Чедетаахъили иб­гиб­ти жузала кьа­сур­би. Гьарил кьа­си­­личир декIар-декIарли хас­си низамличир автортала жузи. Ле­р илар выставкабира: «ГI.Абу-Бакарлис – 90 дус», «Поэт-им­провизатор Цан­далай», «Ба­тирайла наслу», «Л.Толстой – Кав­казлизив». Лацла бяхIя­на­­­чирад хIердикIули сари су­ра­тунала стендани, пасихIси мягI­­нала дугьби: «Жуз – рухIла давла», «Багьуди исуси ахIен, багьуди кайсуси саби», «УчI­хIев­­чIуси адам – гIявамси адам»…

ГIергъити 34 дус библиотекалис къуллукъ гIеббурцули рузули сари ПатIимат. Пачалихъли хIялалси хIянчи кьиматлабирули, 2020-ибил дуслизиб ПатIиматлис 50 азир къурушла грант бедиб.
Иличила сунела пикри бурули, Дахадаевла районна ЦБС-ла заведующая Зарина МяхIяммадова рикIи: «Нушала районнизир 43 библиотека лер. Чебетаахъили чула хIянчи бирути библиотекарьти камли ахIен. Аммаки ПатIимат ГIялибекова нушани сеннира декIарли гьанруршули дирехIе: илиниван жагали сунела хIянчила мер хIербирути гIур агара или бурахIеллира, хатIа хIебирар. Ил багьандан ишхIелла технологияличил гIеббуцес, 100 азир къурушла грантра КIишала библиотекализи бедибси саби…»
Залинала гъай марбирулри­ ПатIиматла столличирти компьютерли, принтерли, цар­­хIил­ти ИКТ-ла гIягI­ни­ахъ­лу­мани.
П.ГIялибековачи гьаман дугьабилзули бирар:
— Жан ПатIимат, бучIантала конференция дураберкIес кумекбарагу.
— Нушачи Расул ХIям­за­тов­ла выставкалис жузи дархьаагу.
— Гимназиялизи хIякьяду? Илаб литературала халаси байрам леб…
— Дагъистанна халкьла писатель Расул БяхIям­мадов­ли­чил гьунидаэс пикрибарилра. Па­тIи­мат, хIуни икьа­лах­Iе­би­риду?
КIишала урга даражала школала ва дахъал шалубар гимназияла цалра ихтилат шила библиотекарь агарли бетурхуси ахIен. БучIантала конференциябачи хIядурбикIути дурхIни илини библиотекализи жибиру, тяп учительли кьяйда, илдази хабурти ва назмурти дучIахъа, бажардихIеркусилис кумек гIеббиахъу.
«Гьарил балбуц ункъли бе­турхахъес гIягIнибиркур, — ри­кIули рирар ил. — Усалси даражаличиб бетаалли, гIур «вай-гьуя», «вай-гьарай» дикIнилизибад гIяхIдеш лебси ахIен…»
— ПатIимат-рузи, хIела китабхана кьалли балкьаурли саби, бучIанти-мага лебли биалли? – хьарбиулра илизи.
— Вай Аллагь, камкабаили кьадин бучIантира. Гьалаб азирцад адам бири жузи кайсути, гьанна имцIаливан школала дурхIни саби.
Компьютертани, телефонтани, телевизортани къагъбарили, жузла кьадри-кьимат хъумкартурли сари. Нушала ахIерси «Замана» газетала подшивкара, чус хIяжатбикибхIели, хъусли бихули саби, чули биалли къулбасбарес пикрибирули ахIен. Адамтала илгъуна авараагардеш сецадхIи кавлуси?..
— Сен саби сагати жузи диахънила хIяракат?
— БекIлил гапбареси ахIен. Гьар-ур типографиябани заманаличир нушачира жузи дурхьули бири. Гьанна имцIаливан автортани чула харжаначил жузи дуракайули сари: ил багьандан автортани хIехалли, илди жузи нушала библиотекализи диули ахIен…
Нуша гъайдикIули лерли, библиотекализи гимназияла завхоз Кьурбанкьадила ХIясан ацIиб. Илис кIишанти имцIаливан Суратчи ХIясан или бикIар, сенахIенну Совет хIукуматла замана ил пагьмучевси суратуни кайсан (фотограф) вирусири: илала суратуни жузазир, газетабазир ва журналтазир чедаэс вирар.
— Иш авторла гIур жуз хIе­бур­гиду? – дугьаизур ХIясан, шалкIубад Гъ. Юсуповла «ХIер­ли…» бикIуси жуз дурайсули ва ПатIиматлизи гьабурцули.
— «ХIердикIехIе, хIер!» белчIунрив?
— Юх, биха хIела жан дат! Ил авторли дахъ дурусли гIямру чедиахъули вирар кьалли. БархIехъ дила рархкья ПатIиматра лехIризахъурли, белчIишану…
Жузличи гьачамлис иштяхI бетхIехъибси дила шан чеибхIели, нура паргъатли уэс хIейубра.
— Юлдаш ХIясан, нешла мезличи хIезир диги кали далан? – хьарбиулра.
— Нешла мез хIейгахъес вирар чIянкIли неш хIейгахъуси, илала хIурмат хIебируси адам. Ну илгъуна ахIенра. Нушачиб рурси Оксанала кIел урши леб. Илдазирад телефонтира керасили, «Замана» ва «Шила гIямру» газетабира дедили, ца-ца гIямзила кабалтулра. ГIур, се багьуррая или, жавабтира тIалабдирулра…
Суратчи ХIясан арякьунмад, библиотекализи школала гIямрула хIябал рурси абацIиб. Илдала някъбазир жузи аги, ПатIимат акьурухъайчи хIерли, унзала гьалаб тIашбизур.
— Нуни хIушала мурад иргъулра, дила ахIерти. Сегъунти делхъ дагьес дигулрая? – дугьаризур ПатIимат рурсбачи.
— Ахъушала делхъ. Нушала гIядатунала сценкализир илди делхъ лерти сари…
ПатIимат ГIялибекова набчи хIерризур, ва нуни аргъира: илис, рурсбира барх букили, цаибил дерхIличибси клублизи карацIес гIягIнисири. Ил библиотекарьцун ахIенну, шанти-ургар рурибси далай-делхъла устара сари. Сунела пагьму сахаватли дурхIнасра буртIу.
Бахъбааб хIела бучIанти, ПатIимат-рузи!
Библиотекала хIянчизартас багъишлабарибси ил назму гьан­бикахъиб, КIишала шила библиотекала заведующая Па­тIи­мат ГIялибековала китабханализи ацIибхIели. Ил газета бучIантасра гьалабирхьулра:
Жуз гьалмагъбуцибсила
ГIякьлу бикьурси бирар,
Жузличи къакъгьавсила
Дагьри назикли дирар.

ГIилмула гIинзивадли
Ужули шин хIеделгъан,
Сецад ужули хьалли,
Милиги ахъес хIейрар.

Дагьрила ахъанайти
АхъикIуцад ахъдикIар,
СихIру табтуртазирти
Руркъуцад муръидикIар.

ИшбархIи жуз-табтарла
ХIебагьурсини кьадри,
ЖагIял адабла, яхIла,
МажахIят багьес кьадри.

Азирти бузри, дусми
Аркьян тIашбизагарли,
Амма дагьрила лами
Кавлан цалра жуз лебли.