Дагъистан Республикала арадеш бихIнила шайчибси Министерстволи тухтурти ва фельдшерти «Земский доктор» ва «Земский фельдшер» программализир бутIакьяндеш дарахъес жибирули саби.

Гьарахъти дубурла шимази тухтурли узес вякьунсили гьачамцун лугути 1,5 миллион кайсу, фельдшерли узес вякьунсили биалли – 750 азир къуруш. ЦархIилти шимала районтази яра диштIати шагьуртази (Дагестанские Огни, Кизилюрт, Южно-Сухокумск) бузес бякьунти тухтуртас 1 миллион къуруш ва фельдшертас 500 азир къуруш луга. Шимазиб биалли гьар журала тухтурти хIяжатли саби.
Чараагарли дураберкIес гIягIниси тIалаб – вягIда хIясибли бегIлара камли 5 дус узни. Программала дурабад районтала администрацияби тухтурти социальный бяхIчибизла аги-кьяйдализибра гIеббуцес мурталра хIядурли бирар. Илкьяйда тухтурти яра фельдшерти илаб гIямрула гIямрулис бузули калес бирар.
Программа 2021 ибил дуслизибра республикализиб бузули лебал: ишдуслизир тухтуртас 180 мер ва 15 мер фельдшертас чедаахъибти сари. Гьанбушибси программа хIясибли ишхIейс 50 специалист хIянчиличи кабиили, бузра бузули саби.
ГьанбиркахъехIе, программализир бутIакьяндеш дарес дигутала дусмачи хIербикIули ахIен. Илала тухтур виънила документ биахъес гIягIнили саби – диплом, сертификат яра свидетельство.
Шила мер-мусаличиб тухтурла хIянчи баргили гIергъи, «Земский доктор» программа хIясибси вягIда бигьахъес, гIергъиси адрес хIясибли ДР-ла арадеш балтахънила шайчибси Министерствола Отдел кадровлизи вакIес гIягIнибиркур:
Абубакаровла уличилси кьакьа, 10-ибил юрт, 1-ибил дерхI.