Республикализиб хала­сигъунали саб­си Урусла театрла биштIаси заллизи лукIнила пагь­муртани узидеш чIу­ма­диахъубти даргала, кIарахъала, лезгибала, къумукъунала,… мил­­латунала вакилти цала­бир­кулри.

Илаб республикала кьад­рила балбуц бетурхни багьеслири. ЖаняхIлизиб даргала машгьурси шягIир МяхIяммад ХIямидовла жузала выставка чебаибхIели аргъеслири, адамти ила се багьандан цалабикилрил. Ишгъуна бархибси, тIягIямагарси манзиллизиб вегIла гъамсила шадлихъличира адамтас букьес хIейгухIели, селичилра хIерхIеили, Дагъис­танна лерилра миллатунала вакилти иштяхIличил, поэтла хIурматбирули, цалабиркули чебаэсра дигесири.
ГIяхIси поэт учIанни сунела бегIлара гъамсиван дай уркIилизи катурли вирар, ва лерилра гIямрулизив иличил кавлусира сай. Илкьяйда адамтала уркIбази минахIейубси поэт поэтра ахIен. Хабарла шягIир ГIямарла Батирайла ватIайзивадси — ХIурхъила шилизивадси МяхIяммад ХIямидов поэт сайливан адамтала уркIбази ацIилицунра ахIи, ил пачалихъла ва жамигIятла машгьурси хIяракатчи, историяла гIилмуртала доктор сайри. Дагъистанна халкьла поэт 30 дус «Дагъистан» ГТРК-лис бекI­деш дирули калунсири. Ил­гъуна къуллукъличи гьарил адам лайикьиркусира ахIен. ХIя­лалси, бархьдеш гIямрула байрахъли бетаахъурси, адамтачи дигили вицIибси, руководительла къуллукъуни ахъси даражаличир дузахъес пагьму лебсицун адамличи дирар илдигъунти хIянчи хъардирути. Тяп илгъуна сайхIели ХIямидхъала МяхIяммад (поэтла марти юлдашуни илкьяйда дугьабилзи иличи) илдицад дусмазив сабурличил ва адаб-хIяя ахъли хIердарили, узусири.
МяхIяммад ХIямидов акIубси сай 1930 ибил дуслизив ГIяймаумахьилизив (Буцра). Дагъистанна пединститутлизиб чебяхIси даражала багьуди касиб. КIинайс илини КПСС-ла ЦК-ла ЧебяхIси партийная школара таманаибсири. Гьала-гьала «Ленинна байрахъ» газетала редакциялизив узули калунсири, гIур иличи «Дагъистан» ГТРК-лис бекIдеш дарахъес хъарбарибсири.
М.ХIямидовла белкIани бегI гьалар 1950 ибил дусли­зир дурадухъунтири. 1962 ибил дуслизиб илала «Дила зиланти» ибси цаибси назмуртала жуз дурабухъунсири. 1981 ибил дуслизиб дурабухъунси «Хъябагьри» бикIуси назмуртала жузлис ДАССР-ла Сулайбан Стальскийла уличилси премия бедибсири. ГIямарла Батирайла уличилси премия касибсири илини наз­муртала «Лерилра далуйти хIечила сари» ибси жузлис.
М.ХIямидовла творчестволис хасбарибси шадлихъла балбуц ибхьули, гъайрухъун поэзияла Театрла директор Е.Гьа­рунова. Шадлихъличиб илкьяйдали гъайбухъун Да­гъистанна писательтала Союзла даргала секцияла руководитель, профессор М.Бя­хIям­мадов, «Дагъистан» ГТРК-ла бекI редакторла заместитель С.Хавчаев, Сергокъалала районна багьудила Управлениела начальник Х.ГIисаева ва Дагъистанна жузала издательствола директор, М.ХIямидовла рурси М.ГIямарова.
— Дагъистанна литературалис, илкьяйдали даргалалисра ХХ-ибил даршдус «мургьила даршдусли» бетаур. Ил мургьила давла дахъал анцIбукьуначил бархбасунсири: школабазир нешла мез руркъес бехIбихьиб; нешла мезличил художественная, гIилмуласи ва цархIил журала литература, жузи дура­кайэсбяхIиб, радио, телевидение, республикала лерилра миллатунала мезаначил СМИ-би, театрти дузесаиб.
ХIХ ибил даршдусли даргантас хабарла поэт ГIямарла Батирай пешкешвариб виалли, ХХ-ибил даршдусли — бахъал писательти ва поэтуни сабри гибти. Поэт, прозаик, гIялим, школабас бегI гьалар дураибти даргала литературала ва мезла жузала автор, дарган мез гьаладяхI ардукес багьандан халаси хIянчи барибси Сагид ГIябдуллаев ва прозаик, драматург, киносценарист, Дагъистаннизив бегI гьалав халкьла писательла уличи лайикьикибси, художественный 10 фильмла автор ГIяхIмадхан Абу-Бакар илдала лугIилизибадти саби.
Дагъистанна халкьла писательти: МяхIяммад-Расул Расуловли, Расул БяхIяммадовли, Дагъистанна халкьла поэтуни: Рашид Рашидовли ва Сулайбан Рабадановли делкIунти произведениеби бучIантас лергIер гIяхIдилзути сари. Даргала литературализи халаси пай кабихьиб: Ильяс ХIясановли, ХIябиб ГIялиевли, Амир Гъазини, Газим-Бег БяхIяндовли, ГъазимяхIяммад Юсуповли, Ражаб Адамадзиевли ва бахъал цархIилтанира.
Илдала багаласи баркьуди иш­бархIи даимбирули, бамс­ри­агарли бузули саби Дагъис­тан­на халкьла поэт Аминат ГIяб­дул­ма­на­пова, прозаик Иб­рагьим Ибрагьимов ва цар­хIил­ти­ра.
Даргала литературала мургьила хазнализиб лайикьси мер бурцуси сай Дагъистанна халкьла поэт МяхIяммад Халимбекович ХIямидовлира. Ил тарихлизи поэт, журналист, тилмаж, жамигIятла хIяракатчи сайлин керхурси сай.
Сергокъалала районна Буцримахьилизивадси гIяхIгъабза сунела пагьмуличил, къайгъначил ва бамсриагарси бузериличил поэзияла ва журналистикала ахъанайтачи ваиб. Ил ДГУ-ла выпускник сайри (ит­хIели илис С.Стальскийла уличилси Дагъистанна пединс­титут бикIусири). Улкали се­гъунти хIянчи хъардараллира, ил гьар мерличив ламусличил узу­сири.
Дахъал жузала автор сайлин илини адамла гIямрула, хIял-тIабигIятла дигIяндешуни учIаннис бугаси пагьмуличил гьаргдариб. Илини философиялашалра мурхьси мягIнала, дигайла хIяланазир ламдикIути, адамтачи, сай айкьурси ванзаличи дигили дицIибти наз­мурти лукIутири. Илкьяйдали илини сунела дубурлантала пергер баркьудлумала мисалтачил ва черяхIти детуцуначил чеалкIуси наслу бяркъличи бикахъес имканти дургутири. Илала белкIаначи халаси асарбирусири даргала фольклорлира. Илини сабри бегI гьалаб даргала буралабала ва багьирабала сборник дуракаибсира.
Илини дарган мезличи шурдатурти сари Коста Хетагуровла, Муса Жалилла, Кайсын Кулиевла, Александр Твардовскийла, А.Пушкинна, ХIямзат ЦIадасала, Расул ХIямзатовла, Чингиз Айтматовла ва цархIилти поэтуни-писательтала произведениеби. Дахъал дусмазив узусири ил Шота Руставелила «Къапланна гуличевси нарт» бикIуси поэма шурбалтулира. Амма бегIлара халаси хIянчилизи халбарес вирар «Кьуръан» шурбатни.
М.ХIямидовла творчество руркъули саби республикала школабазиб, колледжуназиб, ДГУ-ла ва ДГПУ-ла филологияла факультетуназиб.
МяхIяммад Халимбекович мурталра жагьилтачил гьунивиусири ва къугъали ихтилатикIусири. ИмцIаливан биштIа-халатас гIяхIбилзуси илала «Хьаникъада» поэмаличила ихтилатуни думжутири.
Концертла программализир бутIакьяндеш дариб ДР-ла халкьла гIяртист Кьурбан Кьурбановли бекIдеш дируси пачалихъла далуйтала ва делхъанала «Дагъистан» ансамбльли, Эмилия Шихря­хIи­мовала бекIдешлиуб Дагъистанна операла ва балетла хорли, ДР-ла халкьла гIяртист Навруз Шахбазовли бекIдеш дирнила удиб халкьла музыкала гIягIниахълумала Оркестрли, Т.Мурадовла уличилси Дагъистанна Пачалихъла фи­лармонияла солисткаби ДР-ла халкьла бурибти гIяр­тистуни Пирдауз Камаловани, Диляра Надыровани, Ша­галай Мя­хIяммадовани, Умайра ШяхI­бановани, ДР-ла халкьла гIяр­тистуни Хадижат Жама­лу­ди­новани, Рукьият ХIямза­то­вани.
М.ХIямидовла «Батирай» би­кIуси поэмализибадли бу­тIа, поэтла гъай хIясибли да­­луйти делчIун Даргала му­зы­­кала-драмала театрла гIяр­­тистуни – ДР-ла бурибти гIяр­­тистуни Мухтар НухIовли, Салимат Шагьмандаровани, Саният Каримовани, Рашидат Ис­мягIиловани, гIяртистуни ХIясан Иминовли, Рабадан Ильясовли ва ГIябдусамад ГIялиевли. Поэзияла Театрла гIяртистуни ГIиса ГIямаровли, ГIяхIмад Кудиевли, Жамиля Закарьяевани, ПатIимат Маллаевани М.ХIямидовла произведениеби хIясибли композицияби гьаладихьиб. Балбуцличир зайдухъун поэтла «ЧIала», «Пекарня», «КьацIла къидикъ» ибти назмурти ва «Дила муэр» бикIуси далай.
Шадлихъ бузахъулри поэзияла Театрла гIяртистуни Жамиля Рабадановани ва Башир ГIябдуряхIмановли. Илданира поэтла назмурти делчIун.
Шадлихъ ахирличи бир­ку­хIели, Сергокъалала районна халкьла музыкала гIягIни­ахъ­лу­мала «Дубурланти» ансамбльли далай зай­бухъахъун.