Россияла арадеш мяхIкамбирнила кабиз коронавирусла чейхъуси изала сагали цIакьбирниличи хIядурли саби, эгер гIебшнилизиб илкьяйда бетаалли. Иличила балахъули саби Москвала Коммунаркализибси больницала бекI тухтур Денис Проценкони.

Илини гIергъиси ца байхъала дусла бухIнаб саби коронавирусла изайчил бузес бурсикабиъниличила буриб, илкьяйда госпитальти адамтала арадеш ахтардибирути центртачи шурдалтес булан, медучреждениеби хьулчили дуцили.
«Иличибли аргъес вирар нушала урехи агниличила, сентябрьличиб анцIбукь чидил шайчибяхI барсбиалра», — викIи ил журналистунази.
ИлхIелира тухтурли изала сагали цIакьбирнила урехи лебни уббирхъули ахIен. Илала пикри хIясибли, анцIбукь сегъуна бетарарал имцIаливан адамтазибад саби дигуси. Аги-кьяйда кункдиахъес багьандан, коронавирусла чейхъуси изайзибадси вакцина лебтазилра барахъес гIягIнибиркур.
«Адамтас вакцина барес гьамадли ва матъал бетаахъес багьандан, пачалихъла кабизунани хIянчи дигесси тяхIярли тIашбатурли саби», — цIакьбарили буриб Денис Проценкони.