ЗАМАНА - «…рахаж сунела назиксигъуна мяваличиб цIакьси хIебирар»

Лебил Россияла «Онкопатруль» хIяракатли АО «Завод «Дагдизель» АО-ла поликлиникализиб сунела бузери даимбарили саби. Майла 23-личибад 27-личи бикайчи Россиялизибра бегIлара халаси урхьула удир пайдаладирути ярагъ дурайуси заводла 800-цад хIянчизарли чула арадеш ахтардибиру.

Баягъи ил мурадличил Россияла арадеш бихIнила Министерствола демдрила излумала шайчивси бекI тухтур, РАН-ла академик Андрей Дмитриевич Капринна бекIдешлиуб Россияла Минздравла радиологияла НМИЦ-ла 22 гьабкья специалист Дагъистаннизи бакIили саби.
ГIяхIтигъунти онкомаммологуни, онкоурологуни, онкогинекологуни, УЗИ-ла специалистуни, уркIи-михъирла шайчибти хирургунани арадеш ахтардибирули саби ва, илала дурабад, заводла поликлиникала тухтурти-ургаб, хIянчизарти-ургаб ва регионна жамигIят-ургаб иргъахънила шайчибси хIянчира дурабуркIули саби. Илди специалистуни-ургаб маммолог, онколог, медицинала гIилмуртала кандидат Никитина Екатерина Андреевна, Москвала П.А. Герценна уличилси демдрила излумала шайчибси гIилмула-ахтардила институтла УЗИ бируси тухтур Зелич Наталия Владимировна ва цархIилтира леб.
Тухтуртала кьукьялизив халалгъунали сайси уркIи-михъирла демдрила излумала шайчивси хирург, П.А. Герценна уличилси МНИОИ-ла гIилмула халалгъуна хIянчизар, медицинала гIилмуртала кандидат Бармин Виталий Валерьевичли «Онкопатруль» хIяракатла бузериличила ва адамли гьар дус вегIла арадеш ахтардибирахънила мягIничебдешличила буриб.
Сен уркIи-михъирла демдрила излуми дахъдеш хIясибли цаибил мерличир сартил тухтурли баянбариб:
«Ашкарливан, лебилра демдрила излумазибад бебкIибти-ургаб уркIи-михъирла демдрила изайзибад бебкIибтала цахIнабси лугIи бегIлара халаси саби, Дагъистаннизиб, улкализиб кьяйда, арагIебли дунъяличибра. ГIядатли бетаурливан, уркIи-михъирла демдрила изай, адамла арадешла даража тамай усалбикайчи, сунечила балахъули ахIен. Адам сунела гьар бархIила хIянчилизи ахъили сай, демдрила гIянд биалли бархIиличи-бархIи гьатIира халабикIули саби. Сунечила балахъули саби илини чIянкIли мякьларти биркIантачи тIинтIбиубхIелицун. Амма, хIейгеси биалра, илхIели изала хIябэсил яра авэсил ганзухъличиб саби. Баягъи ил сабабличибли саби статистикали ишаб гьанбушибси кахси сурат алкIахъуси.
Нушала бекIлибиубси мурад адамтази вегIла арадеш заманаличиб, селра хIейзухIели, ахтардибарни дебали мягIничебси биъниличила аргъахъни саби. УркIи-михъири ахтардидирнила бегIлара ункъси тяхIяр компьютерла томография барахъни саби, я рентген, я флюорография ахIенну. Адамлис заманаличиб операция барес имканбакIалли, ахир дебали дигесили бетарар.
Бурес гIягIнибиркур, КТ дуслизиб гьачамцун саби бируси ва баягъи ил дус кабикайчи адам паргъатли хIериэс вирули сай, сунечи кахси изала къячхIебикни ва сунезиб изала тамай мерлахIебиъни балули. Баягъи иличи саби нушани адамти жибирутира!»
Сен «Дагдизель» заводла хIянчизарти чеббикIибти?
Дубура МяхIяммадличи хIебашули биалли, МяхIяммад дубураличи вашули сай. Тухтурла гъай хIясибли, «Онкопатруль» акIахънила бекIлибиубси мурад — жамигIят тухтуртачи хIебашахъули, тухтурти жамигIятличи башахъни.
«Нушани балуливан, халати предприятиебала хIянчизартас тухтуртачи башес къиянбулхъули саби, ил багьандан нуша адамти бузуси мерличи дурадулхъутира».
Бурес гIягIнибиркур, специалистунала бекIлибиубси жи, адам, се-биалра изескабиайчи хIерли кахIейили, гьар дуслизив тухтурличи дугьаилзахънилизиб саби.
ГIяхIли разибиахъуб Дагъистанна хьунул адамтани папрус хIебужнила хабарли, амма илдас хIейгибизур республикализиб бахъалгъунти мурул адамтани ил зумали пайдалабирни.
Виталий Барминни бурни хIясибли, папрус яра танбаку пайдаладирни, демдрила иза 20-личирра имцIали жура дагьардирнилис бекIлибиубси сабабли бетарули саби, уркIи-михъирла иза дурарад. Ил багьандан илини тIалаббирули саби «вегIла арадешла цIакь хIясиббирули кахIейрахъес, сенкIун рахаж сунела назиксигъуна мяваличиб цIакьси хIебирар».
ХIурматла учIан! Демдрила изайчил дархдасунти сегъунти-дигара суалтас жавабти даргес вируд лебил Россияла демдрила изайзи бикибтала ассоциацияла сайтличир https://www.russcpa.ru/proekty/onkopatrul/.
Илкьяйда дебали пайдалати баянти ва насихIятуни Россияла арадеш бихIнила Министерствола демдрила излумала шайчивси бекI тухтур, РАН-ла академик Андрей Капринна телеграмм-каналличирра даргес вируд: https://t.me/ADKaprin.

Прочитано 478 раз

О нас

ЗАМАНА . 0+. Учредитель: ГБУ РД ''Редакция республиканской газеты ''Замана''. Главный редактор: 
 
logo na fotoФотографии с маркировкой
взяты из открытых источников
 

СМИ

Сайт “Замана” (www.zamana.info), зарегистрирован Федеральной службой по надзору в сфере связи , информационных технологий и массовых коммуникаций . Свидетельство о регистрации средства массовой информации Эл № ФС77-78978 от 20 августа 2020 года..

Контакты

Адрес редакции: 367018, Республика Дагестан, г. Махачкала, пр-т Насрутдинова 1А.
Тел: 66-00-25.  E-mail: Этот адрес электронной почты защищён от спам-ботов. У вас должен быть включен JavaScript для просмотра.
 
  ok  vk  rss
Top