ЗАМАНА - Белгити тIалабуни детурхахъули

Россияла Фе­дера­цияла Президент В.Пу­­тинна ва РФ-ла Пра­вительствола Председатель Д.Медведевла тIалабуни де­турхахънила тяхIяр-кьяйда хIер­дариб апрельла 9-личиб Дагъиста БекI В.Васильевла бекIдешлиуб бетерхурси совещаниеличир.

Ил ибхьули, республи­ка­ла БекIли сегъунти бяхI­чи­бизуначи хасси пикри бяхI­чи­аэс гIягIнилил буриб.
Владимир Васильевли гьалавван пачалихъла БекI­личи гIяхI­цад масъулти гьун­чи­дика­хъес регионна бюд­жетлис чеимцIали сурсатуни декIардарахъес ибси тиладиличил дугьаизниличилара гьан­бу­шиб. Илини ириъла баянти хIясибли мяхIкамдарес им­кан­бакIибти сурсатуначила диъни гъай аргъахъиб.
Республикала БекIли мисаллис гьалабихьиб гумурбазибад ца, сунелара лушнила хIян­чилис гьаланачирал 1,6 млрд. къуруш декIардарес пикрибарибси, амма, пересчет барили, проект 500 млн. къу­рушла дургIебарес им­кан­бакIибси.
ДР-ла БекI Владимир Васи­льев­ли министерствобала ва ведомствобала бурги илгъуна тяхIяр пайдалабарили бузахъес мас­ли­гIятбариб. «Сабабти агар­ли кадизахъурти алапабала бегIлара камли, аги-кьяйда баяндиридая», – гьала хили буриб республикала руководительли.
Илини совещаниела бу­тIакьянчиби «адамтала гIямру гьамаддиахъес мерличиб бузахъес» жибариб. «ХIукумат биалли адамтас гIяхIдешлис саби бузуси», — викIи ил.
Дагъиста Правительствола Председательла Цаибил заместитель А.Карибов компьютерла томографуни асес хIяжатли биънила хIекьлизирти улка­ла Президентла хъарбаркьу­нала чевкад гъайухъун. Рос­сияла Правительствола резервный фондлизирад республи­кала диагностикала центрла, Н.Цахаевла уличилси рес­публикала ортопедияла-трав­ма­­тологияла центрла, Буй­накъск­ла туберкулезличи къар­­­­шиси диспансерла ва Кас­пийск шагьарла бекIлибиубси боль­ницала хIяжатунас 211 млн. къуруш декIардиру.
Дагъистан Республикала гIил­­мула ва багьудила министр Уммупазил ГIямаровани 2019-2021-ибти дусмазир 8,9 азир мерличилти 19 школа тIашдатес пикрибарибси саби или буриб.
Регионна инвестициябала программала дазурбазиб, хIябал сменализиб дурхIни бучIахънила тяхIяр агарбарес багьандан, Дагъиста гIилмула ва багьудила министрла гъай хIясибли, Къаякентла ва Къум­торкъалала районтазир цахI­наб­си багьудила кIел организация лушнила хIянчи детурхули сари.
Дагъиста Правительствола Председательла заместитель Владимир Лемешкони цIакь­­барили буриб, республика­ли­зир законагар шайчир тIаш­да­турти юртани белгидирнила хIянчи детурхули сари или. Белгиси масъала республикала руководствола хIерудилиуб саби.
Ил илкьяйдали Дербент-алав автомашинабала гьундури лушнила масъалаличивра тIа­шизур. БусягIятла замана илар хIян­чи детурхули сари, сарира лябкьуси дуслизир тамандирути.
Ил шайчиб республикала БекIли буриб: «Иличирли арц дарес дигути дакIумабиаб. Ма­съала кьяркьси хIерудилиуб саби! Ил дебали дурхъаси объект саби, ва нушаб чебиркур ил къалабали тIашбатесра. Тиладибирулра лебтазилра ил ма­съа­лаличи пикри бяхI­чи­а­ахъес».
ХIердарибти масъултала лу­гIилизиб илкьяйдали лебри Мя­хIячкъалала халкьани-ур­габси урхьула вачарла порт­личи дашути мегьла гьундурала багьни камдирнила хIекьлизирти тIалабуни детурхахънила масъалара.

 

Прочитано 129 раз

О нас

ЗАМАНА . 0+. Учредитель: ГБУ РД ''Редакция республиканской газеты ''Замана''. Главный редактор: 
 
logo na foto     Фотографии с маркировкой
взяты из открытых источников
 

СМИ

Сайт “Замана” (www.zamana.info), зарегистрирован Федеральной службой по надзору в сфере связи , информационных технологий и массовых коммуникаций . Свидетельство о регистрации средства массовой информации Эл № ФС77-67486 от 18 октября 2016 года..

Контакты

Адрес редакции: 367018, Республика Дагестан, г. Махачкала, пр-т Насрутдинова 1А.
Тел: 65-00-25.  E-mail: Этот адрес электронной почты защищён от спам-ботов. У вас должен быть включен JavaScript для просмотра.
 
fa  in  ok  vk  yt  rss
Top