Сентябрьла 12-личиб Хайдакьла районна Мажалисла шилизиб, ДАССР акIахъубхIейчирад 100 дус дикнилис хасбарили, «Бизиси Хай­дакь» бикIуси хал­кьани-ургабси I-ибил фес­­тиваль дураберкIиб. Бал­буц ДР-ла халкьла ху­дожест­волати ваяхI дирнила ва туризмала шайчибси Ми­нистерствола икьай­чил Да­гъис­танна берклумала уст­на­ла Ассоциацияли ва «Хай­дакьла район» МР-ли дура­беркIибсири. Иличир Хай­дакьла районна бекI ГI.Те­мир­булатовли, ДР-ла ту­­риз­мала шайчивси министр Э.Мер­да­нов­ли, Хай­дакьла районна ХIурматла адам, ге­нерал-лейтенант А.По­нидел­кони, РФ-ла, ДР-ла ва халкьани-ургарти ху­регуни ди­­рантала ассоциациябала вакил­та­ни, ил­кьяйдали Дагестанские Огни шагьар­ла, БотI­­лихла районна бургани ва цар­хIил­та­ни­­ра бутIакьяндеш дариб.

Жагали балкьаахъурси Игитунала дякькадли Ахъушала, Дахадаевла, Лакла, Хунзахла, Къарабудагъкентла ва цархIилти районтала вакилтани майдунти гьаладихьилри. Илдани выставкаличи чула культурала лишанти кадухилри ва тамашала бизити хурегунани столани даршилри.
«Кайтаги» центрли, районна библиотекали, дурхIнала пагьмуртала школали, илкьяйдали мирхъи адилкьантани, тIутIи дашахъантани, машгьурси художник, ярагъла уста К.Загьировли Хайдакьла район гьалабихьиб.
Берк-бержла продуктунала фестиваль ибхьули, районна бекI ГI.Темирбулатов лебтачилра саламтачил дугьаизур ва илдигъунти далдуцуни гьар дус детурхар или багьахъур.
«Лябкьуси дуслизиб нушани Хайдакьла цивилизация 1500 дус биънила шадлихъ дурабуркIуси саби. Нушала ванзали гIяхIцад секIал чедаибти ва чекасибти сари. Чула ахIерси неш-ВатIа хъархIерагардеш батахъес багьандан, нушала хала бегIтас дурала улкнала гъармукабачил даим бургъес чебуркъибсири. Гьанна нуша Россияла белхъхIебелхъуси бутIали детаъни багьандан, паргъатли хIердиэс, бекIахъудила-экономикалашал гьаладяхI дашес, илкьяйдали районнизиб туризм гьалабяхI башахъесра имканбикIули саби. Районна лебилра халкь биштIаси ва ургабси бизнеслизи ахъахъес жибирулра, туристуналара шанталара хIяжатуни детурхахъес. Нушани илдас шуртIри алкIахъехIе. Лерилра байрамличил мубаракдирулрая!».
ГIяхIланира регион бекIахъудила-эко­но­микалашал гьалабяхI арбукьнилис туризм гьаликIли бетарар или буриб, берк-бержла туризм биалли, мурталра мягI­ни­чеб­­сили кавлан. Хайдакьла ванзаличиб ха­ласи кьадрила фестиваль дура­беркI­ни­лис илдани районна бекIлис баркал­ла багьахъур.
Мубаракла дугьби дурили гIергъи, ГI.Те­мирбулатовла бекIдешлиуб ва зирнявла агурбауб гIяхIлани майдунти хIердариб, миллатла хурегунала ва республикала ши­мала хозяйствобани дураибти масанала тIем багьур, илди бялихъуначил тянишбариб. Фестивальличир илкьяйдали халкьла художестволати ваяхIла ярмарка дураберкIиб, халкьла санигIятунала ва баркь-бацлизиб пайдаладирути жагадешла шайчир устадешла дурсри кадихьиб. Майдунти дагъистанлантала гIядатла юрт-азбарличи мешудикахъилри. Балбуцличир Дагъистанна ва дурала улкнала хурегуни дирнила устнани бутIакьяндеш дариб.
Фестивальла дазурбазиб ДР-ла мирхъи адилкьантала Ассоциацияли районнизир мирхъи адикьес халаси къайгъи дакIубарнилис ГI.Темирбулатовлис Баркаллала кагъар бедиб.
Берклумала тIем багьурли гIергъи, районна бекI ва гIяхIли «Кайтаги» этноцентрлизи бякьун. ГI.Темирбулатовли, Э.Мер­дановли ва Р.ХIямзатовли хIунтIена чял кьицIбариб ва ил центрлизиб выставкаби дурадуркIуси сагаси хъали абхьиб. ГIур илаб «Развитие сельского туризма в Рес­публике Дагестан. Проблемы и перспективы» бикIуси темала чебкад «журуга стол» дураберкIиб. Илар шила туризм гьа­ла­бяхI башахъес виэсти масъулти хIер­дариб.
Берк-бержла фестивальлизи концертла программара каберхахъурлири: ГI.Ба­тирайла уличилси Даргала театрла гIяр­тистунани ва Хайдакьла районна гIяр­тистунани, зайдухъахъунти далуйтани фестиваль гьатIира жагабариб. Илкьяйдали фестивальличир Хайдакьла някьишли жагадарибти миллатла палтарра чедаахъиб.
ГIяхIлани Дагъистанна кухнялис чихъси кьимат кабатур. Хайдакьла, Къарабудагъкентла ва Сулайбан-Стальскийла районти Гран-приличил шабагъатладариб, илкьяйдали фестивальла лебилра бутIакьянчибас грамотаби ва медальти дедиб, конкурсла судьяби биалли, дипломтачи лайикьбикиб.