Тухтурла хъялис марси

Ишди бурхIназив «АхIер­си Дагъистан» ва «Халкьла пикри» жами­гIятла цалабяхъунала Союз­­ла комиссияла вакил Абу­­бакар КьурбанисмягIилов Сер­гокъалала районна цент­ральная больницала кол­лек­­тивличил гьуниваиб. Гьу­ни­баънила мурад сабри ко­миссияла председатель ХIя­биб Давудовла шайзирад ДР-ла арадеш бихIнила отлич­ник, чебяхIси даражала кате­го­рияла тухтур-невролог Наида Къа­рае­ва шабагъатларарни.

Къараева Наида ХIяжиевна акIубси сари Сергокъалализир, Къараевхъала машгьурси хъа­ли­барглизир. Школа таманба­ри­ли гIергъи, Дагъистанна ме­дицинала институт (гьанна Да­гъистанна медицинала акаде­мия) хъараахъур ва гIяхIцад дус­мазир, дурусли буралли – 1999 ибил дусличирад – Сергокъалала районна больницализир неврологли рузули сари. Ириъ, коронавирусла чейхъуси изала тIинтIбикIуси манзил, «хIун­тIена зонализир» рузули, зягIиптала жан дерцахъес, Н.Къа­раевани халати къайгъни дакIудариб. ДР-ла БекIла ХIук­му хIясибли, ил Дагъистан Рес­публикала ХIурматла Грамоталичил шабагъатларариб, ил­кьяйдали ил гIяхIцад шаба­гъа­туначира лайикьрикибси са­ри.
Халкьлис медицинала хIян­­чизартала бузери сецадла мягIничебсил ишбархIи ну­шани гIячихъли чебиулра. Гьайгьайрагу, тухтурла хIян­чи гьамадси ахIен, илини ряхI­мучебдеш, мурхьти багьудлуми, халати жавабкардеш ва устадеш тIалабдирули сари. COVID-19 изала тIинтIбикIуси манзил, улкала тухтуртиван, Сергокъалала районна боль­ницала лебилра хIян­чи­зар­тира зягIиптала арадеш мяхI­кам­барес ва гIямру дерцахъес ба­гьандан, тухтурла хъялис мар­ли кали, дуги-хIери цадарили бамс­риагарли бузиб. Баягъи ил больница госпитальличи шурбатур ва медицинала хIян­чизарти «хIунтIена зонализиб» кахси изайчи къаршили бургъес бехIбихьиб. Чу­ла гIямрулисра халаси урехи алкIниличи хIерхIеили, цар­хIилтала жан дерцахъес къай­гъилизибри. Бузрадли хъа­либаргуни чехIедиули ва гьар­кьятала къяяназиб бузули, ил­дани чумра адамла гIямру дер­цахъиб. ХIера, илдазирадли ца сари Наида Къараевара.
Коронавирусла чейхъуси изала тIинтIбикIуси манзил ме­дицинала хIянчизартани да­кIу­дарибти гъабзадеш ва игитдеш, гьайгьайрагу, арагIебли улкала тарихлизир даимлис кавлан. Нушала улкализиб сезаманалра тухтуртала халаси хIурмат бируси саби.
Нушани тухтуртала игитласи бузерилис хасдарибти макьалаби кадирхъес даимдиублира. Иш гьакIлизир, COVID-19 изала тIинтIбикIес бехI­бихьибхIели, лерилра цIа­кьани дяхIчиаъни ва Дагъистанна халкьла гьалар сархибдешуни диахъни багьандан, Наида ХIя­жиевна «Дагъистанна миллатла Игит» ибси хIурматла уличи лайикьрикниличил мубарак­рирулра.