Дагъистан машгьурбарибси шягIир

Ишди бурхIназиб, гьар дуслизиб кьяйдали, литературала «ЦIуба къургъала бурхIни» фестиваль бетурхули саби.

Ил дявила майдунтачиб алхунти бургъанти ­гьанбикахъили, дурабуркIуси рухIлашалси байрам саби. Кабизахъурси саби ­Дагъистанна халкьла поэт Расул ХIямзатовли. ШягIир вебкIили гIергъи, фестиваль ил акIубси бархIиличил ­бархбасахъунси саби.
Республикализи, Дагъистанна халкьла поэт Расул ХIямзатовла, Россияла декIар-декIарти регионтазибад ва дурала ­улкназибад поэтуни-писательти бакIили леб, илди далдуцуназир бутIакьяндеш дарес багьандан. Илдазибад бахъалгъунти ­Дагъистанна ­педагогикала университетла студентуначилра къаршибикили саби. Гьунибаънибачир гIяхIлани чула назмурти делчIун, ишхIелла литератураличила гъайбикIули калун ва суалтас жавабтира дедиб.
Нушачи гIяхIладли бакIибти поэтуни-писательтала ургаб леб Сириялизивадси поэт ва тилмаж Ибрагьим Истанбули, Саудунала ГIярабиялизивадси поэт, тилмаж Хашим Альджахдали, Москвала, Санкт-Петербургла, Воронежла, Башкортостан Республикала, Ингушетия Республикала, Чечняла Республикала, Смоленскла, Ивановла, Ярославльла областунала писательтала организациябала вакилти.
Сентябрьла 8-личир, Расул ХIямзатов акIубси бархIи (ишдуслизир ил акIубхIейчирад 98 дус дикили сари), ­Тарки-Тау дубурличибси шягIирла хIябличи ва М.Горькийла уличилси ­Урусла драмала театрла гьалабси поэтла памятникличи вавнала халуби кадихьиб. Илди далдуцуназир бутIакьяндеш дариб Дагъистанна БекIла къуллукъуни заманалис дузахъуси Сергей Меликовлира.
Илкьяйдали МяхIячкъалализиб «Расул ХIямзатовла назмурти дучIулра» бикIуси поэзиялашалси балбуц бетерхур. Илаб гьарил дигусилис имканбакIиб поэтла назмуртачи лехIяхъесцунра ахIи, суненира илди делчIес. МяхIячкъалала искусствобала школала бучIантани биалли, шягIирла назмурти хIясибли, ­далуйтира зайдухъахъун.
Буралли, лебилра дунъяличиб Дагъистан ­машгьурбарибси шягIирла хIурматбирнила далдуцунани декIар-декIарти ­миллатунала вакилти уржахъули саби. Адамлис ­гьалмагъдешла хIялани биалли, рухIла давла чебирцIахънилис, поэзиялизив гьалавяхI вашахънилис кумекли детарар.
«ЦIуба къургъала бурхIни» бикIуси балбуц гьанна гIяхIси гIядатли бетаурли саби, суненира дурала улкназибад ва улкала цархIилти регионтазибадти шягIиртицунра ахIи, нушала Дубуртар Улкала пагьмучебти адамтира цалабирхъуси, жагьилтазир поэзияличи ва прозаличи иштяхI-диги адилкьуси, адамдешла чихъти къиликъуни черяхIдируси произведениеби машгьурдируси.