Гьарил адам ур­кIи­ла ухIнав ба­ралра поэт сай. Поэ­зияличи ва далайличи ди­ги­ли цалабяхъилри Хайдакьла 30-лицад бурибти поэтуни ва писательти, чулира «Хай­дакь­ла урунжуни» бикIуси ли­тературала цалабяхъ акIа­хъуб­ти.

Хайдакьла тарих ва культура дебали давлачерти са­ри. «Хайдакьла урунжуни» литературала-поэзияла цалабяхъли сунела бузери бехIбихьиб 1991 ибил дуслизиб. БегI гьалар илис бекIдешдирули калунсири ЧебяхIси ВатIа дергъла бутIакьянчи СултIанмурад Зу­багIиловли. Гьанна биалли, 20 дусличирра имцIали, илис бекIдешдирули рузули сари поэт-далуйти цаладирхъян, ДР-ла культурала рурибси хIянчизар ва Россияла гIядатласи культурала «Кайтаги» бикIуси Центрла директор Зубайдат ХIясанова.
Хайдакьла писательтала ва поэтунала творчестволичи гъира имцIабариб «Хайдакьла урунжуни» цалабяхъла баркьудили. 1998-2003-ибти дусмазир Дагъиста жузала Издательстволизир Хайдакьла поэтунала назмуртала 2 сборник дурадухъунтири.
Бурес чебиркур, баягъи цалабяхъли дураили сари 40-лицад назмуртала сборник. Гьанна ил цалабяхълизи кабурхули саби 30-лицад бурибти поэт, чулара пагьмуртани Хайдакьла район машгьурбирути. Гьар дус «Хайдакьла урунжуни» литературала цалабяхъли дурадуркIути сари декIар-декIарти далдуцуни. Илдала мурадра саби нешла мез мяхIкамдарни ва илдачи диги-иштяхI имцIадиахъни.
ХIера, илгъуна Хайдакьла поэзила ва далайла балбуц бетерхур гьалабван тах шагьарлизибси Поэзияла Юртлизиб, сабира Хайдакьла район 90 дус биънилис хасбарибси. Цалабикибти цалис ца дебали разили гьунибиулри.
Балбуцличир жигарла бу­тIа­кьяндеш дариб Россияла пи­сательтала Союзла член ГIяй­шат НухIкьадиевани, ДГУ-ла профессор Муса Бя­хIям­мадовли, машгьурти дар­гала поэтуни ПатIимат Мир­заевани, Хадижат ХIя­би­бовани, Мисей ва Хасайбат ГIябдусаламовахъалани, ХIя­ва ГIялиевани ва бахъал цархIилтанира. Поэзияла Юртла сценаличирад даргала пергер далайчибани, Хайдакьла бурибти шягIиртала гъай хIясибли, зайдухъахъунти жагати далуйтанира шадлихъ ахъси гьавличиб бетерхахъур.