ХIушаб арадеш булгулра!

Нуни мурталра «Замана» газета кайсуси саби ва иштяхIличил иларти макьалаби дучIули рирус. Хаслира наб гIяхIдилзан ХI.Ражабовла, П.Кьурбановала, Н.Гъуруевала, П.Казимовала, П.Сулайбановала, П.Маллаевала, П.Мирзаевала, Р.Ражабовла, И.Ибрагьимовла, К.Рабазановла ва цархIилтала белкIани.

Республикализибти даргантала сархибдешуначила ва гIяхIти баркьудлумачила баянтачилси ил газеталичи ну мурталра хIерли рирус ва, някълизи касибмад, цалра убхIебатурли, лерилра белкIани халаси гъираличил дучIра дучIас.
Ишдуслизиб «Замана» газета даршал дус биънила шадлихъличил дархдасунти къугъати макьалабира назмуртира лергIер гIяхIдизур. Газетализирти суратуначира дигиличил хIеррикIаси ва гьалаб лукIули калунти журналистунира дила хIулбала гьалаб лебтиван бизур, илдала белкIани гьандикиб.
Гьанна шадлихъ дураберкIибхIейчибадли замана арбякьи биалра, редакцияла хIянчизарти чула дурхъаси байрамличил мубаракхIебарес хIериубра.
Даршал дус камси манзил ахIен адамтала рухIласи давла гьалабяхI башахъули, бамсриагарли бузули, коллективли, бахъал даргантачила къугъати макьалаби дубурла гьарахъти шимази диахъули, беркIибси. Ил манзилла духIнар чумра багьадурла уркIби разидиахъуб дургар ил газетали, чумлара юртлизи гIяхIла хабуртачил дурхъаси гIяхIялван, абацIиб бургар ил. Амма газета чум дус биалра, бухънабиуси ахIен, ил замана арбашуцад жагьбикIули, ахъбикIули, гьалабяхI башуси саби. Илкьяйда сабухъчерли дузахъес арали ва хIулкIули калабая, дила ахIерти газетала хIянчизарти.
Нуни макьалализир уми гьандушибти ва гьанхIедушили калунти «Замана» балкьарахъути лебилра хIянчизартас чархла арадеш, хъалибаргуназиб балгундеш, бузерилизир сархибдешуни ва хъулразиб баракат диубли дигулра. Гьаннала гIергъира илкьяйда бамсриагарли дузули, дарганти разибирахъули, хIушала пагьмурти дугадикIахъули калабая.
Берхъаб, хIурматла даргантала рухIла шалдали бетаурси, газетала балгунси къушум!