Январьла 11-личиб, Дагъистан Республикала БекI Сергей Ме­ли­ковла бекIдешлиуб иш­дус­лизиб цаибси Оперштабла засе­дание бетер­хур. Илала дазурбазир рес­пуб­ли­кализир коронавирусла чейхъуси изайс къар­шидеш дирнила шайчирти масъулти пикридариб.

Заседаниеличиб ДР-ла БекI С.Ме­ликов­ли буриливан, байрамла бурхI­назиб эпидемиологиялашалти аги-кьяйда паргъатли калахъес имканбакIиб. Иличи хIерхIеили, регионна БекIли цIакьбарили буриливан, коронавирус лебал белгибирнила ва вакцинаби дура­дуркI­нила хIянчи гьаннара жигарчерли дурадуркIес чебиркур.
Гьалабра регионна БекI Сергей Меликовли 60 процентла кьадарлизир гьести гIямрула адамтас вакцинаби дарахъес ибси масъала тIашбатурсири, амма гьачамлис илдигъунти лугIурби сархес имканбакIили ахIен. ХIера, январьла 10-лис регионнизир вакцинаби дарахъес хIяжатти адамтала 46 процентла кьадарлацун сари дарибти. Субъектла БекIли вакцинаби жигарчерли дирнилицун зягIиптала лугIи камбирахъниличи бирхауди бихьиб.
Илини мисаллис буриб Хивла район, илаб адамтани 90 процентла вакцинаби дарахъили сари. Илала дурабадра, муниципалитетла стационартазиб COVID-19 изайзи викибси цалра адам агара.
Роспотребнадзорла регионна управлениела руководитель Николай Павловла гъай хIясибли, бусягIятла замана республикализир коронавирусла изайзи бикни лабораториялизир мардиубти 66923 анцIбукь хIисаблизи касили сари, арбякьунси дуги-хIерила духIнар биалли— 111.Республикализир 842909 адамли прививкаби дарахъили сари.