Ишди бурхIназиб республикала тах шагьарлизибси Администрацияла юртлизиб Дагъистанна 7-найс бучибси Халкьла Собраниела 1-ибил сессия бетерхур. Илизир бутIакьяндеш дариб ДР-ла БекIла къуллукъуни заманалис дузахъуси Сергей Меликовли, сенатор Ильяс Умахановли, депутатунани ва цархIилти хIурматла гIяхIлани.
Республикалис дебали мягIничебси ил балбуцличиб ДР-ла Парламентла председатель ва илала заместительти бикIиб. Сагали викIибси Халкьла Собраниела Председатель Заур Аскендеровли Юрий Левицкий сунела цаибил заместительли катур ва цагьатIи заместительли — Камил Давдиев.
Илкьяйда, 7-найс бучибси Халкьла Собраниела комитетуни акIахъуб ва илдала руководительтала уми дуриб.
Сагали бучибси Парламентличила сунела пикри бурахъес ДР-ла 7-найс бучибси Халкьла Собраниела депутатли сайси ДГУ-ла ректор МуртазагIяли Рабадановличи дугьадизурра.
«Халкьла Собраниела тарихлизиб бегI гьалаб саби имцIатигъунти депутатуни барсбарибти – 90 депутатлизибад 60 сагати саби. Сагали бикIибти депутатунани саби бикIибтачил бархбас калахъниличи вирхулра.
Дагъистанна пачалихъла университетла ректор сайлин наб дигесли саби, депутатуни-ургаб нушала выпускникуни бахъал лебни. Иличи че, Халкьла Собраниелизиб, ну ахIентира, ДГУ-ла хIянчизарти леб: ГIялимурад ХIяжиев – Экологияла ва ибкьли гьалабяхI башахънила шайчибси Институтла директор, Юсуп Умавов — маркетингла кафедрала заведующий ва Ильман ГIялипулатов – электронный СМИ-бала кафедрала заведующий. Илкьяйда Парламентлизиб депутатунала халаси ахIенси кьукья бетаурли саби, сабира бегIлара мягIничерти масъултазибадси — гIилмула ва багьудила масъала — чучи чесес бирути.
Ну биалли Дахадаевла районна жамигIятли набчи хъардарибти масъултази ихъус».
Аминат ГIябдулманапова, Дагъистанна халкьла поэт:
«ХIера, РФ-ла Пачалихъла Думализи ва ДР-ла Халкьла Собраниелизи кандидатуни биркIнила хIяракат ахирличи бикиб. Парламентлизи гIяхIти ва машгьурти адамти каберхур. Илдала лугIилизиб нушала дагъистанлантира лебниличи ну дебали разириубра. Илдани халкьла гIямру-яшавла даража, нушала республика ва арагIебли улка гьаладяхI ардукес хIяракатбиру или гьанбиркули саби. Нушала жамигIятлизир гIяхIлашалти дарсдешуни кадиркниличи, гIядатла адамтала гIямру ункъдирниличи рирхес дигулра. Илала хIекьлизир парламентлизи каберхурти лебтасалра сархибдешуни дулгулра. Сагаси цалабяхъ халкьличила пикрибикIули, чучи хъарти ункъли тамандирули бузули дигулра».
