«Пикри гIеббуцес чебиркур»

Дубуртар Улкализи хIеб садаибмад декIар-декIарти ­арцантала далуйти зайдикIескадирар. ИмцIаливан чатIни дирар илгъуна гIяхIла хабарличил ­далуйта дучIути. ­Арцантала далуйтани чебсаргъахъу дубурла ­къугъаси тIабигIятра, илкьяйдали арцантала макьамтаур ­вава-кьарли сагнира кьалтинтачи шурдулхъахъа.
Литературализира илкьяйдали ­хабарагарли бухIнабулхъули бирар сагати лукIанти. ­Илданира чатIнаниван алавла белхIехъес, лебталалра уркIби ­разидарес кьасбиру… Амма гIергъиси замана илдигъунти лукIанти бахъ камли кьадин. Биалра, редакциялизи чула ­назмуртала ва цархIилти белкIанала духемличил абицIутас нуша лергIер разили гьунидиутира, илди гIеббуцес мурталра хIядуртира.

Иш гьакIлис нушачир гIяхIладли сари хIурхъан ­исбагьи Насибат ХIяжиева. Ил Краснопартизансклизир мугIяллимли рузули, дарган мез гьаладяхI дашахъес, илди мяхIкамдирес къайгъназирси сари. Дигеси саби илини наз­мурти лукIнира.
ХIера, се рикIулил ил нушачи дугьарилзули:
«Нуни делкIунти назмурти дахъал лер, илдазирад ­чумал газета бучIантасра гьаладирхьулра. ЦацахIели ­лерилра дугьби мачнала баки кьяйда каргьесли хIядурли дирар, цацахIели биалли, гужли, някъбазибад гъярцIа, ­назикси ­гьимирван дагьрилизирад дугьби ­деткайхъахъули ­пикрумала чебетаибдеш булъан. Сен-биалра ца ­кабатурси кIантIличи хъаряхъили, берхIила нурличи хIеръили, ­нургъбала кIантI чебаили назму цалабирхъули вирар ­поэтли. ИлхIели сай ил гьарли-марси поэт, амма дила белкIанас сегъуналра кьимат кабатес нуни хIерирус. ПатIимат ­Кьурбановала бугаси хIерли чедидяхъили, илди газетализир ­дурадухъахъес ихтияр баралли, хIушанира илди дучIадая ва сегъунти-биалра пикруми алкIан. ГIяхIмадхан Абу-Бакар викIусири: «Назмурти лукIулра или вехIурхьусила пикри гIеббурцес гIягIниси саби. Сагали убатурси галгара хIеруди хIебаралли, берубли бетихъур, ­илкьяйдали сунела пикруми назмулизир лушес вехIирхьусила хьулра хъилизиб буръар».

(Сарат ГIялиевас)
БерхIи ша абухъайчи
Адалтули халал гьигь,
ХIела къугъати чарх-бекI
Деръахъади марайли…
Чумра даргала гъубзни
Арбухиб душма дявли,
Илди-ургав хIелара
Вергунгу цIудар дергъли.
ВатIан гьанни бебкIибти
Жагьли алхун гIяхIгъубз­нас,
Хасдарри марай дугьби
Пашмандирули уркIби.
ХIела дугьбала кьимат
ХIейрар умцес умцлали,
ХIела пагьмула табтар
Асес хIейрар мургьилис!
Черсаргъи гьанкIлизирад
ХIерризи хIу нушачи,
ХIерли саби дарганти
ХIела хатIла тулкначи.
ХъумхIертури нушани
Ва ГIялихъала Сарат,
Ахиратлизиб хIед габ
ЧевяхIсини гьалжана.
(Аминат ГIябдулманаповас)
Хъярбукила шилизиб
Абалкун нурла шала,
Илар сари акIубси
Машгьур рузи нушала.
Аминатла назмурта
Ахъбариб дарган багьа,
Илала табтуртани
Дунъя бицIибгу гьанна.
Батирайла пагьмурти
Сари кьалли илизир,
Гьарил белкIунси назму
Кавлан дай уркIилизиб.
Дахъ къугъати дугьбани
Дарганти хIяйранбиру,
Аминат лерси мерлаб
Разидеш камхIебиру.
Ардукьялра азир дус
Калаби хIу нушачил,
Нуша духънадиулра
ХIела мургье дугьбачил!