Декабрьла 20-личиб Ахъушала районна ГIялиханмахьила ши­лизиб тIабигIятла газ са­бук­нилис хасбарибси шад­лихъла балбуц бетерхур. Газла проводла бухъяндеш 10 километрличи абиркули саби.

ХьанцIа цIабикьалала ла­ми ухахънилис хасбарибси балбуцличиб лебри Ахъу­шала районна бекI Мя­хIяч ГIябдулкаримов, ДР-ла энергетикала шайчивси министрла заместитель Мя­хIям­мад ГIя­либеков, ДР-ла «Спец­газст­рой­сервис»-ла ва «Даг­сель­­хозс­трой»-ла вакилти.
Газла провод ибхьнила шадлихъличив гъайулхъули, ГIялиханмахьила бекI Табан Жамалудиновли шантала шайзибад районна ва республикала руководстволис, хIянчи дирнилизир бутIакьяндеш да­риб­ти лебтасалра баркалла багьахъур.
ГIур гъай бедиб Ахъушала районна бекI МяхIяч ГIяб­дул­каримовлизи. Илини ГIя­лиханмахьила шанти илдала гIямрулизиб кабикибси мягI­ничебси анцIбукьличил ур­кIи-уркIилабад мубаракбариб.
«ХIурматла гIялихан­махьи­ланти! ИшбархIи лебталалра бай­рам саби.
Иш газла проводли 260 хозяйство гIердурцу ва челябкьлализиб ши социальный бяхIчибизла-экономикала шайчиб гьалабяхI башахънилис хьулчилира бетарар.
2019 ибил дусличирад нуша районна шими газличил гIердурцнилизир дузулра. Нуни хIушала юртанази газ кабукнила анцIбукьличил мубаракдирулрая. ХIушаб чIумаси арадеш, талихI ва баракат дулгулра», — цIакьбарили буриб муниципалитетла бекIли.
Шанти разиси анцI­букь­личил мубаракбариб ДР-ла энер­гетикала шайчивси министрла заместитель Мя­хIям­мад ГIялибеков­лира инвестор Арсен МяхIям­ма­дов­лира.
Гьести гIямрула шантала шай­зибад, газла провод ка­бук­ни багьандан, районна ва республикала руководст­волис халаси баркалла багьахъур ГъазимяхIяммад Жама­лут­диновли, ГIябдуряхIман Мя­хIяммадовли, МяхIяммад Искандаровли.
Шадлихъла аги-кьяйда­ли­­зиб чял кьицIбирнила ва цIа­ла кьялти улкахънила бал­буц­лизир бутIакьяндеш дариб районна бекI МяхIяч ГIябдул­каримовли, МяхIяммад ГIя­либековли, шила халатани ва газла провод белшунтани.
Балбуц ахирличи бикахъиб Ахъушала районна культурала управлениела коллективли байрамла концертра гьалабихьили.