Дагъистанна культурала давла мяхIкамбирнила шайчибти хIянчизартани Хайдакьла районна Жигия шилизир мерладиубти культурала объектуни ахтардидариб.

Регионна кьадрила культурала объектуначир багьахънибала белкIани агниличи пикри бяхIчиаиб хIянчизартани. 1885-1886-ибти дусмазиб белшунси «М.Арслановхъала юрт» цархIил жураличи бикахъили уббухъун. Илала дурабадра, XVIII-XIX-ибти даршдусмазиб тIашбатурси «Сулайбанна сяхIбат» бикIуси культурала объектличи ацIес гьуни аги. Ила чIянкIли вегIдешла азбарлизивадцун сайри ухIнаухъес вируси.
Федеральный кьадрила культурала объектуназибад XI-XIII-ибти даршдусмазиб белшунси «Минараличилси мижит» ахтардибариб. Мижитла бурх ва бяхIяни ДСП-ла уркьлани кадуцилри, бяхIлизиб хутIла гьимир гьарглири. Илала дурабад, тIалабуни дуи, мижитлаб турбаличилси газла печьра кабизахъурлири.
Дагъистанна культурала давла мяхIкамбирнила шайчибси агентстволи Шилагьила шила Советла администрациялизи, Дагъистанна мер-мусаличибси Россияла лебдешла шайчибси федеральное агентствола отделлизи, республикала мас-мулкла ва ванзурбала шайчирти бархбасунала Министерстволизи мижитла вегI белгивирнила тяхIяр-кьяйда далдуцахъес, кагъурти дархьиб.