Шимала бургала хIекьлизибси законна проектличила

Январьла 18-личиб Дагъистан Республикала Халкьла Собраниела верхIъибил сессия бетерхур. Илала дазурбазиб депутатунани «Гьаргси хIукуматла цаси кабизлизир мерличиб чус чули гьуни чебиахънила хIянчи тIашбалтахъниличи цахIнарти тIала­бу­нала хIекьлизибси» Федерацияла законна проект хIер­бариб.

Депутатунас баягъи законна проект ДР-ла Халкьла Собраниела законти дурайънила, законти дузахънила, пачалихъ лушнила, мерличиб чули чус гьуни чебиахънила ва низам кабилзахънила шайчибси Комитетла председатель Артур Исрапиловли гьалабихьиб. Илини республикала муниципалитетунала гIямрулизиб проект секьяйда бузарал буриб.
Докладчикла гъай хIясибли, «шимала администрациябала мерличир муниципалитетла округунала бутIни дирар. Илди бутIнала руководительти чеббиркIути саби округла бекIли. «Староста» ибси къуллукъра алкIан. Ил вирар шила шантани бирхауди бихьибси адам. Баягъи шантани сай ил чеввиркIусира. Старостала алапа хIебирар.
«Законна проект-алав дахъал хIергъибдешуни ва мез акIубли сари», — викIи А. Исрапилов. Илдазибад ца –районтала бузути хIянчизарти убасни. Амма гьаннала администрацияла хIянчизарти хIянчи агарли кахIелниличи парламентарий чIумали вирхули сай. Илдала устадеш сагали акIахъубти къуллукъуначирра хIяжатдиркур.
Ванза бузахънила масъултала шайчибси Комитетла председательла заместитель МяхIяммад Патхуллаевла пикри хIясибли, гьаннала ихтиюрти лертани илди цархIилличи чедуршни ва жавабкардеш чилилра хIедихни мерличибси хIукуматла хайричебси бузерилис диргаладулхъули сари. Илини бурни хIясибли, ишбархIи шимала бурги бетарули саби, хайричебти адамти ахIи, халаси тухумла бегIтицун. «Ил багьандан барсдеш акIахъни жявлил хIяжатсири», — викIи депутат.
ТIамри дедлугухIели, депутатунани законна проект гIеббуциб, верхIцIанну кIирализибад урегцIанну хIябрали чула тIама бедили.
Законна проект Пачалихъла Думализиб кьабулбарес гьалаб, ил регионтазиб лайикьсилизи халбарили биэс гIягIниси саби. ДР-ла 63 депутатли гIеббуциб, 4-ли – хIебуциб. Илкьяйда проект нушачиб лайикьсилизи халбарили саби или викIес вирар. Пачалихъла Думала лайикьси Комитетли илди хIердарили гIергъи, законна проект депутатунази кьиматлабирахъу.
Сессияличир цархIилти масъултира хIердариб.