Дагъистан Республикала Р.ХIямзатовла уличилси Миллатла библиотекализиб дурхIнала пагьмуртала «Нуша — Россияла дурхIнира» ибси Фестиваль дураберкIиб. Илар гьаладихьиб Дахадаевла районна багьудила учреждениебазибадти дурхIнала хIянчурбира.

Конкурс декIар-декIарти номинацияби хIясибли ­бетерхур. Илди сарри: «ГIяхIсигъуна назму», «ГIяхIсигъуна сурат», «ГIяхIсигъуна видеофильм», «ГIяхIтигъунти делхъ» ва «ХIялумцIнила гIяхIсигъуна хIянчи» ибти.
Балбуцличир гIяхIласра дурхIнасра бамсриихънилис хасдарибти майдунти лерри.
«ГIяхIсигъуна видеоролик» ибси номинациялизир Хуршнила школала 11 ибил классла ручIан Рукьият ГIябдусаламовани цаибил мер буциб.
Конкурсла бутIакьянчини бурулри Дагъистанна ва илаб хIербирути адамтала лерилра челукьутачила, илди паргъатагарбирахъути бетуцуначила.
Р.ГIябдусаламовачил рарх балбуцличи ракIиб илала насихIятчи ва мугIяллим ПатIимат Жамалутдинова.