Мартла 26-личиб ГI.Ба­ты­рай­­ла у бихуси Даргала му­зы­кала-драмала театрла сага­ба­рибси Юртлизиб халкьла театртала 17 ибил фестиваль бе­тер­хур.

Ил республикала халкьла пагьмуртала Юртли ва ДР-ла культурала Ми­­нис­терстволи Избербаш шагьарла ад­ми­нистрацияличил барх, театрла Дусла ва «Театрла олимпиада» проектла дазур­ба­зиб, хIядурбарибси сабри.
Ил балбуц дурабуркIуси саби гьар дус, театрла хIянчизартала байрамлис хасбарили.
Ахтыла, БотIлихла, Унцукульла, Хасавюртла, Кулила, Новолакла, Рутулла, Хунзахла, Ла­вашала, Казбекла районтала ва Избербаш шагьарла халатала ва биштIатала гIяхI­тигъунти коллективтани «ХIед, театр, багъишлабирулра!» бикIуси декIар-де­кIар­ти бутIназибадси масхарала сценкализир жигарчерти бутIакьяндеш дариб.
Фестиваль бузахъуси Дагъиста халкьла гIяртист Алексей Тимохинни культурала хIянчизарла БархIиличил ва чесабиуси лебил дунъяла театрла БархIиличил мубаракбариб, ва лебтасалра арадеш, гIяхIдеш ва хIянчилизир гьарбизуни далгун. Избербаш шагьарла бекIла кумекчи МяхIяммад Гьа­руновлира гIяртистунас разити ва та­лихI­­черти гIямру далгун. Илини челяркьути нас­­лубас театрли патриот бяркъ луг­ни­ли­чи­­лара буриб.
Фестиваль ибхьули, Избербашла биш­тIатала театрла студияли (бузахъуси Майтап Шерипова) «Эко-теремок» хабар хIя­сиб­ли спектакль чебаахъиб. ЦархIилти халкьла театртанира чедаахъиб Дагъиста автортани делкIунти спектакльти. Илдазир гьаннала заманаличи далдикибти масъулти сарри ирзути: заралла хасиятуначил, кьир­кьирдешличил, тамяхIкардешличил, кьяс­дешличил, гIердирниличил дяви бузахъни.
Лавашала халкьла театрли (МикIхIила ши) Сукъур Кьурба «Маслис рицай Меседу» бикIуси спектакль чебаахъиб, Хъар Лябхъула шила театрли – «Суннатлавирни» ва «ГьархIебизурси сукни укьни» пьесаби. Лерилра цархIилти районтала театртанира чула устадеш чедаахъиб.
Лебил фестивальла бутIакьянчиби лайикьти савгъатуначил шабагъатлабариб. Избербаш шагьарла культурала отделла начальник ПатIимат Гъазиевани халкьла лерилра театртала вакилтас баркалла багьахъур. ГIяхIлала хIурматбарнилис хаслира баркалла рикIи Даргала театрла директор Рупат Чараковлис.
Фестивальла дазурбазиб Даргала театрла художественный руководитель, РФ-ла искусствобала урибси хIяракатчи Мустапа Ибрагьимовли ва ДР-ла халкьла гIяртист Алексей Тимохинни театрла хIянчиличи хасси устадешла дарсра чебаахъиб.