Арбякьунси жумягIлизиб «Дагестанская правда» газетала конференц-заллизиб ДР-ла шайчибси Россгвардияла Управлениела бекIла заместитель, полицияла полковник Навруз ХIусейнов журналистуначил гьуниваиб. Конференцияличир хIердирути аргъбаибти масъултазибад бекIлибиубсигъунали бетаур «Об оружии» бикIуси федерацияла хIукмулизи дарсдешуни кадерхахъниличила суал.
Навруз ХIусейновли буриливан, гьаннала дарсдешуни хIясибли, гIяяркьянала тупанг яра цархIил ярагъ асес адамлис 21 дусла гIямруличи ваайчи асубирули ахIен. ИлхIелира ярагъ ва ил пайдалабирахъес ихтияр бедайчи ахтарди дурабуркIуси саби. Судлизи викибси, такьсир барибси, яра бержили машинала рульличив уцибси адамлис ил бедлугуси ахIен.
Илини гIурра гьанбушиб, ярагъ беткахъахъибсини бусягIят Россгвардиялизи багьахъес гIягIниси саби или. СенахIенну кIинайс ил шайчир вайти асурти акIес асубирар.
«Гьанна бусягIят ярагъ пайдаладирахъес бедлугуси ихтияр (лицензия) касес яргализи кабизуртала лугIи республикализиб 90 азирличи абиркули саби. Илдазирти ярагъла лугIи 120 азирличи абикили саби», —викIи Н.ХIусейнов.
Конференцияла дазурбазиб Навруз ХIусейновли журналистунала саултас жавабтира дедиб:
— Илди лерил дарсдешуни нушала республикализир мурт дузескайу?
— Сагаси багьахъни лукIуси бекIлибиубсигъуна Интернет – порталлизиб ил хIукмуличила 2021 ибил дусла июньна 28-личиб кабяхъили саби. Амма ил гIямрулизиб бетурхахъуси саби, ил бархIиличибад бехIбихьили ца дусла манзил бикибхIели.
— Лицензия пайдалабирнила замана бикалли се барес гIягIниси?
— Лицензияла замана бикибхIели, сагаси ил кахIесибсиличи гIякIа чебирхьуси саби. Илкьяйда 6 базичибад бехIбихьили, дусличи бикайчи ярагъ пайдалабирнила ихтияр кебасесра асубирар.
Ил багьандан Госуслуги сайтличи ухIнавхъи, сегъунти документуни дучес гIягIнисил якьинбарили, заманаличиб саул бекIбарни хIяжатси саби.
Конференцияла дазурбазир илдигъунти аргъбаибти дахъал масъулти хIердариб. Ахирличиб Навруз ХIусейновли конференцияла бутIакьянчибас баркалла багьахъур.
