ГIядатлибиуб­ливан, иш­дус­­ра ДР-ла БекIла бу­­тIа­­­кьян­­деш­личил багьу­дила уч­режд­е­ние­бала хIян­чи­зар­тала совещание бетер­хур.

Балбуцла бекIлидиубти темаби сарри: белчIудила сагаси дусличи хIядурдеш, арбякьунси дусла хIясилти, респуб_ликализиб багьуди гьалабяхI башахъни ва жамигIятлизиб педагогла мягIничебдеш.
«ГIяхIси даражала багьуди – респуб­лика ва арагIебли Россия гьаладяхI дашахънилизи кабирхьуси инвестиция саби. Иличила иргъули, улкала руководстволи нушала респуб­ликализир сагати школаби, дурхIнала унхъри делшахъес, чеимцIаси багьуди бедлугути мерани алкIахъес, педагогунас алапа бедлугахъес арц дурхьули сай.
ЖамигIятлизиб мугIял­лим­ла ахъси у калахъес багьандан, нушаб халаси къайгъи дакIубарес чебиркур. Ишдусла июльличиб республикала Правительстволи багьудила хIянчизартала алапала кьадар ахъбуцес пикрибариб», — викIи С.Меликов.
Илала гъай хIясибли, алапа камси биънила сабабли, багьудила учреждениебазиб чисалра бузес дигули ахIен. С.Меликовли мерла хIукуматла органтала бургачи шимала школабазиб жагьти специалистуни бузес биэсти шуртIри акIахъес хъарбариб. Илкьяйдали лябкьуси дуслизир 100 школа делшес пикрибарниличилара буриб илини. 2021 ибил дус ахирличи бикайчи, 16 школа ва 57 дурхIнала анхъ дузесаэс, багьудила гIяхIцад учреждениеби лутIи-хьул­чи­лизирадал сагадарес пикрибарили саби.
ЛугIурбала аги-кьяй­да­личила гъайи­кIал­ли, «Ба­гьуди» миллатла проектла «Ци­ф­­ровая образовательная среда» программала дазурбазиб республикала 102 школализир цифрала тяхIяр-кьяйда пайдаладирули сари. 2022 ибил дуслис илди гIуррара 145 школализир дузахъес пикрибариб. Иличил бархбасахъи, С.Меликовли санигIят ункъли бяркъурти педагогунира хIяжатли биъниличила багьахъур.
Республикала БекIли гIядат­ласи багьуди кайсни цар­хIил тяхIярличи, мисаллис ка­салли — гьарахълабад кайсуси­личи, шурбатес асухIебирар или буриб, сенахIенну мугIял­лим­ли дурхIя дяхI-дяхIли учIахъули багьудлумачи ве­гIи­рухIели, бяркъличи вир­кахъухIели, культураличи, Ва­тIайчи ди­ги адилкьухIели, рухIла давла чебир­цIа­хъу­­хIе­ли. Багьудила мягIничеб­деш патриот бяркъ гьалабяхI башахънилизиб биъниличилара багьахъур.
«ВатIайчи дигичебси, илала тарихличи ва халкьличи пахрубируси, жамигIятла гIямрулизир жигарла бутIакьяндеш дируси ва ВатIайс къуллукъбарес хIядурси жагьси наслу абикьни нушала бекIлибиубси масъала саби. Ил сабабли, «Багьуди» миллатла проектла дазурбазиб «РФ-ла гражданинтас патриот бяркъ бедни» бикIуси сагаси федеральный проект бузесаилра. Илизир республикала дурхIнани жигарчерли бутIакьяндеш дирули сари», — викIи С.Меликов.
Дагъистанна руководительли буриливан, багьуди — ца-кIел дусла бухIнаб тамай барсдеш акIахъес вируси кьяли ахIен. Багьудила гIяхIти хIясилти дирахъес, мурадуначи биахъес багьандан, дурхI­ни белчIудиличи гьирбирути шуртIри гIяхI­ду­хъахъес чебиркур. С.Меликовла гъай хIясибли, ишдус регионна руководстволи ЕГЭ-бачир 100 балл касибти дурхIнас дарш-даршал азир къуруш дедлугесли, илкьяйдали лебил Россияла олимпиадабачир гьаларти мерани дуцибтасра илдала тренертасра арцла шабагъатуни дедлугесли пикрибарили саби. Ил тяхIяр белчIудиличи дурхIналацунра ахIи, бузериличи мугIял­лим­талара гъира им­цIабирнила лишанни бетарниличи дир­хе­хIе.
Балбуцла ахирличиб асилси бузерилис, вегIла багьудлуми ва цIакьани пайдаладирнилис, чеббикIибси санигIятлис марти биънилис С.Меликовли Дагъистанна педагогунас баркалла багьахъур.
ДР-ла гIилмула ва багьудила министр­ла къуллукъуни заманалис дузахъуси Я.Бу­чаевли лебилра челябкьуси бел­чIу­дила сагаси дусличил мубаракбариб ва республикала багьуди ахъси даражаличиб ка­лахъес багьандан, лерилра цIакьани дяхI­чиаэс Министерство хIядурли биънили­чила багьахъур. Илини багьудила бузерилизир дарсдешуни акIахъес хIяжатли биъниличилара буриб. Илкьяйдали школабазирра дурхIнала унхъразирра мерани хIе­диъ­ни­личила ва цацадехIти учрежде­ние­би дуркь­диъниличилара буриб Я.Бу­чаев­ли.
Школала гIямруличи хIебаибти дурхI­нас багьуди бедлугнила масъала иш­бар­хIира аргъбаибсили кавлули саби. Респуб­ликала гIяхIцад шимазир дурхIнала унхъри бекIлил агара. Илкьяйдали школализиб дурхIни буцIарси беркай бахниличира министр­ли халаси пикри бяхIчиаиб.
«Дагъистаннизиб багьуди гьалабяхI башахъ­ниличи пик­ри» бикIуси программа балкьаахънилизиб ва гIямрулизиб дура­беркI­нилизиб республикала вузанала рек­тортала Советличил барх хасси Минис­терствора бузес хIядурли биъниличила багьахъур.
Балбуцличир ДР-ла педагогунала Ассоциацияла президент, республикала багьудила центрла директор А.Байрамбековани, ДГПУ-ла ректорла къуллукъуни заманалис дузахъуси Н.Асваровли, 2021 ибил дусла мугIяллим ХI.Мардановли, ДИРО-ла ректорла къуллукъуни дузахъуси Г.ГIяхI­ма­до­вани, лебил Россияла педагогунала Советла член С.МяхIяммадовани, лугIурбала ва сагаси тяхIярла секIултала департаментла директорла замес­титель Ю.Захирли, «Багьудлумала Юрт» АНОО-ла гендиректорла заместитель Э.Сайпуевани багьудила ва бяркъла черкадти чула пикруми дуриб.