СирхIяла бегIлара ахъти дубуртази мерладиубли сари Дахадаевла районна ДугIахъарла ад­ми­нистрациялизи кабурхуси СурсалабачIи ва Кьяр­ба­чIи­махьила администрациялизи кабурхуси ГIяяц­ци бикIути махьурби. Илди шимала ургаб дубуртала сирт лебли биалра, бахъал гъамти ва тухумти хIер­би­ру­ли саби кIелра махьилизиб.

ГIябдуллагьла дудеш Шамил ГIяяц­ци­лизивадси сай, неш Муъминат — Сур­са­ла­бачIилизи­радси. Ил хъалибарглис хIер­биэс кьадарбиуб Къаякентла район­низибси Кьяр­ба­чIимахьила «Губа» бикIуси хъарахълизибра. Гьанна илис хъарахъ бикIули хьалли, ши бетаурли саби ва кьярбачIимахьи­лантицунра ахIи, цар­хIилти миллатунала адамтира хIербирули саби илаб.
БусягIят ГIябдуллагь Рабаданов нешличил ва халаси рузи ПатIиматличил МяхIячкъалализив хIерирули сай. Муъминат республикала дахъал шалубарси дурхIнала больницализир тухтурли рузули сари. ПатIиматра школализи рашули сари. ГIябдуллагьли ишдус 4-ибил класс отличноли учIули, таманаиб ва лябкьуси дуслизивра ункъли учIес багьандан гьаннадал хIядурикIули сай. Дигахъу илис дурсрачи хIядурикIес, чеимцIати багьудлуми касес кумекли детарути передачабачи хIерикIес.
— ГIябдуллагьла хIянчурби хIядурдируси кабизахъурси замана лебси саби хъулиб. ИлхIели илизи сей­кIалра, илини я бикьуси, я чебиуси лебси ахIен, — бурули сари Муъминатли, — ил илцадра дурсрази ахъили вирар, хIятта алавси дунъя гъятIбиръалра шакхIеркур. Ил дебали чекайзурли вирар гьарил дарс ункъли хIядурбарес багьандан, сеннира бехIбуцибси таманхIеилира хIебалта. Илис дигахъу низам ва чебетаибдеш.
Дигеси саби ГIябдуллагь спортлизивра гIяхIил бажардивиркни. Залумси ва кьасчевси урши челябкьлализив гIяхIси спортсмен ветарниличи вирхес вирар.
— Дарган мез дигахъиду? — рикIулра ГIябдуллагь­ли­зи.
— Сен хIейгахъути вегIла нешла мез? — викIар урши, — ишбархIира «шула» кьимат касира ил предметла.
Багьесли саби илала дарган мезла ва литературала мугIяллим Кьурбанова Луара МяхIяммадовна черетаибси ва къайгъичерси педагог риъни. СенахIенну сирхIяла лугъат дебали декIарбулхъуси саби литературала мезлис хьулчили детаурти Ахъушала мезлизибадли. Илкьяйдали литературала мез дяркъес багьандан ГIябдуллагьлисра гьамадли хIебурги, амма сунела дигуси учительницала къайгънира уршила чекайзурдешра дугIли архIедякьун. СирхIян багьадур уршили гьанна даргала литературала мез ункъли далули сай. Дигеси саби шагьарлизиб хIербирути илдигъунти дурхIнас вегIла нешла мез гIяхIдилзни.
ГIябдуллагь илкьяйдали белчIудиличи ва бухъя-зегъаличи чекайзахъес багьандан къайгъилизир рирар уршила классла руководитель Саида Сефибековнара. Илини гьарил дурхIяличил чебетаибси хIянчи дурабуркIу ва илдазивад гьарил бархкьябачил абзикIули ва гIелахIелхъули учIахъес чекарилзан.
ХIед бегIлара дигуси предмет чидил саби ибхIели, ГIябдуллагьли гьалакхIейкIули жаваб чарбатур математика саби или. Ил гьамадли ахIенси предмет ункъли балули гIергъи уршилис цархIилти предметуни дяркъесра къиянхIебулхъниличи вирхес вирар.
ГIябдуллагь дила узикьар Шамилла рурсила урши сай. Урши сунела хала дудешличира чарх-сипатлизив дебали мешуси сай. Шамил кьяйда ункъли учIесра бажардииркули сай.
СирхIяла шимазив машгьурси гIяхIгъабза вирусири Шамил. Адамдешла лерилра черикIла къиликъуначил вегIиубси иличи мешубикес дигути камли хIебири. Илгъуна бахъал халкьла хIурматличи лайикьикибсили ва адаб-хIяяла ахъанайтачи ваибсили ГIябдуллагь халавиъниличира рирхес дигулра.