахъуси Анатолий Карибов, ДР-ла культурала Министр Зарема Бутаева ва цархIилтира.
«ГI.Батирайли сегъунтилра жузи, белкIани датурли ахIен. Илала назмурти, хIябкубти, сарира чугур бяхъили дучIути адамтала гIякьлулизир кали сари. Ил ахIену, гьатIи, поэтлис халкьли лугуси чихъси кьимат?!», — викIи А.Карибов.
КIинайс балбуцличи бакIибти гIяхIлас баркалла балахъули, Дагъиста писательтала Союзла председатель, халкьла поэт МяхIяммад ГIяхIмадов гъайухъун: «Батирай Аллагьли халаси пагь бедибси адам сайри. Ил багьандан сари поэтла назмуртала къяяни дучIухIели, сагаси мягIналичил аргъес вируси. Ну вирхулра, Батирайла назмурти дунъяла мезаначи шурдаталли, Омар Хайямличивра машгьурсили виэс вири ибси пикриличи. Ил кьяйда викIусири Расул ХIямзатовра».
Лебилра дагъистанлантачи мубаракла дугьбачил дугьаизур Россияла писательтала Союзла правленияла Цаибил секретарь Геннадий Иванов. Илини буриб, Батирайла творчестволичил тянишвиубла дахъал произведениеби делкIниличила. Ахирличир илини Батирайлис хасдарибти сунела назмуртала къяянира делчIун.
Балбуцла дазурбазиб, лебил цалабикибти мубаракбирули, илкьяйдали гъайбухъун: «Московский литератор» газетала бекI редактор Иван Голубничий, Россияла писательтала Союзла Ставропольла крайла отделениела председатель Александр Куприн, Дагъиста писательтала Союзла даргала секцияла руководитель, филологияла гIилмуртала доктор, профессор Муса БяхIяммадов, Сергокъалала районна бекI МяхIяммад ГIямаров.
Илала гIергъи, бакIибти гIяхIлас культурала программара гьалабихьиб, сунезибра Батирайла поэзия хьулчили касибси. Илала назмурти, хIябкубти жагати ва пергер макьамтачил делчIун Дагъиста халкьла далайчибани.
ГI.Батирайла у бихуси даргала теартла гIяртистунани поэтла назмурти ва хIябкубти хIясибли спектакльтала бутIни чедаахъиб.
Батирайличила дахъал гъай делкIес вирар. Сунела гIядатунас марсили калунси дубурлан хъубзара адам сай ил. БурахIелли, камли ахIенри Дагъистайзиб чугур бяхъили далай белчIес балути адамти. Гьайгьайра, Батирайливан далайлизир сунела дардани, уркIила хIялани аргъахъес гьарилли хIейри.
Даргала классикуназивад гIямрула шуртIрачи къаршили ва гьаргли далай­икIуси ца Батирайцун сайри. Шила юзбашибачи, кьадначи къаршили, цар­хIилти хIякимтала хIянчи дал­тIули, бархьдеш агниличила бурули далай­икIу­сири ил. Батирайли лебил Дагъистайзибти адамтас бебкIаагар къяяни гIелар датур. Илини сунела далуйтазир дубурлан адамла хIял-тIабигIят, адаб-хIяя, гъабзадеш чедиахъули, хьунул адамличи, ВатIайчи диги черяхIдирули сай.
Иш анцIбукьлизиб наб «адам убкIар, у кавлан» ибси даргантала бурала гьанбиркули саби. Илкьяйда Батирай агарли хьалли, илала у адамтала уркIбазиб муртлисалра кавлуси саби.