ДуцIрумла каникулти бучIантази бамсриахъахъес, илди сагати цIакьаначил бегIбиахъубли белчIудила сагаси дусличи хIядурбиахъес имкан лугутили детаурли сари. ДурхIни адаблашал ва арадешлизиб чеахъбикIули, гIямрулизиб гьалабяхI башнилизиб белчIудила заманализибад акьули биънила бурес агарли халаси пайда леб. Ил заманализиб ца дуслизир бучIантала бекIлизи цаладикибти пагьмулашалси бузериличил дархдасунти пикруми дурхIначирад гьарахъдиркур, илдала вяшатIайзир, гьарил баркьудилизир дирхалачердеш хьурадирар. Кьаркьайзибси кьуватчебси, дурхIнала пикрила, гIякьлучебси бузерила гьунар каникултала гIергъи багьесли имцIабирар. Илис бикьрили бетаур хIерила заманализиб дурхIнази бамсриихъахъес нушала школализиб акIахъубси лагерьра. Илдигъунти лагерьти ишхIели чараагартили ва имцIали хIяжатдеш лебтили детаурли сари. ДуцIрумлизиб бамсриихънила гIяхIдешличивли, гьарил учIан творчестволашал ва пагьмулашал гьалавяхI вашули, гIямрукад ганзикIар. РухIлашал ва адаблашал имцIали гьалавяхI арякьунси дурхIяли искусстволашалти, культуралашалти масъултира ункъли бекIдиру.

ДурхIни сунезиб кавлуси дуцIрумла лагерь нушала школализиб, районна бекI МяхIяммад ГIямаровла, районна багьудила управлениела начальник Ханум ГIисаевала, ва нушала школала директор З.Ш.Шагьнавазовала къайгъначибли абхьибсири. ХIябал жумягIцадхIи дурхIнани сунезиб бамсриихъули калунси лагерьла бузери воспитательтала чихъси хIерудилиуб калун. Илаб бузери бехIбихьес чумал баз гьалаб лагерьлизиб бузахъес воспитательти, технический хIянчизарти хIядурбарибтири, бучIантала ва илдала бегIтала пикруми хIисабдарили, илаб дурхIнани бамсриихънила шайчибси план, илди кабиркьес мерани хIядурдарибтири. Гьар бархIилизир дурхIнас хIязлис хасдарибти, умудешла, санитарияла тIалабуначи далдикибти шуртIрачилти мер-муса далкьаахъуртири. Лагерьлизиб бамсриихъуси отрядлизиб 5-7-ибти классунала бучIанти сабри. Илар дурхIнала арадеш ункъбикIахъниличи дяхIчиаибти ва бамсриихънилис лергIер кьабулдикести лерилра шуртIри акIахъубтири.
ДурхIнани илар декIар-декIарти хIязаназир, концертуназир, лагерьлизир дурадуркIути жамигIятлати гIяхIцад цархIилти далдуцуназир жигарла бутIакьяндеш дирутири. Иличибли, лагерьлизибти дурхIни цахIнабли уржибси, сегъуна-дигара, гьалабихьибси масъала бекI­барес хIядурси, бархси цIакьличи шурбухъунсири.
Разидешличилти ва хъумхIертестили детаур лагерьла смена ибхьниличил ва гIейкIниличил дархдасунти, «Экологияла жумягI», «Дила Дагъистан» далдуцуни.
ДурхIни халаси разидешличил ва иштяхIличил миллатлати ва ишхIелила заманаличи далдикибти делхъли булхъутири, багьуди гьалабяхI арбукнилис хасдарибти фильмабачи хIербикIутири, илдани декIар-декIарти, спортла хIязаназир ва абзаназир жигарла бутIакьяндеш дирутири. ДурхIни делхъличи бурсибирутири шилизибси культурала центрла директор Къурбанкъиз Ханакаевани. Илдачил далуйтала конкурс дураберкIиб ДР-ла ва ЧР-ла халкьла гIяртистка П.Кьагьировани. Школализибси дурхIнани бамсриихъуси лагерьла начальник Раисат ХIяжигIялиевани жирарни хIясибли, заманара баргили, ил хасси архIяличил нушала дурхIнас далуйти делчIес ракIибсири. БархIи ахъайчи бучIантачил кали, чаррулхъухIели, ПатIиматли дурхIнас делхъли булхъухIели челгьути, хасти палтар савгъатдариб. Иличи нуша дебали разидиубра.
ДурхIнас хаслира дигиауртили детаур изобразительное искусствола шайчирти дурсри. Илдани ил шайчирти пагьмуртала дигIяндешуни дяркъур. ДурхI­на­ла лерилра хIянчурби выставкаличир чедаахъес гьа­ладихьибтири.
«ГIямрула ара-сагъси тяхIяр» дурхIнази камти гIям­руличибадал гIебисахъес чараагарси саби. Лагерьлизир иличила бурути ихтилатуни, экскурсияби, шадлихъла далдуцуни дурадуркIнили дурхIназиб чула арадеш мяхIкамбирниличи иштяхI хьурабиахъуб. Нушала физвоспитательли гьар бархIилизир дурхIначил арадеш къулайбирахънила (ункъбирахънила) шайчирти далдуцуни дурадуркIутири.
Спортличил дархдасунти дурсри лагерьлизир чараагартили детаур. ДурхIни имцIасигъуна заманализиб умуси гьаваличиб бирутири. «Веселые старты», «Спор­тивное ориентирование», «День наоборот» ва цархIилти далдуцуни биалли, спортла заллизир дура­дур­кIутири.
Халаси пикри бяхIчииусири культураличи, арадешличи ва ил мяхIкамбирниличиван, дурхIнази гьундурачибад башнилис, цIадиркнилизибад урехи хIебиахъ­ниличила их­ти­латуназиб иргъахъниличи. Лагерьлизибси лебилра замана дурхIнани декIар-декIарти тама­ша­ла анцIбукьуначил тяниш­бирниличил буркIусири. Гьарил челябкьуси бархIи ил­дас шалгIеббухъунсиличи мешули ахIенсили кавлусири. Гьарил дурхIялис «ЗурхIяб» лагерь гIямрула сагадешуначил гьунибаиб: чили-биалра илаб сагати юлдашуни баргиб; цархIилли сунезир сегъунти-биалра пагьмула шалуби лерли диъниличила багьур.
Нушаб «ЗурхIяб» лагерьлизир дуцIрум деркIибти дурхIназир хъумхIертести гьанбикуни хьурадиубли калниличи, дирхес дигахъира.