ДР-ла Роспотребнадзор: «Арбякьунси жумягIлизир регионнизир COVID-19 изайзи бикнила 892 анцIбукь белгидиуб»
Дагъистанна Роспотребнадзорла ва регионна пачалихъла автоинспекцияла хIянчизартани жамигIятла транспортличир дяхIликалаби дихнила тяхIяр-кьяйда дузахъулил ахтарди дураберкIиб.
Ахтардила дазурбазиб, илдани, коронавирусла чейхъуси изала тIинтIхIебиахъес багьандан, Роспотребнадзорли гьаладихьибти лерилра тяхIурти дузахъес чараагарси биънила чебкад пассажиртачил ихтилат дураберкIиб.
Специалистунала гъай хIясибли, имцIаливан зягIипти-ургаб къаршибиркули саби жамигIятла транспортличил пайдалабикIути.
«Сепайда, гIергъиси замана умудеш гIеббурцнила законодательствола тIалабуни пассажиртани таманхIедирнила анцIбукьуни зумадиубли сари. Илди тIалабуни – дяхIликалаби дихни ва цаличибад ца тяйдили буъни – тамандирес лебтачилра хъарси саби. Илкьяйдалицун имканбикIур вегIла ва алавтала арадеш мяхIкамбарес, гьатIира кьяркьти ва къадагъалати тяхIурти далхIедуцили», — цIакьбарили буриб Управлениела чейхъути излумачи хIеруди бузахъуси отделла специалист Зейни Ахадовли.
