Нушала бегIтани ва хала бегIтани пайдаладирути берклуми ишбархIилагъунти зараллати ахIенри. ИтхIели гьарил секIал чула някъбани дирутири ва кьаркьайс пайдалатири.
Дубурла шимала мякьларти къадурбазир шинкьби дирутири ва илар декь делкьес башутири адамти. Чули дакIахъибти ризкьи гьар дуслизир чула кулпетлис ва мицIираглис даарила кьадарлизир шинкьайзир декь ва хIяйвантас ярма дарили, хIядурдирутири. БиштIатас ва халатас дебали дигахъи печьличир дерзибти кья.
Гьарил хъалибарглизир мурталра пайдаладирутири цIедешлизирадли дирути мураббаби, компотуни ва цархIилти берклуми. Дигуси беркалала бирусири урбешра.
ГIергъити дусмазир илкьяйдали берклуми хIядурдирес имканти агартири. Шимазир шинкьби гъятIкадииб. ИлхIели цацадехIти шимазир хутIличил дузути шинкьби дагьардиуб. Илар имцIаливан мицIираглис ярма хIядурдирутири. Адамтани чус дерзибти декьлизирадли нукьун дирутири. Урбеш хIядурбирути шинкьбира дагьардиуб багьла-багьлали.
ГIергъити чумал дус урбеш белкьес МяхIячкъалализибра адамти имцIали башескабииб. Ил исутира гьанна бахъбаили саби. СенахIенну илала пайдаличила гIяхIил балули саби адамтани.
Ну хIеррируси мерличибад гьарахъли ахIи, кIарахъанталара леб илгъуна шинкьан. Ил чебаибхIели дила дурхIядеш дархли гьандикиб. Дила дудешла рузини ну рарх рикусири риштIахIели къадалабси шинкьайзир декь делкьес рашухIели. Иларгъунти урхамтира цархIилти ваяхIра ишхIелла манзиллизир адамтала хъулразир хутIличил бузахъуси шинкьайзир чедаибхIели тамашахIериэс хIериубра.
ХIябал урхам багьладеш агарли дукьулри урбешли. Камли ахIенри ила башути адамтира. Урбешлис хасдарибти пластикала халати дахъал тIалхIяна чедаили шинкьанкулази хьарбаира, илцад урбеш чинаб ва секьяйда бурхахъулри или.
— Гьалаб Россиялизиб урбеш се сабил балули буили ахIенри. Амма гIергъити дусмазиб Москвализиб, Санкт-Петербурглизиб ва цархIилти халати шагьуртазиб ил убиркахъули ахIен. Илала пайдаличила балули саби гьанна адамтани ва халаси иштяхIличил исули саби. Дагъистаннизирадли КАМАЗ-уни дицIили дикули сари ила баркьудила адамтани ва дурхахъули сари. Илди халати тукентала бегIтачил вягIдалабирули саби ва илаб ил пайдаласи продукт камбирахъули ахIен, — буриб кIарахъай.
Урбеш белкьес ракIибси хьунул адамлира бурулри, сунени мурталра ил бирцуси саби или.
— ГIергъити дусмазиб адамтани урбешлацунра ахIи, хивазибадли, сирмугуназибадли, миндальлизибадли, къабакъла ва курегала кьумазибадли, цархIилти пайдалати секIайзибадлира урбеш бирули саби. Гьанна чули чус дигусигъуна белкьес имкантира лер, — рикIулри ил.
Урбешла пайда халаси саби. Илини иммунитет ахъбурцули саби, адамла кьаркьа гьунар лябкьяхъули саби, хаслира вахъхIи зягIипикили гIергъи. Илала 100 граммлизир 500 ккал лерли сари. Илар лер 40 гр. углеводунала, 35 гр. гIявадешла, 15 гр. белокла ва цархIилти пайдалати секIли. Лер илар аминокислотаби, клетчатка, таурин, железо ва марганец, каротин, гIявати кислотаби, йод, цинк, биотин, аскорбиновая кислота, фосфор ва калий. Урбеш пайдалабиралли, адамла кьаркьа гьунар имцIабирар, хIулбас пайдаласи саби, беркала ашбиахъес кумекбиру ва кьаркьайзирти зараллати секIулти дурайу.
Урбешли илкьяйдали иммунитет ахъбурцу, цулбала эмаль ункъбирахъу, уркIила гIемсни чIумадирахъу, хIила гъяж ункъбирахъу, холестерин гьунчибуршу, дулекIлизирти зараллати секIулти дурайу, кьаркьайзирти витаминти ва микроэлементуни чедирцIахъу, бекIла гъез, никуби ва кьаркьа кам ункъдирахъу, нервабала аги гIяхIбулхъахъа, паразитуни дурайу…
Урбеш пайдалабирни гIяхIси саби адамла битIакI камбиахъес, виштIаси канилавхIели ва дурхIя валхухIели.
Сегъуналра вайси секIал барх агарси ва лебгIеб пайдаласи саблин урбеш дурхIнази букахъесра хIяжатси саби. ВиштIасила кьаркьала бузахъес халаси кумек леб илала. БекIла мехIе ункъли бузахъес ва дурхIяла гьунар имцIабиахъес багьандан, ил гьар савлилизиб букахъес хIяжатси саби. БугIярси манзиллизиб биштIати ва халати зягIипхIебикахъесра ил кумекли бетарули саби.
Урбеш сабицун букес ва цархIил беркайзи бархаэс вируси сай. Сегъуна-дигара беркайчил ил пайдалабарес вируси сай.
Илгъуна гIяхIси ва бизиси беркала сагадан адамтани гьар бархIилизиб пайдалабирни дигеси саби. Илдигъунти нушала хала бегIтала гIяхIти гIядатуни сагадиралли, адамтала арадешра ункъбирар.