Гьанна биаб, гьалаб биаб колхозлизиб маза-мас гечли дашахъни: хIеб-дуцIрум дубурличи, янила замана диркьаличи гьамадси хIянчи ахIенри. Хаслира мазала мас поездла вагонтачи адалтухIели, букIуни имцIали бумсули бири. ЭмхIе ахIебицIули, мерличиб кабушеси даражаличи виркахъи адам.
Гьачам набчира хъарбикили лебри илгъуна анцIбукь. Дила цIакьагри чебаили, хала букIун Нагьбарла урши ХIяжи-МяхIяммад викIули сай: «ЭмхIе чинабалра эмхIе саби, гьари хIуни хIечибяхI бекI барили, къужбара вагоннизи». Марлира, ил вяшарбухъун, эмхIе нуни вагоннизи къужхIебарили, набчибяхI битIакIира. Дила ибси хIебарес багьандан ил гIелабяхI башули, вагоннизи абацIиб.
— Учительли узухIели илдигъунти барскъа ученикуни къаршибиркули бирив? – дукаркIули сай колхозла председатель, Дагъиста урибси зоотехник ГIяли ТIайгибов.
— Бираргу илдигъунти адамтира. ХIуни се бурадра ил кьабулхIебарес, балкIси биалра чула се-биалра бурес къайгънабиркьути. Ца мерличиб къаршибикили нушани бурусигъуна анцIбукьла ихтилат хIушабра дарган мезличил шурбатурли гьалабирхьулра.
Савли-жявли, айзурси муруй гьачам бурушлар лералси хьунуйзи хьарбиули сай:
— Ляркьяду набчил рарх дуцIрухъес (пробежкаличи)
— ХIед ну куцагарси, рабза сари или гьанбиркулив?
— Юх, бекIлил. Савлила пробежка кьаркьайс дебали гIяхIсигу.
— Ну зягIипси сари или гьанбиркулив?
Мурул: Юх, аризес хIейгули риадли селра агара биубси. Карихьи руэн.
— Аргъира хIела пикри – ну азгъин хьунуйзи руйгIули ургуд.
— Вари, вари, дила буруси хIуни вайтIа аргъилри. Дила бекIлизи илгъуна пикри бекIлил хIебакIиб.
— ГIе, гIе, иргъулра хIела, хIед бурес дигуси ну багьуди камси адам сарни.
— Нуни хIези илгъуна хIеирагу, чинад касибсив ил хIуни. 9 классра хьунул адамлис камси багьуди ахIенгу.
— ХIела гъай хIясибли, ну къунба ругьулра?
— Се сари хIуни дурути. БерхIи хъули бухIнабухъайчи абдулта дугьули кавлутирав?
Даим илдигу хIела ихтилатуни, (хьуна духудеш – лехIкахъни саби). Хьунуйс 2 гъай хIери баайчи, ца гъай хIери гIергъи дуралли даибти сари.
— Карихьи русен. Нуцун аркьяс, кьаркьала илкьяйда гIяхIил батбулхъан.
— Гьайгьай, мурталра хIед дигусиван. Се рирусира хIед ну. Вашен, гезкайкIен хIед дигуливан.
— Гьай-гIяйиб-гьай, бекI ласбикIесбяхIиб…
— Чебиулрив? ХIед хIу ваибси адам сайри. Урусла хIугъуналис эгоист бикIар. Мурталра хIу ца хIечилацун сайри шишимъайзивси. Дила арадешличила хIу гьачамалра пикриухъунси ахIенри.
Мурул, ихтилатра къябаили, пикрилизив сай: «Чинаб бетаура дила хатIа. Нуни гьачам «Словарь атеиста» бикIуси жузлизиб белчIунсири. Европала чидирил улкализи къаршибикили католикунала, христиантала богословти «Хьунул адам адам сарив, ахIену?» суал хьарбаибсири. ТIамри дейгIунхIели, ца тIама имцIали бакIили, хьунулра – адам сари ибси пикриличи бакIибтири.
Дила пикрили, баягъи къаршикарти бусягIят дила кьяйда ласбухъахъи бекIра бархьибти динна вакилти бурги».
Муса МяхIяммадов,
ХIямшима
«ХIерии, цархIилра
хIериахъес имкан беда»
Г.Державин
