ШалгIеббухъунси жумягIлизиб МяхIячкъалализибси ­Дагъистанна пачалихъла М.Горькийла уличилси Урусла драмала театрла халаси заллизиб Россияла печатьла БархIила байрамлис хасбарибси балбуц бетерхур.

Дагъистанна СМИ-бала хIянчизартани зал гарчли бицIилри. Журналистунас мубаракла дугьби дуриб ДР-ла ­багьахънибала ва печатьла министрла къуллукъуни ­заманалис ­дузахъуси ГIумаргIусман ХIяжиевли, ДР-ла миллатла ­политикала ва ­динанала къуллукъунала шайчивси министрла хIянчи ­заманалис ­бузахъуси Энрик Муслимовли, регионна жагьилтала ­къуллукъунала ­шайчивси министрла хIянчи заманалис бузахъуси Камил СягIидовли ва бахъал цархIилтанира.
Сунела мубаракла девлизиб ГI.ХIяжиевли, ­Дагъистанна ­СМИ-бала лебилра хIянчизарти «Дагъистаннис пайда хес» ибси жавабкарси хъарбаркьли цабирахъниличи сай чIумали ­вирхниличила буриб.
Ункъси бузериличил декIарбухъунти хIянчизарти ва цахIнарли газетаби министрли ХIурматла Грамотабачил шабагъатладариб. Грамотабачи лайикьбикиб журналистуни «Аргументы и факты Дагестан» газетала бекI редактор Вефадер Меликов, кIарахъала «ХIякьикьат» газетала отделла редактор Кавсарат Сулайбанова ва цархIилтира.
Бурес гIягIнибиркур, Дагъистанна журналистунала Союзли ­сагаси «Легенда дагестанской журналистики» бикIуси хIурматла у акIахъниличила. Баягъи ил заллизиб сагаси ­шабагъат бикиб чумал хIурматла журналистлис, сабира дахъал ­дусмазиб СМИ-базиб бузули калунти. Гьайгьай, ил разиси анцIбукь саби. Амма «легенда»-бала сияхIлизи кахIебикили калун ­Дагъистанна журналистикализи гьарли-марли халаси пай ­кабихьибти, ­сабира илцад-декIар бахъал агарти журналист ва писатель ГъазимяхIяммад Юсупов, журналист ва тилмаж Запир Харбилов ва цархIилти, чулира лерилра гIямру дигуси санигIятлис дедибти. Гьайгьай, кагъуртани адамтала дагьри дарсхIедиру.
ШалгIеббухъунси байрамличил мубаракдирулрая, ахIерти гьалмагъуни. ХIушаб арадеш ва талихI дулгулра. ГьатIира бугабиаб хIушала кьалам!