Ишди бурхIназиб набчи Казимбек Рабазановла «Дигулра» бикIуси жуз баиб. Ил жуз нуни белчIунра. Газета бучIантас иличила дила пикри лукIулра.
Казимбек Рабазанов духути бегIтала хIурматла насаблизивадси сай. Илала неш дила гIяхIси гьалмагъ рири, ил бахъла ургар ралрикибси, жагати чарх-бекIла адам рири. Казимбекла бегIти нуни балутири ну МулебкIир, школализир рузухIейчибад.
«Дигулра» бикIуси жузлизиб бурули саби, лебил халкьлис ва сунес се дигулил гьанбуршути пикрумачила. Поэт чеветхIеибси гIямрула цалра гIямзи агара: гIяхIти, вайти адамтачила; пайдаладарили сари дахъал буралаби; мешубуцуни; усалти ва черяхIти баркьудлуми; дин бузахъниличила; хIякимтала дархьагар баркьудлумачила; даршудешличила; дигиличила; адамтала низам-кьяйдаличила. Поэтла лерилра пикрумачила ишаб бурес хIейрар. Нуни илала жузличила белкIани къантI-къантIли лукIулра. ХIера сейкIулил поэт:
«Дигулра наб нешани
Шадли бухънабиули,
Чучибад акIубтачи
Пахрумани биркьули.
Дигулра наб унруби
Узбиван хIербирули,
Цаличи ца башули
Дякьлар кьар хIедирули.
Дигулра мугIяллимли
ДурхIнас багьни лугули,
Илди чебхIебалкIахъес
Бархьси гьуни бургули.
Дигулра наб хIяжлизи
ХIяж баресцун башули,
Вачар-чакарла тукен
Асес башхIебашули.
Дигулра неш-дудешла
Гъайличи лехIирхъули,
Илдани бурибси гъай
Цалра убхIебирхъули.
Дигулра узи-урши
Дигиличил кавлули,
Аллагьли гибти гIямру
Дигиличил дуркIули.
Дигулра гьарил хIяким
Бархьси гьунчив вашули,
Сай ватахъес гIелавад
Къараул хIевашули.
Дигулра кIибяхIяндеш
Ханжултасцун далтули,
Ца бяхI кьутабиалли,
Итил шурхIебалтули.
Дигулра иман-ислам
Лер тяхIярли дузули,
Илбисла макрулизи
Сари диркхIедиркули.
Дигулра рушбат сайсул
Хъямварили урцули,
Байхъала хIед бикалли,
ХIулби кьяпIхIедирули.
Дигулра дуббуцари
Ца бархIи бехIбирхьули,
«Бац чехIебаира» или
Жалти дехIхIедирхьули».
Казимбекла 300 экземплярла тиражличил дурабухъунси ил жуз лебил даргантани белчIаллири дигахъира. Жузлизир халаси мягIналичилти произведениеби лер. Лебил халкьлис хIялалдеш диубли дигули сай поэтлис. Жузлизирад касибти – камти сари нуни делкIунтазирад.
«Балулра дунъяличив
Заманалис хIерирни,
Ахиратла хъулрази
Даимлис хьураирни.
КIикьяшан ветаурли
Жагьдешли кIапIуцира,
Хабаралра агарли
ХIяндешли кьацIуцира.
Замана саби гьанна
Ца някъ кьяш бетаахъес
Амма ахъри агара
Иличи ну хъархIяхъес.»
«СагъхIебируси дяхъи» бикIуси назмулизиб бурули саби, вайси, хъумхIертеси зугьаси дев хIебурниличила.
«Ханжайван дяхъи барес
Бирар мухIлила гъайли,
Ил сагъбиахъес хIейрар
ГIямру керхайчи марли.
Илала дяхъи кавлан
Даим уркIила дайлаб,
УркIила тумала хIи
ДирцIахъули агъули».
Казимбек, халаси баркалла хIед, халкьла уркIбазивад гъайикIулри, адамтас гIяхIдешуни диубли дигулри. Аллагьли хIед арадеш, разити гIеркъати гIямру габ, илдигъунти дархьти, халкьлис багаладирути назмурти лукIахъес. Казимбек, хIед дигути гьар секIал детааб. Илди хIуни лукIути лерилра назмурти халкьла уркIбазир калаб, хIуни дурути гIяхIти пикруми Аллагьли гIямрулизир детерхахъаб. Нуни даргала поэтунала дахъал жузи делчIунти сари. Илдазир хIедцад адамтас гIямрулизир гIяхIдешуни диубли дигути пикруми, дахъал хIеделчIунра. Наб дебали гIяхIдизур Ильяс Идзиевли лукIути назмурти ва поэмаби, уркIи-уркIиларад заманаличи далдикибти, жагали каргьурти дугьбира.
Нуни ишаб Казимбеклис дила шайзибад савгъатли биахъубли ца назмура пешкешбирулра:
ГIяхIси насабла ухIнав
Вахъ духули акIубси,
ГIяламла уркIурбази
Мурхьли ухIнаухъунси.
Халкьла уркIиличирти
Дурибтиван дагьурси,
ГIяхIти халкь гапбирули
Вайтас нягIна буршуси.
ХIуни белкIун жузлизир
Лер дахъал хIед дигути,
ГIяламла гIямрулизир
Чус багаладиэсти.
Чинаб-биалра бархьдеш
Ил баргес хIед дигулри,
Рушбатчибас, хъямчибас
ХIуни бяхъ чейгахъулри.
Кумекбараб Аллагьли
Дигути детаахъес,
Арадешра цIакьра габ
ГIурра ункъли лукIахъес.
Дарданази викили
Дугели гьанкI мабемцIаб,
ХIед дигуси тяхIярли
Поэзия ахъбикIаб.
