Лебил Россияла «Дила улка — дила Россия» бикIуси конкурсла проектуназибад цали сабси «Россия — имкантала улка» ибси проектла ахирласи бутIализи дурабухъунтани «Дила педагогикала сипта» номинациялизир чула проектуни гьаладихьиб. Илди кIел бархIила духIнар, онлайн-тяхIярли детерхахъес хIяжатсири. Баянти хIясибли, чедибдеш сархибти 15 адам белгибариб. Илдала лугIилизи керхур Дагъистан Республикала вакил Зайнодин Расуловра.
Ил Д.Ф.Устиновла уличилси Балтияла пачалихъла «ВОЕНМЕХ» технический университетла аспирант сай. З.Расуловли регионна дубуртала шимала школала бучIанти-ургар инженерияла ва технологияла сагадешуни тIинтIдирнила шайчибси проект гьалабихьиб.
Проектла дазурбазир, университетла командали Дагъистан Республикала дубурла гьарахъти районтазир мерличибти бучIантас дурсри кадирхьули сари. Педагогунани челябкьлализиб гравировально-фрезерный станокличир дурхIнани ваяхI дирнила программала «ART Cam» бетуцлизир матяхI цифровой журали далкьарахънила шайчир дурсри дурадуркIули сари.
«Проект бяхIчиаибси саби жамигIятлизир социальный бяхIчибизла мягIничерти дарсдешуначи. Дагъистанна гьарахъти районтазибти школала бучIантала ишхIелла багьудила гьаркьяти программаби дузахъес имкан алкIан. Проект лебилра бутIакьянчибас гьаргси саби, ва ил Россияла лерилра субъектуназиб тIинтIбаресра вирар. Ил багьандан, ишбархIи адамти нушала бузерила хIясилтачил тянишбарес дигулра», — сунела пикруми дуриб Зайнодин Расуловли.
2021 ибил дуслизиб лебил Россияла «Дила улка — дила Россия» конкурс улкализир дурадуркIути гIилмула ва технологияла Дусла бекIлидиубти далдуцунала Планнизи каберхур. Конкурсла XVIII ибил бутIализиб бутIакьянчибили бетаур Россияла лерилра регионтазибадти ва дурала цацадехIти пачалихъуназибадти, ил лугIилизиб — Беларусьла, Украинала, Египетла, Вьетнамла, Великобританиела, США-ла ва цархIилтала — 91 147 адам.
