Кумек гIеббаахъес къайгъилизиб

Дагъистан Республикала Правительствола Председатель ГIябдулпатяхI Амирхановли, дахъал чяхI-заб дарили гIергъи, диубти зарулти чедаэс багьандан, Гъунибла ва Лавашала районтала чумал шилизи архIяби дурадеркIиб.

Лавашала районна бекI Шамил Дабишевли, ДР-ла Халкьла собраниела депутат Мухтар ХалалмяхIяммадовли ва цархIилти ­жавабла хIянчизартани гьуниввалтуси премьер-министр ­Къуппала шилизира вякьун. Илар забли детаахъурти халати, нясти ­шинна хIуркIбани гьуни, гуми, илкьяйдали шинна провод ­заядарилри. Мерличибси администрацияла цIакьаначил шинна ­провод ­къулайбирнила хIянчи дурадеркIилри. Объектуни хIердарили гIергъи, ГI.Амирхановли ДР-ла хасти министерствобачи биубси зарал халбарахъес ва гъамси заманализир илди къулайдирнила хIянчи дурадеркIахъес хъарбариб.
Илини Хажалмахьилизир ва Урмала шилизир зараллизи ­дикибти гьундури, гуми, футболла хIязли биркьахъес ­хасбарибси майдан, юртани хIердариб, мерличибти адамтачил ихтилат дураберкIиб.
Баянти кайули, ГI.Амирхановли Дагъистанна ­Правительстволи ил шайчиб зарулти детаурти шимас кумек гIеббиахъу или ­багьахъур.
«Ил селилра чебицIахъес хIейруси децI саби, ­нушала ­республикала адамтачи ва нушала гIяхIли-туристуначи бяхIягибси. Баркалла биаб умцIантас ва мерличибти халкьлис, чулира беткахъибтагIиб къалабали умцIери дураберкIахъес ­кумекбарибти. Иличи че, шимасра халаси зарал бетаурли саби, имцIаливан заядиуб гьундури, газла гIягIниахълуми, юртани. ­Нушани илди объектуни лайикьти программабази ­кадерхахъес къайгъибирехIе, сагадарес дирусигъуна кумек гIеббаахъес ­багьандан», — буриб ДР-ла Правительствола Председательли.