ЗАМАНА - ГIяхIгъабза, дерхъаб хIечи!
ГIяхIгъабза, дерхъаб хIечи!

Гьаваличиб хамси чIакаван, даргантала авидлизиб «Дерхъаб» ибси девра гьайбатли урцуси саби ва илини гIяхIгъубзнала гьав ахъбурцуси саби. Ил «Дерхъаб» ибси дев «Замана» газетала къугъаси къушумли уркIила бегIлара гIяхIти ва черикIла пикрумази варакьбарили, ахъли зайбулхъахъехIе, Дагъистанна тарихлизив ишбархIи савлила шалдаван ухуси багьадур МуртазагIяли Хулаттаевичла хIурматлис!

Дубурланна юртлизив урши акIубхIели бирар ил дев бегIлара ахъли зайбулхъуси. Уршили шанти-ургаб хIурмат сархалли, дудешли гьар абалтуси гьигьлизиб ил дев тикрарбиру. Илкьяйдали «Дерхъаб» ибси дарган дев МуртазагIяли Хулаттаевичла гIямрукад, бацличил дарх дашути зубартиван, рурхIули бируси саби. СенахIенну ил дубурлай дирахъути черяхIти сархибдешунас цархIил кьимат гесра хIейрар.
Сунела хIялалдешличивли, адаб-хIяяличивли сай ил цархIилти-ургав декIарулхъусира. Хамдеш агарси ил чеалкIуси наслулисра адамдешла гIячихъси мисал сай. Нушала ре­спубликализиб халасигъунали сабси ДГУ-ла 2008-ибил дусличивад ректор сайливан, илини жагьилтас челябкьлализиб бархьси гьуни чеббикIахъес кумекбирни илдала талихIлизи халбарес вирар.
60 дус илала гIямрулизиб пасихIдешла ахъанайличи ваибси, алавтас берхIиван ванавикIес даимиубси, иличил бузутасра сунени багьудлуми дедлугутасра умутчевси хъарихъли ветаурси ва цIакьани бегIлара вавалидяхъибси манзил саби. Илала бекIдеш дирнила устадешла, санигIят ункъли балнила, творчестволашалти цIакьанала, гIякьлула мурхьдешла гIяхIдешли ДГУ-лизиб багьудила даража ахъбикIули саби, бекIахъудила-техникалашалси аги гьалабяхI башули саби, белчIудила бетуцуназир сагадешуни пайдаладирули ва цархIилти белчIудила заведениебачилси бархбас чIумабикIули саби.
Дагъистанлантани ил валуси сай бамсриагарси, гIямруличи пасихIдешличил хIерикIуси, челябкьлаличи умутунани вицIибси гIяхIгъабза сайливан. Дубуртар Улкала халкьла гIямрула-яшавла шуртIри ункъдирнилизи ва республика бекIахъудила-экономикалашал гьалабяхI башахънилизи белгиси пай кабирхьуси Дагъистанна Халкьла Собраниела депутат сай.
Гьарил баркьудила сархибдешлис кьимат лугуси саби адамли ил секьяйда дурабуркIулил ва иличи уркIи изулил, сунечи хъарси гьалабяхI башахъес имканти дургулил, сунечил бузахъес хIялалти, бажардичебти ва гIякьлучебти адамти жибирулил пикрилизи касили. МуртазагIяли Хулаттаевичла санигIятлашалти устадешла, сунечи ва цархIилтала бузериличи чекайзнила, бехIбуцибси чедибдешличил ахирличи биркахънила гIяхIдешли саби халкь-ургаб илини илцад халаси хIурматра сархибси.
Рабаданов МуртазагIяли Хулаттаевич акIубси бархIиличил бархбасахъи, илис, илала къугъаси кулпетлис, тухумти-шантас, барх бузутас чархла арадеш, кахIебурхуси талихI ва бузерилизир чедибдешуни дулгехIе.
ХIурматличил «Замана» газетала редакцияла коллектив

Прочитано 1829 раз

О нас

ЗАМАНА . 0+. Учредитель: ГБУ РД ''Редакция республиканской газеты ''Замана''. Главный редактор: 
 
logo na fotoФотографии с маркировкой
взяты из открытых источников
 

СМИ

Сайт “Замана” (www.zamana.info), зарегистрирован Федеральной службой по надзору в сфере связи , информационных технологий и массовых коммуникаций . Свидетельство о регистрации средства массовой информации Эл № ФС77-78978 от 20 августа 2020 года..

Контакты

Адрес редакции: 367018, Республика Дагестан, г. Махачкала, пр-т Насрутдинова 1А.
Тел: 66-00-25.  E-mail: Этот адрес электронной почты защищён от спам-ботов. У вас должен быть включен JavaScript для просмотра.
 
  ok  vk  rss
Top